'സ്വൂര്‍' എന്ന കാഹളത്തില്‍ ഊതപ്പെടുന്ന ദിനം! അല്ലാഹു ഉദ്ദേശിച്ചവരൊഴികെ ആകാശങ്ങളിലുള്ളവരും ഭൂമിയിലുള്ളവരുമെല്ലാം സ്തബ്ധരായി വീഴുന്നതാണ്. എല്ലാ ഓരോരുത്തരും അവന്‍റെ മുമ്പില്‍ ദീനരായി വരുന്നതുമാണ്, നീ പര്‍വ്വതങ്ങളെ കാണുന്നു, അവ ഉറച്ച് നില്‍ക്കുന്നതാണെന്ന് കണക്കുകൂട്ടുകയും ചെയ്യുന്നു, അവ അന്ന് മേഘങ്ങള്‍ സഞ്ചരിക്കുന്നതുപോലെ സഞ്ചരിക്കുന്നതുമാണ്, എല്ലാ കാര്യങ്ങളും കുറ്റമറ്റതാക്കിത്തീര്‍ക്കുന്ന വനായ അല്ലാഹുവിന്‍റെ നിര്‍മ്മിതി തന്നെയാണ് അത്, നിശ്ചയം അവന്‍ നിങ്ങള്‍ പ്രവര്‍ത്തിച്ചുകൊണ്ടിരിക്കുന്നതെല്ലാം വലയം ചെയ്തവനാകുന്നു എന്ന് 27: 87-88 സൂക്തങ്ങളിലും; അന്ന് പര്‍വ്വതങ്ങള്‍ പൊടിപടലമാക്കി മാറ്റപ്പെടുന്നതും പരുത്തപ്രതലമോ പതിഞ്ഞ സ്ഥലമോ കാണാത്തവിധം ഭൂമിയെ മിനുസമുള്ള ഒറ്റ മാര്‍ബിള്‍ വിരിച്ചതുപോലെയാക്കുന്നതുമാണ് എന്ന് 20: 105-107 സൂക്തങ്ങളിലും പറഞ്ഞിട്ടുണ്ട്. ആ മഹാസംഭവം-ലോകാവസാനം- സംഭവിക്കുമ്പോള്‍ പര്‍വ്വതങ്ങള്‍ കടഞ്ഞെടുത്ത കമ്പിളിരോമങ്ങള്‍ പോലെയായിത്തീരുമെന്ന് 101: 5 ലും, 'സ്വൂര്‍' എന്ന കാഹളത്തില്‍ ഊതപ്പെടുന്ന നാളില്‍ പര്‍വ്വതങ്ങള്‍ സഞ്ചരിപ്പിക്കപ്പെടുകയും ഭൂമി മരീചികപോലെ ആയിത്തീരുകയും ചെയ്യുന്നതാണെന്ന് 78: 20 ല്‍ പറഞ്ഞിട്ടുണ്ട്. 1: 3; 14: 48 വിശദീകരണം നോക്കുക.