അദ്ദിക്ർ

അനുസരണം മാത്രം സ്വഭാവമായിട്ടുള്ള കുറ്റം ചെയ്യാത്ത മലക്കുകളോ ഈസാ അടക്കമുള്ള പ്രവാചകന്മാരോ അല്ലാഹുവിന് അടിമപ്പെടുന്നതിലോ അവനെ സേവിച്ചുകൊണ്ടിരിക്കുന്നതിലോ കുറച്ചില്‍ കാണുന്നവരല്ലെന്നാണ് സൂക്തം പറയുന്നത്. അവനെ സേവിച്ചുകൊണ്ടിരിക്കുന്നതില്‍ കുറച്ചില്‍ കാണുന്നത് കാഫിറായ പിശാചും അദ്ദിക്റിന് വിരുദ്ധമായി അവനെ സേവിക്കുകയും സഹായിക്കുകയും ചെയ്തുകൊണ്ടിരിക്കുന്ന 1: 7 ല്‍ വിവരിച്ച അല്ലാഹുവിന്‍റെ കോപം വര്‍ഷിക്കപ്പെട്ട കപടവിശ്വാസികളും അവരുടെ വഴിപിഴച്ച അനുയായികളുമടങ്ങിയ ഫുജ്ജാറുകളുമാണ്. 19: 92 ല്‍, നിഷ്പക്ഷവാന് ഒരു സന്താനത്തെ തെരഞ്ഞെടുക്കല്‍ യോജിച്ചതല്ല തന്നെ എന്നും; 19: 93 ല്‍, ആകാശഭൂമികളിലുള്ള എല്ലാ ഒന്നും നിഷ്പക്ഷവാന് അടിമയായിട്ടല്ലാതെ വരുന്നില്ല എന്നും പറഞ്ഞിട്ടുണ്ട്. 19: 94-95 സൂക്തങ്ങളില്‍, അവരുടെയെല്ലാം എണ്ണവും അവസ്ഥകളും കണക്കാക്കി നിജപ്പെടുത്തിവെച്ചിട്ടുണ്ടെന്നും എല്ലാവരും വിധിദിവസം ഒറ്റക്കൊറ്റക്കായി വിചാരണക്കായി വരുമെന്നും പറഞ്ഞിട്ടുണ്ട്. 40: 60 ല്‍, നിങ്ങളുടെ നാഥന്‍ പറയുന്നു: നിങ്ങള്‍ എന്നെ വിളിച്ച് പ്രാര്‍ത്ഥിക്കുവീന്‍, എന്നാല്‍ ഞാന്‍ നിങ്ങള്‍ക്ക് ഉത്തരം നല്‍കാം; നിശ്ചയം ആരാണോ എന്നെ വിളിച്ച് പ്രാര്‍ത്ഥിക്കാതെ അഹങ്കരിക്കുന്നത്, അവര്‍ ഹീനരായി നരകക്കുണ്ഠത്തില്‍ പ്രവേശിപ്പിക്കപ്പെടുക തന്നെ ചെയ്യും എന്ന് പറഞ്ഞിട്ടുണ്ട്. എന്നാല്‍ പ്രാര്‍ത്ഥന ആത്മാവുകൊണ്ടായിരിക്കണം. ആത്മാവ് പങ്കെടുക്കാതെ നാവുകൊണ്ട് അറബി ഖുര്‍ആന്‍ വായിക്കുന്ന ഫുജ്ജാറുകള്‍ നടത്തുന്ന പ്രാര്‍ത്ഥന 2: 186 ല്‍ വിവരിച്ച പ്രകാരം വഴികേടല്ലാതെ വര്‍ദ്ധിപ്പിക്കുകയില്ല. വ്യക്തിജീവിതത്തിലും കുടുംബജീവിതത്തിലും സമൂഹജീവിതത്തിലും അദ്ദിക്ര്‍ കൊണ്ട് വിധി കല്‍പിക്കാത്ത കാഫിറുകളും അക്രമികളും തെമ്മാടികളും ഭ്രാന്തന്മാരുമായ ഫുജ്ജാറുകള്‍ നരകക്കുണ്ഠത്തില്‍ വെച്ച് പരസ്പരം തര്‍ക്കിക്കുന്ന, കുറ്റപ്പെടുത്തുന്ന, ശപിക്കുന്ന രംഗം 2: 165-167 സൂക്തങ്ങളില്‍ വിവരിച്ചിട്ടുണ്ട്. 1: 3-4; 4: 42; 8: 22 വിശദീകരണം നോക്കുക.