അദ്ദിക്ർ

വിശ്വാസികളെ വിളിച്ച് ഹുദൈബിയാ കരാറിലെ വ്യവസ്ഥകള്‍ മാത്രമല്ല, എല്ലാ കരാറുകളും നിങ്ങള്‍ പൂര്‍ത്തിയാക്കണം എന്നാണ് കല്‍പിക്കുന്നത്. 23: 8; 70: 25-32 എന്നീ സൂക്തങ്ങളില്‍ വിജയം വരിക്കുന്ന വിശ്വാസികളുടെ സ്വഭാവം വിവരിച്ചുകൊണ്ട് അമാനത്തുകളും ഉടമ്പടികളും കരാറുകളുമെല്ലാം ഉത്തരവാദിത്തത്തോടെ പൂര്‍ത്തിയാക്കുന്നവരാണ് വിശ്വാസികള്‍ എന്ന് പറഞ്ഞിട്ടുണ്ട്. കപടവിശ്വാസികളുടെ പ്രത്യക്ഷലക്ഷണമായി പ്രപഞ്ചനാഥന്‍ പ്രവാചകനിലൂടെ പഠിപ്പിച്ച മൂന്ന് അടയാളങ്ങളിലൊന്ന് വാഗ്ദത്തം ചെയ്താല്‍ അത് പാലിക്കാതിരിക്കുക എന്നതാണ്. വായ പൊളിച്ചാല്‍ കളവ് പറയുക, വിശ്വസിച്ചാല്‍ വഞ്ചിക്കുക എന്നിവയാണ് മറ്റുരണ്ടെണ്ണം. അന്‍ആം എന്ന പദം കൊണ്ട് ഉദ്ദേശിക്കുന്നത് വളര്‍ത്തുമൃഗങ്ങളായ ആട്, മാട്, ഒട്ടകം എന്നിവയാണ്. എന്നാല്‍ ബഹീമത്തുല്‍ അന്‍ആമില്‍ ഇവയ്ക്ക് പുറമെ ഭക്ഷിക്കാവുന്ന മറ്റുമൃഗങ്ങളും (മുയല്‍, മാന്‍, കാട്ടി തുടങ്ങിയവ ഉദാഹരണം) ഉള്‍പ്പെടുന്നുണ്ട്. നിങ്ങളുടെമേല്‍ മുമ്പ് വിവരിച്ചുതന്നതൊഴികെ എന്ന് പറഞ്ഞത് 5: 3 ല്‍ നിഷിദ്ധമാണെന്ന് വിവരിച്ചിട്ടുള്ളവ ഒഴികെ എന്നാണ്. തേറ്റകളുള്ള മാംസഭുക്കുകളായ ഹിംസ്രജന്തുക്കളെയും വലിയ നഖമുള്ള പക്ഷികളെയും ഭക്ഷിക്കുന്നത് അനുവദനീയമല്ലെന്ന് പ്രപഞ്ചനാഥന്‍ അവന്‍റെ പ്രവാചകനിലൂടെ പഠിപ്പിച്ചിട്ടുണ്ട്. ഇഹ്റാമില്‍ പ്രവേശിച്ചതിനുശേഷവും (പ്രത്യേക സ്ഥലത്തുവെച്ച് തീര്‍ത്ഥാടനത്തിനുള്ള വസ്ത്രം ധരിച്ച ശേഷവും) ഹറം പരിധിക്കുള്ളില്‍ വെച്ചും വേട്ടയാടല്‍ നിഷിദ്ധമാണ്. 2: 78-79, 173 വിശദീകരണം നോക്കുക.