അദ്ദിക്ർ

കഴിഞ്ഞുപോയ കാലത്ത് നടന്ന സംഭവങ്ങളെല്ലാം ത്രികാലജ്ഞാനിയായ അല്ലാഹു നിരക്ഷരനായ പ്രവാചകന്‍ മുഹമ്മദിന് ജിബ്രീല്‍ മുഖേന വിശദീകരിച്ച് നല്‍കുകയാണ്. സകരിയ്യാ, യഹ്യാ, മര്‍യം, ഈസാ തുടങ്ങിയവരുടെ ചരിത്രം ഓര്‍മ്മിപ്പിച്ചതിനുശേഷം 3: 44 ല്‍, അതെല്ലാം മറഞ്ഞ വൃത്താന്തങ്ങളാണ്, നാം നിനക്ക് അത് ദിവ്യസന്ദേശമായി നല്‍കുകയാണ് എന്ന് പറഞ്ഞിട്ടുണ്ട്. മൂസാക്ക് നമ്മുടെ കല്‍പന ഏല്‍പിച്ചപ്പോള്‍ നീ ത്വൂര്‍ പര്‍വ്വതത്തിന്‍റെ പടിഞ്ഞാറ് ഭാഗത്തുണ്ടായിരുന്നില്ലല്ലോ, നീ അതിന് സാക്ഷികളില്‍ പെട്ടവനുമായിരുന്നില്ലല്ലോ, ഈ ഗ്രന്ഥം നിന്‍റെ നാഥനില്‍ നിന്നുള്ള കാരുണ്യമാകുന്നു, നിനക്കുമുമ്പ് താക്കീതുകാര്‍ ആരും വരാത്ത ഒരു ജനതയെ ഇതുകൊണ്ട് നീ മുന്നറിയിപ്പ് നല്‍കുന്നതിനുവേണ്ടിയും അവര്‍ ഹൃദയം കൊണ്ട് സ്മരിക്കുന്നതിനുവേണ്ടിയും എന്ന് 28: 44-46 സൂക്തങ്ങളിലും പറഞ്ഞിട്ടുണ്ട്. എല്ലാം വലയം ചെയ്ത ത്രികാലജ്ഞാനിയായ ഒരുവനല്ലാതെ നിന്നോട് ഇത്തരം വൃത്താന്തം പറഞ്ഞ് തരികയില്ല എന്ന ആശയത്തിലാണ് 35: 14 അവസാനിക്കുന്നത്. അല്ലാഹു മനുഷ്യരില്‍ നിന്നും മലക്കുകളില്‍ നിന്നും ദൂതന്മാരെ തെരഞ്ഞെടുക്കുമെന്ന് 22: 75 ലും; മുഹമ്മദ്, നബിമാരിലും പ്രവാചകന്മാരിലും അന്ത്യനാണെന്ന് 33: 40 ലും പറഞ്ഞിട്ടുണ്ട്. പ്രവാചകന്‍ മുഹമ്മദിനെ സര്‍വ്വലോകര്‍ക്കും അനുഗ്രഹമായിട്ടല്ലാതെ നിയോഗിച്ചിട്ടില്ല എന്ന് 21: 107 ലും; മുഹമ്മദിനെ മൊത്തം മനുഷ്യരിലേക്ക് പ്രവാചകനായിട്ടല്ലാതെ അയച്ചിട്ടില്ല എന്ന് 7: 158 ലും 34: 28 ലും പറഞ്ഞിട്ടുണ്ട്. 2: 119; 11: 17; 36: 3 വിശദീകരണം നോക്കുക.