അല്ലാഹുവിന്‍റെ ദാസന്‍മാരെയും കൂട്ടി രാത്രിക്കുരാത്രി പുറപ്പെടണമെന്നും നിങ്ങള്‍ പിന്തുടരപ്പെടുമെന്നും മൂസാക്ക് അല്ലാഹു ദിവ്യസന്ദേശം നല്‍കിയതായി 26: 52-66 സൂക്തങ്ങളില്‍ പറഞ്ഞിട്ടുണ്ട്. 'നിശ്ചയം ഇവര്‍ ഒറ്റപ്പെട്ട ഒരു ചെറിയ വിഭാഗമാണ്, നാം ഒരുമിച്ചുകൂടി അവരെ പിടിച്ചുകെട്ടുക തന്നെ വേണം' എന്ന് പറഞ്ഞുകൊണ്ട് ഫിര്‍ഔന്‍ പട്ടണങ്ങളിലേക്ക് ശിപായിമാരെ അയച്ച് പട്ടാളക്കാരെ ഒരുമിച്ചുകൂട്ടുകയുണ്ടായി. അങ്ങനെ ഫിര്‍ഔനിനെയും അനുയായികളെയും അവരുടെ തോട്ടങ്ങളില്‍ നിന്നും അരുവികളില്‍ നിന്നും മാന്യമായ സ്ഥാനങ്ങളില്‍ നിന്നും ആര്‍ഭാടങ്ങളില്‍ നിന്നും നാം പുറപ്പെടുവിക്കുകയും അപ്രകാരം അതെല്ലാം അനന്തരാവകാശമായി ഇസ്റാഈല്‍ സന്തതികള്‍ക്ക് നല്‍കുകയും ചെയ്തു. നേരം പുലരാറായപ്പോഴേക്കും ഫിര്‍ഔനും സംഘവും ഇസ്റാഈല്‍ സംഘവുമായി കണ്ടുമുട്ടി. അപ്പോള്‍ മൂസായുടെ അനുയായികള്‍ പറഞ്ഞു: നിശ്ചയം നാം പിടികൂടപ്പെടുമല്ലോ? മൂസാ പറഞ്ഞു: അല്ല, നിശ്ചയം എന്‍റെകൂടെ എന്‍റെ നാഥനുണ്ട്, അവന്‍ എനിക്ക് മാര്‍ഗം കാണിച്ചുതരികതന്നെ ചെയ്യും. 'നിന്‍റെ വടികൊണ്ട് കടലില്‍ അടിക്കുക' എന്ന് അല്ലാഹു മൂസാക്ക് ദിവ്യസന്ദേശം നല്‍കി, അങ്ങനെ മൂസാ അടിച്ചപ്പോള്‍ കടലിലെ വെള്ളം രണ്ട് വലിയ മലകളെന്നോണം രണ്ട് ഭാഗത്തേക്കും മാറിനിന്നു. അങ്ങനെ 20: 77 ല്‍ പറഞ്ഞ പ്രകാരം സമുദ്രത്തില്‍ അവര്‍ക്കൊരു ഉണങ്ങിയവഴി ഒരുക്കിക്കൊടുത്തു. 44: 24 ല്‍ പറഞ്ഞ പ്രകാരം അവരെ കടല്‍ കടത്തി മറുകരയില്‍ എത്തിച്ച് രക്ഷപ്പെടുത്തിയ അല്ലാഹു മൂസായോട് വടികൊണ്ട് രണ്ടാമത് അടിക്കാതെ സമുദ്രത്തെ പിളര്‍ന്നതായിത്തന്നെ വിടുക എന്ന് കല്‍പിച്ചു. ഫിര്‍ഔനിനെയും സംഘത്തെയും കടലിലേക്ക് അടുപ്പിച്ച് മാറിനിന്ന വെള്ളത്തെ ഒരുമിച്ചുകൂട്ടി കടലില്‍ മുക്കിക്കൊല്ലു കയും ചെയ്തു. റൂഹ് തൊണ്ടക്കുഴിയില്‍ എത്തിയപ്പോള്‍ ഫിര്‍ഔന്‍ പ്രഖ്യാപിച്ചു: ഇ സ്റാഈല്‍ സന്തതികളെ ഏതൊരു ഇലാഹില്‍ വിശ്വസിച്ചതിന്‍റെ പേരിലാണോ കടല്‍ പിളര്‍ത്തി രക്ഷപ്പെടുത്തിയത്, ആ ഇലാഹില്‍ ഞാന്‍ ഇതാ വിശ്വസിക്കുന്നു, ഞാന്‍ അവന് സര്‍വ്വസ്വം അര്‍പ്പിച്ച