അദ്ദിക്ർ

ശാപപ്രാര്‍ത്ഥന (മുബാഹല) എന്നുപറഞ്ഞാല്‍ അവരവര്‍ പറയുന്നത് തെറ്റാണെങ്കില്‍ അവരവരുടെമേല്‍ അല്ലാഹുവിന്‍റെ ശാപം ഉണ്ടാകട്ടെ എന്ന് അല്ലാഹുവിന്‍റെ കാര്യത്തില്‍ അല്ലെങ്കില്‍ ഗ്രന്ഥത്തിന്‍റെ കാര്യത്തില്‍ ഭിന്നിപ്പിലായ വിഭാഗങ്ങള്‍ ഒരുമിച്ചുകൂടി സ്വയം പ്രാര്‍ത്ഥിക്കലാണ്. ഈ സൂക്തം അനുസരിച്ച് സത്യം മനസ്സിലാക്കിയ ശേഷം മനഃസാക്ഷിക്ക് വിരുദ്ധമായി വിശ്വാസികളോട് തര്‍ക്കിക്കാന്‍ വരുന്നവരോട് വാദപ്രതിവാദമില്ലെന്നും പകരം മുബാഹല മാത്രമാണുള്ളതെന്നും മനസ്സിലാക്കാവുന്നതാണ്. വിശ്വാസികളുടെ സംഘമുള്ളപ്പോള്‍ മാത്രമാണ് ശാപപ്രാര്‍ത്ഥന പറഞ്ഞിട്ടുള്ളത്. ഗ്രന്ഥം മൂടിവെക്കുന്ന കുഫ്ഫാറുകളോടും വികലമാക്കി സംസാരിക്കുന്ന കപടവിശ്വാസികളോടും അദ്ദിക്ര്‍ കൊണ്ട് ജിഹാദ് ചെയ്യാനാണ് 9: 73; 25: 52; 66: 9 എന്നീ സൂക്തങ്ങളിലൂടെ വിശ്വാസി ഇന്ന് കല്‍പിക്കപ്പെട്ടിട്ടുള്ളത്. കപടവിശ്വാസികളോടും അവരുടെ അനുയായികളോടും 'നിങ്ങള്‍ ഇവിടെ കുറച്ചുകാലം സുഖിക്കുക, നിശ്ചയം നിങ്ങളുടെ മടക്കം നരകത്തിലേക്കാണ്' എന്ന് പറയാനും 14: 30 ലൂടെ ഇന്ന് വിശ്വാസി കല്‍പിക്കപ്പെട്ടിട്ടുണ്ട്. എന്നാല്‍ പ്രവാചകന്‍റെ തന്നെ സമുദായത്തില്‍ പെട്ട ഇതര ജനവിഭാഗങ്ങള്‍ക്ക് സത്യം മനസ്സിലാക്കിക്കൊടുക്കാന്‍ വേണ്ടി ഏറ്റവും നല്ലതുകൊണ്ട് (അദ്ദിക്ര്‍ കൊണ്ട്) വിശ്വാസികള്‍ക്ക് സംവാദത്തില്‍ ഏര്‍പ്പെടാവുന്നതാണ് എന്ന് 29: 46 ല്‍ പറഞ്ഞിട്ടുണ്ട്.

അറിവില്‍ നിന്ന് നിനക്ക് വന്നുകിട്ടിയതിന് ശേഷം എന്നതിലെ 'അറിവ്' അദ്ദിക്റാണ്. 22: 8; 31: 20 സൂക്തങ്ങളില്‍ ജനങ്ങളില്‍ യാതൊരു അറിവും സന്മാര്‍ഗവും വെളിച്ചം നല്‍കുന്ന ഗ്രന്ഥവുമില്ലാതെ അല്ലാഹുവിന്‍റെ കാര്യത്തില്‍ തര്‍ക്കിക്കുന്നവരുണ്ട് എന്ന് പറഞ്ഞതിലെ അറിവ്, സന്മാര്‍ഗം, വെളിച്ചം നല്‍കുന്ന ഗ്രന്ഥം എന്നിവ കൊണ്ടെല്ലാം ഉദ്ദേശിക്കുന്നത് അദ്ദിക്ര്‍ മാത്രമാണ്. 25: 58 ലെ ത്രികാലജ്ഞാനിയില്‍ നിന്നുള്ള ത്രികാലജ്ഞാനവും 41: 41-43 സൂക്തങ്ങളില്‍ പറഞ്ഞ അജയ്യഗ്രന്ഥവുമായ അദ്ദിക്റിന്‍റെ രചയിതാവാണ് 25: 59 ല്‍ പറഞ്ഞ ത്രികാലജ്ഞാനി. അറിവില്ലാത്ത കാര്യങ്ങള്‍ ത്രികാലജ്ഞാനമായ അദ്ദിക്റിന്‍റെ രചയിതാവിനോട് ചോദിക്കാനാണ് 16: 43; 21: 7 സൂക്തങ്ങളിലൂടെ ഏവരോടും കല്‍പിച്ചിട്ടുള്ളത്. 2: 120-121, 145-146, 165-167 വിശദീകരണം നോക്കുക.