'അക്രമികളായവരുടെ കാര്യത്തില്‍ എന്നോടൊന്നും ആവശ്യപ്പെടുകയുമരുത്, നിശ്ചയം അവര്‍ മുക്കിക്കൊല്ലപ്പെടേണ്ടവരാകുന്നു' എന്ന് 11: 37 ല്‍ അല്ലാഹു കല്‍പിച്ചതിന് വിരുദ്ധമായിക്കൊണ്ടാണ് സ്വന്തം മകന്‍റെ കാര്യത്തില്‍ നൂഹ് ആവലാതിപ്പെടുന്നത്. അപ്പോള്‍ മകന്‍ അക്രമികളില്‍ പെട്ടവനായിരുന്നു എന്ന് നൂഹ് തിരിച്ചറിഞ്ഞിരുന്നില്ല. 'നീ വിധി കല്‍പിക്കുന്നവരില്‍ ഏറ്റവും നല്ല വിധികര്‍ത്താവുമാകുന്നു' എന്ന് നൂഹ് പറഞ്ഞതിന്‍റെ പൊരുള്‍ യുക്തിജ്ഞനും ത്രികാലജ്ഞാനിയുമായ അല്ലാഹുവിന്‍റെ വിധി കണിശമായ അറിവോടും പൂര്‍ണ്ണമായ നീതിയോടും കൂടിയാണ് എന്ന് സമ്മതിക്കലാണ്. 

ഇന്ന് നാഥനില്‍ നിന്നുള്ള ഗ്രന്ഥത്തിന്‍റെ ഏറ്റവും നല്ല വിശദീകരണമായ അദ്ദിക്ര്‍ ഒരു ഗ്രന്ഥമായി രൂപപ്പെട്ടിരിക്കെ അതുകൊണ്ട് വ്യക്തിജീവിതത്തിലും കുടുംബജീവിതത്തിലും സമൂഹജീവിതത്തിലും വിധി കല്‍പിക്കാത്തവര്‍ തന്നെയാണ് കാഫിറുകളും അ ക്രമികളും തെമ്മാടികളുമെന്ന് 5: 44, 45, 47 സൂക്തങ്ങളില്‍ പറഞ്ഞിട്ടുണ്ട്. 9: 80 ല്‍ വിവരിച്ച പ്രകാരം പ്രവാചകനും വിശ്വാസികളും വിശ്വാസികളായ പുരുഷന്മാര്‍ക്കും സ്ത്രീകള്‍ക്കും വേണ്ടി മാത്രമേ പൊറുക്കലിനെത്തേടാന്‍ പാടുള്ളൂ. 6: 47; 9: 84-85; 10: 108-109; 11: 40 വിശദീകരണം നോക്കുക.