അദ്ദിക്ർ

എത്രയെത്ര നബിമാരും അവരോടൊപ്പം എത്രയെത്ര പ്രൗഢന്മാരായ അനുയായികളുമാണ് യുദ്ധം ചെയ്തിട്ടുള്ളത്, അല്ലാഹുവിന്‍റെ മാര്‍ഗത്തില്‍ അവരെ ബാധിച്ചതില്‍ അവര്‍ മനം ഇടിഞ്ഞവരായിട്ടില്ല, അവര്‍ ബലഹീനത പ്രകടിപ്പിച്ചിട്ടില്ല, അവര്‍ അസത്യത്തിന്‍റെ മുമ്പില്‍ തലകുനിച്ചിട്ടുമില്ല, അല്ലാഹുവോ ഇത്തരം ക്ഷമാശീലരെ ഇഷ്ടപ്പെടുന്നവനാകുന്നു എന്ന് 3: 146 ല്‍ പറഞ്ഞിട്ടുണ്ട്. മനുഷ്യരെ ഭൂമിയിലേക്ക് നിയോഗിച്ചിട്ടുള്ളത് പരീക്ഷണത്തിന് വിധേയമാക്കാനാണ്. പൊട്ടിപ്പോകാത്ത പാശമായ അദ്ദിക്റിനെ മുറുകെപ്പിടിച്ച് അല്ലാഹുവില്‍ ഭരമേല്‍പിച്ച് നിലകൊള്ളുന്നവര്‍ മാത്രമേ പരീക്ഷണങ്ങളില്‍ വിജയിക്കുകയുള്ളൂ. മുന്‍ഗാമികളില്‍ സംഭവിച്ചിട്ടുള്ളതുപോലെ വഹിക്കാന്‍ കഴിയാത്ത പരീക്ഷണങ്ങളൊന്നും ഞങ്ങള്‍ക്ക് നല്‍കരുതെന്ന് പ്രാര്‍ത്ഥിക്കാന്‍ 2: 285-286 സൂക്തങ്ങളിലൂടെ അല്ലാഹു തന്നെ പഠിപ്പിച്ചിട്ടുണ്ട്. അതല്ല, നിങ്ങളില്‍ നിന്ന് ആരാണ് അല്ലാഹുവിന്‍റെ മാര്‍ഗത്തില്‍ ജിഹാദ് ചെയ്യുന്നതെന്നും അല്ലാഹുവിനെയും അവന്‍റെ പ്രവാചകനെയും വിശ്വാസികളെയുമല്ലാതെ മറ്റാരെയും ആത്മമിത്രവും അഭയമരുളുന്നവനുമായി തെരഞ്ഞെടുക്കാത്തവരാരെന്നും അല്ലാഹു ഇനിയും അറിഞ്ഞിട്ടില്ല എന്നിരിക്കെ നിങ്ങള്‍ വെറുതെയങ്ങ് വിട്ടയക്കപ്പെടുമെന്ന് കണക്കുകൂട്ടുന്നുവോ എന്ന് 9: 16 ലും; നിങ്ങളില്‍ ആരാണ് യഥാര്‍ത്ഥത്തില്‍ അല്ലാഹുവിന്‍റെ മാര്‍ഗത്തില്‍ ത്യാഗപരിശ്രമം ചെയ്യുന്നതെന്നും ആരാണ് അവന്‍റെ മാര്‍ഗത്തില്‍ ക്ഷമ കൈക്കൊള്ളുന്നതെന്നും അല്ലാഹു ഇനിയും അറിഞ്ഞ് കഴിഞ്ഞിട്ടില്ല എന്നിരിക്കെ എളുപ്പത്തില്‍ സ്വര്‍ഗത്തില്‍ പ്രവേശിച്ചുകളയാമെന്ന് നിങ്ങള്‍ കണക്കുകൂട്ടുന്നുവോ എന്ന് 3: 142 ലും ചോദിക്കുന്നുണ്ട്. സ്വര്‍ഗത്തിലേക്കുതന്നെ തിരിച്ചുപോകാന്‍ ഉദ്ദേശിക്കുന്നവര്‍ 73: 19; 76: 29; 80: 11 തുടങ്ങിയ സൂക്തങ്ങളില്‍ പറഞ്ഞ സ്വര്‍ഗത്തിലേക്കുള്ള ടിക്കറ്റായ അദ്ദിക്ര്‍ ആത്മാവ് പങ്കെടുത്ത് പ്രഭാത-പ്രദോഷങ്ങളില്‍ വായിച്ച് തിലാവത്തിന്‍റെ സുദീര്‍ഘമായ ഒറ്റ സാഷ്ടാംഗപ്രണാമം നിര്‍വ്വഹിച്ചുകൊണ്ടും, 7: 205-206 സൂക്തങ്ങളില്‍ വിവരിച്ച ജീവിതരീതിയും പ്രാര്‍ത്ഥനാരീതിയും പിന്‍പറ്റിക്കൊണ്ടും 83: 7 ല്‍ പറഞ്ഞ നരകക്കുണ്ഠത്തിലേക്കുള്ള സിജ്ജീന്‍ പട്ടികയിലുള്ള തന്‍റെ വിധി 83: 18 ല്‍ പറഞ്ഞ സ്വര്‍ഗത്തിലുള്ള ഇല്ലിയ്യീന്‍ പട്ടികയിലേക്ക് മാറ്റേണ്ടതാണ്. 2: 155-157, 186; 7: 94-96; 22: 78 വിശദീകരണം നോക്കുക.