അദ്ദിക്ർ

യുദ്ധത്തിന് പ്രേരിപ്പിച്ചുകൊണ്ടുള്ള സൂക്തം അവതരിപ്പിച്ചതിനെത്തുടര്‍ന്ന് യുദ്ധത്തിന് ആവശ്യമായ ആയുധം, വാഹനം, ഭക്ഷണം മുതലായ യുദ്ധപാഥേയങ്ങള്‍ ഒരുക്കുന്നതിനുവേണ്ടി സമ്പത്ത് ചെലവഴിക്കണമെന്ന് കല്‍പിക്കുകയാണ്. അല്ലാഹുവിന്‍റെ മാര്‍ഗത്തില്‍ പണം ചെലവഴിക്കുന്നവരുടെ ഉപമ 2: 261 ല്‍ വിശദീകരിക്കുന്നത് ഇങ്ങനെയാണ്: ഒരു വിത്ത് പാകുന്നതുപോലെയാണ് അത്, ആ വിത്ത് ഏഴ് കതിരുകളുമായി മുളച്ചുവരുന്നു. ഓരോ കതിരിലും നൂറ് മണികളുമുണ്ട്. അല്ലാഹു അവന്‍ ഉദ്ദേശിക്കുന്നവര്‍ക്ക് ഇരട്ടിപ്പിച്ചുകൊടുക്കുന്നു. അല്ലാഹുവാണ് ചുരുട്ടുകയും നിവര്‍ത്തുകയും ചെയ്യുന്നത് എന്ന് പറഞ്ഞതിന്‍റെ വിവക്ഷ ചിലര്‍ക്ക് ഭക്ഷണവിഭവങ്ങള്‍ വിശാലമാക്കിക്കൊടുക്കുന്നതും മറ്റുചിലര്‍ക്ക് പരിമിതമാക്കിക്കൊടുക്കുന്നതും വിജയപരാജയങ്ങള്‍ നല്‍കുന്നതുമെല്ലാം അല്ലാഹു തന്നെയാണ് എന്നാണ്. 5: 12; 57: 18; 64: 17; 73: 20 വിശദീകരണം നോക്കുക.

ഈ സൂക്തം അവതരിച്ചപ്പോള്‍, മദീനയിലുള്ള ജൂതന്മാരും കപടവിശ്വാസികളും, അല്ലാഹു മനുഷ്യരില്‍ നിന്ന് കടം ചോദിക്കുന്ന അവസ്ഥയില്‍ പാപ്പരായിരിക്കുന്നു എന്ന് പരിഹസിച്ചതിന് മറുപടിയായിട്ടാണ് 5: 64 അവതരിപ്പിച്ചത്. നിങ്ങള്‍ക്ക് നല്‍കിയതില്‍ നിന്ന് നിങ്ങള്‍ ചെലവഴിക്കുക എന്നുപറഞ്ഞാല്‍ കാഫിറുകളായവര്‍ വിശ്വാസികളായവരോട് 'അല്ലാഹു ഭക്ഷിപ്പിക്കാന്‍ ഉദ്ദേശിക്കാത്തവരെ ഞങ്ങള്‍ ഭക്ഷിപ്പിക്കുകയോ, നിങ്ങള്‍ക്കെന്തുപറ്റി, അത് അല്ലാഹുവിന് എതിര് പ്രവര്‍ത്തിക്കലല്ലേ' എന്ന് ചോദിക്കുമെന്ന് 36: 47 ല്‍ പറഞ്ഞിട്ടുണ്ട്. ഇന്ന് യുദ്ധമില്ല, മറിച്ച് അദ്ദിക്ര്‍ മൂടിവെച്ച കാഫിറുകളോട് അദ്ദിക്ര്‍ കൊണ്ട് അധികരിച്ച ജിഹാദ് മാത്രമാണുള്ളത്. കൂടാതെ പ്രപഞ്ചനാഥനായ അല്ലാഹുവിനെ ലോകര്‍ക്ക് പരിചയപ്പെടുത്തുന്നതിനുവേണ്ടിയും മനുഷ്യരെ ജീവിതലക്ഷ്യത്തെക്കുറിച്ച് ബോധവാന്മാരാക്കുന്നതിനുവേണ്ടിയും അവര്‍ ആയിരം സമുദായങ്ങളില്‍ പെട്ട ജീവികള്‍ക്ക് ഗുണം ലഭിക്കുന്ന പ്രവര്‍ത്തനങ്ങളില്‍ മുഴുകുന്നതിനുവേണ്ടിയും 41: 41-43 സൂക്തങ്ങളില്‍ പറഞ്ഞ മിഥ്യകലരാത്ത അജയ്യഗ്രന്ഥവും കാരുണ്യവും ഐശ്വര്യവുമായ അദ്ദിക്ര്‍ ജാതി-മത-ലിംഗ-ദേശ-വര്‍ണ്ണ-ഭാഷാ വ്യത്യാസമില്ലാതെ ലോകര്‍ക്ക് എത്തിച്ചുകൊടുക്കുന്ന പ്രവര്‍ത്തനങ്ങളില്‍ മുഴുകുകയും അതിനുവേണ്ടി സര്‍വ്വകഴിവുകളും ഉപയോഗപ്പെടുത്തുകയുമാണ് ഇന്ന് വിശ്വാസി ചെയ്യേണ്ടത്. 2: 195; 9: 67-68 വിശദീകരണം നോക്കുക.