മുസ്ലിംകളില്‍ പെട്ടവനുമായിരിക്കുന്നു. ഇതില്‍ നിന്ന് ഫിര്‍ഔനിന് ഇസ്റാഈല്‍ സന്തതികള്‍ വിശ്വസിച്ച ഇലാഹിനെ ശരിക്കും പരിചയമുണ്ടായിരുന്നു എന്നും സത്യം മനസ്സിലാക്കിയശേഷം തന്‍റെ സ്ഥാനമാനങ്ങള്‍ നിലനിര്‍ത്താന്‍ വേണ്ടി അവന്‍ മനഃപൂര്‍വം ധിക്കരിക്കുകയായി രുന്നു എന്നും മനസ്സിലാക്കാം. അല്ലാഹു മറുപടി നല്‍കി: ഇപ്പോഴാണോ നീ വിശ്വസിക്കുന്നത്? ഇതിനുമുമ്പ് നീ ധിക്കാരിയും നാശകാരിയുമായിരുന്നു. റൂഹ് തൊണ്ടക്കുഴിയിലെത്തുന്ന മരണവെപ്രാളസമയത്ത് വിശ്വാസം സ്വീകരിക്കുന്നതുകൊണ്ട് പ്രയോജനമില്ല എന്നും അത്തരക്കാരില്‍ നിന്ന് പശ്ചാത്താപം സ്വീകരിക്കുകയില്ല എന്നും 4: 17-18 സൂക്തങ്ങളില്‍ പറഞ്ഞിട്ടുണ്ട്. സത്യം മനസ്സിലായശേഷം അത് ജീവിതത്തില്‍ പകര്‍ത്താതെ കാത്തുനില്‍ക്കുകയും മരണം വരുമ്പോള്‍ സത്യസാക്ഷ്യവചനങ്ങള്‍ മൊഴിഞ്ഞ് രക്ഷപ്പെടാമെന്ന് കരുതിയിരിക്കുകയും ചെയ്യുന്നവര്‍ എത്ര വ്യക്തമായാണ് ഫിര്‍ഔന്‍ സത്യസാക്ഷ്യവചനം മൊഴിഞ്ഞതെന്ന് കണ്ട് പാഠം ഉള്‍ക്കൊള്ളേണ്ടതാണ്.

 ഫിര്‍ഔനിന്‍റെ ശരീരം ഏകദേശം 2800 കൊല്ലത്തോളം അല്ലാഹു കടലില്‍ തന്നെ സൂക്ഷിക്കുകയും ശേഷം ഈജിപ്തിലെ മ്യൂസിയത്തിലേക്ക് മാറ്റുകയും ചെയ്തു. അന്ത്യനാള്‍ വരെയുള്ള ജനതക്ക് അല്ലാഹുവിന്‍റെ കഴിവ് പ്രദര്‍ശിപ്പിക്കുന്ന ഒരു ദൃഷ്ടാന്തമായിട്ടാണ് അവന്‍റെ ശരീരം അല്ലാഹു രക്ഷപ്പെടുത്തി സൂക്ഷിച്ചിട്ടുള്ളതെന്നാണ് സൂക്തം പറയുന്നത്. എന്നാല്‍ ജനങ്ങളില്‍ അധികപേരും അവന്‍റെ ഇത്തരം ദൃഷ്ടാന്തങ്ങളെത്തൊട്ട് അശ്രദ്ധരായവര്‍ തന്നെയാണ്. ഗ്രന്ഥത്തിലെ 6236 സൂക്തങ്ങളില്‍ ഒന്നാണ് ഫിര്‍ഔനിന്‍റെ ഭൗതികശരീരം. ബാക്കി 6235 സൂക്തങ്ങളില്‍ അടങ്ങിയിരിക്കുന്നത് എന്താണെന്ന് അന്വേഷിക്കുന്നവര്‍ക്കും അതിനുവേണ്ടി കേള്‍വിയും കാഴ്ചയും ബുദ്ധിശക്തിയും ഉപയോഗപ്പെടുത്തുന്നവര്‍ക്കും മാത്രമാണ് ഫിര്‍ഔനിന്‍റെ ശരീരം ഒരു ദൃഷ്ടാന്തമായിത്തീരു ന്നത്. അല്ലാത്ത അറബി ഖുര്‍ആന്‍ വായിക്കുന്ന ഫുജ്ജാറുകളെല്ലാം പ്രജ്ഞയറ്റ ഗ്വാഫിലീങ്ങളും ജീവിതലക്ഷ്യം നഷ്ടപ്പെട്ട ഗാവീങ്ങളുമാണ്. 7: 179; 9: 67-68, 125 വിശദീകരണം നോക്കുക.