അദ്ദിക്ർ

പ്രവാചകന്‍റെ കാലത്ത് മദീനയിലുണ്ടായിരുന്ന ജൂതന്മാര്‍ അല്ലാഹുവിന്‍റെ ഇഷ്ടദാസന്മാരും സ്വര്‍ഗത്തിലേക്കുള്ളവരുമാണെന്ന് അഭിമാനം കൊണ്ടിരുന്നു. അഥവാ നരകത്തില്‍ പ്രവേശിച്ചാല്‍ തന്നെ പശുവിനെ ആരാധിച്ച നാല്‍പത് നാളുകളല്ലാതെ നരകത്തില്‍ കിടക്കേണ്ടി വരികയില്ലെന്ന് ഊറ്റം കൊള്ളുകയും ചെയ്തിരുന്നു. ഈ സൂക്തത്തില്‍ പറഞ്ഞ 'എണ്ണപ്പെട്ട നാളുകള്‍' കൊണ്ട് ഉദ്ദേശിക്കുന്നത് നാല്‍പത് നാളുകളും; 2: 184 ല്‍ പറഞ്ഞ 'എണ്ണപ്പെട്ട നാളുകള്‍' കൊണ്ട് ഉദ്ദേശിക്കുന്നത് ഒരു മാസവും; 2: 203 ല്‍ പറഞ്ഞ 'എണ്ണപ്പെട്ട നാളുകള്‍' കൊണ്ട് ഉദ്ദേശിക്കുന്നത് രണ്ടോ അല്ലെങ്കില്‍ മൂന്നോ ദിവസവുമാണ്. യഥാര്‍ത്ഥ ജ്ഞാനമായ അദ്ദിക്റിനെ തള്ളിപ്പറഞ്ഞുകൊണ്ട് അറബി ഖുര്‍ആന്‍ വായിക്കുന്ന ഫുജ്ജാറുകളില്‍ ഒരു വിഭാഗം എണ്ണപ്പെട്ട നാളുകള്‍ കൊണ്ട് ഉദ്ദേശിച്ചത് രണ്ടോ മൂന്നോ ദിവസങ്ങളാണെന്ന് പറഞ്ഞുകൊണ്ട് 2: 183-185 സൂക്തങ്ങളിലൂടെ വിശ്വാസികളോട് കല്‍പിച്ചിട്ടുള്ള റമളാനിലെ ഒരു മാസത്തിലെ വ്രതം രണ്ടോ മൂന്നോ ദിവസങ്ങളില്‍ അനുഷ്ഠിച്ചാല്‍ മതി എന്നാക്കി 15: 90 ല്‍ പറഞ്ഞ പ്രകാരം ഗ്രന്ഥത്തെ ഭാഗം വെച്ചവരായിരിക്കുകയാണ്. നിങ്ങള്‍ അല്ലാഹുവിനെക്കുറിച്ച് യഥാര്‍ത്ഥ ജ്ഞാനമില്ലാതെ സംസാരിച്ചിരുന്നതുകൊണ്ടും സൂക്തങ്ങളെത്തൊട്ട് എല്ലാം തികഞ്ഞവരാണെന്ന് അഹങ്കരിച്ചിരുന്നതുകൊണ്ടും നിങ്ങള്‍ ശിക്ഷ ആസ്വദിച്ചുകൊള്ളുക എന്നുപറഞ്ഞ് മരണസമയത്ത് അക്രമികളായ കപടവിശ്വാസികളെയും പ്രജ്ഞയറ്റ അനുയായികളെയും നരകക്കുണ്ഠത്തിലേക്ക് തള്ളിവിടുന്നതാണ് എന്ന് 6: 93-94 സൂക്തങ്ങളില്‍ പറഞ്ഞിട്ടുണ്ട്. 

അറിവില്ലാത്ത ഏതൊരു കാര്യവും ചോദിക്കേണ്ടത് എല്ലാ ഓരോ കാര്യവും വിശദീകരിച്ചിട്ടുള്ള അജയ്യഗ്രന്ഥമായ അദ്ദിക്റിന്‍റെ രചയിതാവായ ത്രികാലജ്ഞാനിയോടാണ് എന്ന് ഫുജ്ജാറുകള്‍ 16: 44; 21: 7; 25: 59 സൂക്തങ്ങളില്‍ വായിക്കുന്നവരാണ്. എന്നാല്‍ 7: 26 ല്‍ വിവരിച്ച പ്രകാരം അദ്ദിക്റിനെ തള്ളിപ്പറയുക എന്നത് ഭക്ഷണമാക്കിയ അവര്‍ അതിനെ സ്വയം ഉപയോഗപ്പെടുത്തുകയും മറ്റുള്ളവര്‍ക്ക് ഉപയോഗപ്പെടുത്താന്‍ നല്‍കുകയും ചെയ്യാതെ അവരെത്തന്നെ നശിപ്പിച്ചുകൊണ്ടിരിക്കുകയാണ്. അവരോട് 'ഓ ഭ്രാന്തന്മാരേ! നിങ്ങള്‍ വിശ്വാസികളുടെ ഭാഗത്തുനിന്ന് മാറി നില്‍ക്കുക. 'നിങ്ങള്‍ പിശാചിനെ സേവിക്കരുത്; നിങ്ങള്‍ എന്നെ മാത്രം സേവിക്കുക, അതാണ് നേരെച്ചൊവ്വെയുള്ള പാത' എന്ന് നിങ്ങളില്‍ നിന്ന് ഉടമ്പടി വാങ്ങിയിരുന്നില്ലേ എന്ന് വിധിദിവസം ചോദിക്കുന്ന രംഗം 36: 59-62 സൂക്തങ്ങളില്‍ മുന്നറിയിപ്പ് നല്‍കിയിട്ടുണ്ട്. 7: 172 ല്‍ പറഞ്ഞ സ്വര്‍ഗത്തില്‍ വെച്ച് എല്ലാവരും ചെയ്ത പ്രസ്തുത ഉടമ്പടി പാലിച്ച് ഇവിടെ ജീവിക്കാത്ത ഇക്കൂട്ടരെ ചിന്താശക്തി ഉപയോഗപ്പെടുത്താത്ത ബധിരരും ഊമകളുമായ ദുഷ്ടജീവികള്‍ എന്നാണ് 8: 22 ല്‍ വിശേഷിപ്പിച്ചിട്ടുള്ളത്. മാലിന്യമായ അവര്‍ക്ക് അദ്ദിക്ര്‍ മാലിന്യത്തിനുമേല്‍ മാലിന്യമല്ലാതെ വര്‍ദ്ധിപ്പിക്കുകയില്ല എന്ന് 9: 28, 95, 125 സൂക്തങ്ങളില്‍ അവര്‍ വായിച്ചിട്ടുണ്ട്. 2: 8-9, 26-27, 94-95; 9: 32-33 വിശദീകരണം നോക്കുക.