44: 30-31 സൂക്തങ്ങളില്‍, നിശ്ചയം നാം ഇസ്റാഈല്‍ സന്തതികളെ ഫിര്‍ഔനിന്‍റെ അതിനിന്ദ്യമായ ശിക്ഷയില്‍ നിന്ന് രക്ഷപ്പെടുത്തുക തന്നെ ചെയ്തിട്ടു ണ്ട്, നിശ്ചയം അവന്‍ അതിരുകവിഞ്ഞവരില്‍ പെട്ട ഒരു അത്യുന്നതന്‍ തന്നെയായിരുന്നു എന്ന് പറഞ്ഞിട്ടുണ്ട്. 79: 24 പ്രകാരം സൃഷ്ടിയാണെന്ന പരിധി ലംഘിച്ച് 'ഞാനാണ് അത്യുന്നതനായ നാഥന്‍' എന്ന് വാദിച്ച ഫിര്‍ഔന്‍ ഇസ്റാഈല്‍ സന്തതികളെ പൂര്‍ണമായും ഒതുക്കുന്നതിന് വേണ്ടി അവരുടെ ആണ്‍ സന്താനങ്ങളെ വധിക്കാന്‍ വീണ്ടും കല്‍പിച്ചതായി 7: 127 ല്‍ പറഞ്ഞിട്ടുണ്ട്. വിചാരണയില്ലാതെ നരകത്തില്‍ പോകുന്ന ഇക്കാലത്തുള്ള കപടവിശ്വാസികളുടെ സ്വഭാവം ഫിര്‍ഔനിനെക്കാള്‍ ദുഷിച്ചതാണ്. 2: 168-169, 205 -206 സൂക്തങ്ങളില്‍ വിവരിച്ച പ്രകാരം കപടവിശ്വാസികള്‍ക്ക് അധികാരം ലഭിച്ചാല്‍ അദ്ദിക്റിനെ മൂടിവെക്കുകവഴി ഭൂമിയില്‍ രക്തച്ചൊരിച്ചിലും വര്‍ഗീയതയും അരാജകത്വവും സൃഷ്ടിക്കുന്നതിന് വേണ്ടി അവര്‍ എല്ലാ കഴിവുകളും പ്രയോഗിക്കുന്നതാണ്. 

ഗുഹാവാസികളായ ഏഴ് യുവാക്കള്‍ യഥാര്‍ത്ഥ വിശ്വാസം പ്രഖ്യാപിക്കുകയും സ്വജനതയുടെ എതിര്‍പ്പ് വകവെക്കാതെ ആ വിശ്വസത്തില്‍ ഉറച്ചു നില്‍ക്കുകയും ചെയ്തപ്പോള്‍ അല്ലാഹു അവരെ ഒരു ഗുഹയില്‍ മുന്നൂറിലധികം വര്‍ഷങ്ങള്‍ ഉറക്കിക്കിടത്തി സംരക്ഷിച്ച കാര്യം 18: 9-27 സൂക്തങ്ങളില്‍ വിവരിച്ചിട്ടുണ്ട്. എക്കാലത്തും സ്വതന്ത്ര ചിന്തയുള്ള യുവാക്കള്‍ മാത്രമാണ് സത്യം സ്വീകരിക്കാന്‍ തയ്യാറായി മുന്നോട്ട് വന്നിട്ടുള്ളത്. ഇഹലോകത്ത് മസീഹുദ്ദജ്ജാലിന്‍റെ പക്കലുള്ള നരകമാണ് വിശ്വാസികള്‍ സ്വീകരിക്കേണ്ടതെന്നും ആ നരകം ഇബ്റാഹീമിന് തീകുണ്ഠം തണുപ്പും സമാധാനവുമായതുപോലെ അവര്‍ക്ക് തണുപ്പും സമാധാനവുമുള്ളതായി മാറുന്നതിന് വേണ്ടി സൂറ: കഹ്ഫിന്‍റെ ആദ്യഭാഗം എപ്പോഴും തിലാവത്ത് ചെയ്യണമെന്നും പ്രപഞ്ചനാഥന്‍ അവന്‍റെ നിരക്ഷരനായ പ്രവാചകനിലൂടെ പഠിപ്പിച്ചിട്ടുണ്ട്. ഗുഹാവാസികളായ യുവാക്കളുടെ വിശ്വാസദാര്‍ഢ്യത കൈവരുന്നതിന് വേണ്ടിയാണത്. 5: 48 ല്‍ പറഞ്ഞ മുഹൈമിനായ അദ്ദിക്ര്‍ ഇന്ന് ഗ്രന്ഥമായി രൂപപ്പെട്ടിരിക്കെ അതിനെ മുറുകെപ്പിടിക്കുകവഴി പ്രപഞ്ചനാഥനെ മുറുകെപ്പിടിച്ച വിശ്വാസിയെ ഒരു തരത്തിലുള്ള ആപത്തും വിപത്തും ബാധിക്കുകയില്ല. അവന്‍ അദ്ദിക്റിനെ ടിക്കറ്റായി ഉപയോഗപ്പെടുത്തുകവഴി സ്വര്‍ഗത്തിലേക്ക് തിരിച്ചുപോകുന്നതാണ്. 4: 140-147; 8: 49-55; 9: 67-68, 129 വിശദീകരണം നോക്കുക.