മനുഷ്യരും മറ്റ് ജീവികളും കുടിവെള്ളത്തിനും കൃഷികള്‍ നനക്കാനും മറ്റ് ആവശ്യങ്ങള്‍ക്കുമെല്ലാം ഉപയോഗപ്പെടുത്തുന്നത് മഴവെള്ളമാണ്. അത് നേരിട്ടാണെങ്കിലും കിണറുകള്‍, തോടുകള്‍, പുഴകള്‍ തുടങ്ങിയവയില്‍ നിന്ന് ശേഖരിച്ചാണെങ്കിലും ശരി. കടലില്‍ നിന്ന് ഉപ്പുവെള്ളം ബാഷ്പീകരിപ്പിച്ച് അതിനെ കുടിക്കാന്‍ ഉതകുന്ന വിധത്തില്‍ ഉപ്പ് രസമില്ലാതാക്കി മാറ്റിയവന്‍ അല്ലാഹുവാണ്. 56: 68-70 സൂക്തങ്ങളില്‍, നിങ്ങള്‍ കുടിച്ചുകൊണ്ടിരിക്കുന്ന വെള്ളത്തെപ്പറ്റി നിങ്ങള്‍ ചിന്തിച്ചിട്ടുണ്ടോ? നിങ്ങളാണോ മേഘങ്ങളില്‍നിന്ന് അതിനെ ഇറക്കിക്കൊണ്ടിരിക്കുന്നത്, അതോ നാം തന്നെയാണോ ഇറക്കിക്കൊണ്ടിരിക്കുന്നവന്‍? നാം ഉദ്ദേശിച്ചിരുന്നുവെങ്കില്‍ അതിനെ നാം ഉപ്പുരസമുള്ളതാക്കുമായിരുന്നു, അപ്പോള്‍ നിങ്ങള്‍ എന്തുകൊണ്ട് നന്ദി പ്രകടിപ്പിക്കുന്നവരാകുന്നില്ല എന്ന് ചോദിച്ചിട്ടുണ്ട്. 32: 27 ല്‍, നിശ്ചയം നാം ഉണങ്ങി വിണ്ടുകീറിയ ഭൂമിയിലേക്ക് വെള്ളത്തെ നയിക്കുന്നതും അതു കൊണ്ട് കൃഷി മുളപ്പിക്കുന്നതും അവര്‍ കാണുന്നില്ലേ! അതില്‍ നിന്നാണല്ലോ അവരുടെ കന്നുകാലികളും അവരും തിന്നുന്നത്, അപ്പോള്‍ അവര്‍ ഉള്‍ക്കാഴ്ച ഉപയോഗപ്പെടുത്തുന്നവരാകുന്നില്ലേ എന്ന് ചോദിച്ചിട്ടുണ്ട്. ഇവിടെ ആദ്യം തിന്നുന്നത് കന്നുകാലികളാണ് എന്ന വസ്തുത മനസ്സിലാക്കി അല്ലാഹു വിനെ കണ്ടെത്തുന്നില്ലെയോ എന്നും ഉള്‍കാഴ്ച്ചാദായകമായ ഗ്രന്ഥത്തിന്‍റെ മൊത്തം ആശയം ഉപയോഗപ്പെടുത്തി ജീവിതലക്ഷ്യം കണ്ടെത്തുന്നില്ലെ യോ എന്നുമാണ് ചോദിക്കുന്നത്. 6: 104; 21: 30; 50: 9 വിശദീകരണം നോക്കുക.