ഇവിടെ പരാമര്‍ശിച്ച 'മിഹ്റാബ്' പള്ളിയില്‍ ഇമാം നില്‍ക്കുന്ന സ്ഥലമല്ല, മറിച്ച് പള്ളിയില്‍ നിന്ന് കുറച്ച് അകലെ ഏകാന്തമായി ഭജനമിരിക്കുന്നതിനുവേണ്ടി ഉയര്‍ന്ന തറയില്‍ പ്രത്യേകം നിര്‍മ്മിച്ചിട്ടുള്ള മുറിയാണ്. സകരിയ്യാ നബിക്കും പ്രത്യേകം മിഹ്റാബ് ഉണ്ടായിരുന്നതായി 19: 11 ല്‍ കാണാം. ആദ്യമായിട്ടാണ് ഒരു സ്ത്രീ പള്ളിയുടെ സേവനത്തിനുവേണ്ടി നിയോഗിക്കപ്പെടുന്നത്. അപ്പോള്‍ അവളുടെ രക്ഷാധികാരം ആര് ഏറ്റെടുക്കണമെന്ന് തര്‍ക്കമുണ്ടാവുകയും അവര്‍ അമ്പുകൊണ്ട് നറുക്കെടുക്കുകയും അങ്ങനെ വാര്‍ദ്ധക്യം പ്രാപിച്ച കുട്ടികളില്ലാത്ത സകരിയ്യാ നബിക്ക് അവളുടെ സംരക്ഷണാധികാരം ലഭിക്കുകയും ചെയ്തു. 5: 114 സൂക്തപ്രകാരം പ്രവാചകന്‍ ഈസായുടെ പ്രാര്‍ത്ഥനക്ക് ഉത്തരം നല്‍കിക്കൊണ്ട് ഭക്ഷണത്തളിക ഇറക്കുന്നതിനുമുമ്പായി അദ്ദേഹത്തിന്‍റെ മാതാവായ മര്‍യമിന് അല്ലാഹു അദൃശ്യമായ നിലയില്‍ ഭക്ഷണവിഭവങ്ങള്‍ നല്‍കിയിട്ടുണ്ടായിരുന്നു എന്ന് ഈ സൂക്തം പഠിപ്പിക്കുന്നു. അതുവഴി അല്ലാഹു അവന്‍ ഉദ്ദേശിക്കുന്നവര്‍ക്ക് കാര്യകാരണബന്ധത്തിന് അതീതമായി കണക്കില്ലാതെ ഭക്ഷണം നല്‍കാന്‍ കഴിവുള്ളവന്‍ തന്നെയാണെന്ന് വിശ്വാസികളെ പഠിപ്പിക്കുകയും ചെയ്യുന്നു. മര്‍യമിന് കാര്യകാരണബന്ധത്തിന് അതീതമായി ഭക്ഷണം ലഭിക്കുന്നത് കണ്ടപ്പോഴാണ് തനിക്കൊരു സന്താനത്തെ നല്‍കാനും അല്ലാഹുവിന് കഴിയുമെന്ന പ്രതീക്ഷ സകരിയ്യാ നബിക്ക് ഉണ്ടായതും തുടര്‍ന്ന് അദ്ദേഹം അതിനായി പ്രാര്‍ത്ഥിക്കുന്നതും. 2: 260; 3: 26-27, 44 വിശദീകരണം നോക്കുക.