'രണ്ട് സമുദ്രങ്ങള്‍ക്കിടയിലെ കൂടിച്ചേരാത്ത ഒരു തടസ്സം' എന്ന് പറഞ്ഞതില്‍ 25: 53 ല്‍ പരാമര്‍ശിച്ച 'ഉപ്പുവെള്ളവും തെളിനീര്‍വെള്ളവും തമ്മില്‍ കൂടിക്കലരാത്ത കാണാത്ത ഒരു മറ' മാത്രമല്ല, സമുദ്രത്തിലുള്ള ഉഷ്ണജല പ്രവാഹങ്ങളും ശീതജല പ്രവാഹങ്ങളും തമ്മിലുള്ള കൂടിച്ചേരാത്ത വിധത്തി ലുള്ള തടസ്സം കൂടി ഉള്‍പ്പെടുന്നുണ്ട്. 'അവരില്‍ അധികപേരും അറിവില്ലാത്തവരാണ്' എന്ന് പറഞ്ഞത് എഴുത്തും വായനയും അറിയാത്തവരാണ് എന്നല്ല; മറിച്ച് യഥാര്‍ത്ഥ ജ്ഞാനമായ, അവരവരെ തിരിച്ചറിയാനുതകുന്ന, സ്രഷ്ടാവിനെ തിരിച്ചറിയാനുതകുന്ന, ജീവിതലക്ഷ്യം തിരിച്ചറിയാനുതകുന്ന ഹൃദയത്തിന്‍റെ ഭാഷയിലുള്ള വ്യക്തവും സ്പഷ്ടവുമായ വായനയായ അദ്ദിക്ര്‍ അറിയാത്തവരാണ് എന്നാണ്. അതുതന്നെയാണ് 33: 72 ല്‍ അമാനത്തായ അദ്ദിക്ര്‍ ഏറ്റെടുത്ത മനുഷ്യന്‍ വിഡ്ഢിയും അക്രമിയുമാണ് എന്ന് പറഞ്ഞതിന്‍റെ വിവക്ഷയും. അവര്‍ ആത്മാവിനോട് അക്രമം കാണിച്ചവരാണെന്ന് 35: 32 ലും പറഞ്ഞിട്ടുണ്ട്. 8: 48; 23: 113; 28: 57 വിശദീകരണം നോക്കുക.