മക്കയില്‍ അടിച്ചമര്‍ത്തപ്പെട്ടിരുന്ന ബലഹീനന്‍മാരായ ഒരു ചെറിയ സംഘമായിരു ന്നു വിശ്വാസികള്‍. പ്രവാചകന്‍റെ ശക്തി ക്ഷയിപ്പിച്ച് അവരെ ഈ നാട്ടില്‍നിന്ന് പുറം തള്ളാന്‍ സാധിച്ചിരുന്നുവെങ്കില്‍ എന്ന് കാഫിറുകള്‍ ആഗ്രഹിച്ചിരുന്നു എന്ന് 17: 76 ല്‍ പറഞ്ഞിട്ടുണ്ട്. ജനങ്ങള്‍ തങ്ങളെ നിശ്ശേഷം നശിപ്പിച്ചുകളയുമെന്നും നാട്ടില്‍ നിന്ന് പിഴുതെറിയുമെന്നും വിശ്വാസികള്‍ ഭയപ്പെട്ടിരുന്നു. എന്നാല്‍ അതില്‍ നിന്നെല്ലാം അല്ലാഹു അവരെ രക്ഷപ്പെടുത്തി. അതുകൊണ്ട് അല്ലാഹുവിന്‍റെ അനുഗ്രഹങ്ങള്‍ക്ക് നന്ദിപ്രകടിപ്പിച്ചുകൊണ്ടും അല്ലാഹുവിനെ സ്മരിച്ചുകൊണ്ടും നിലകൊള്ളണമെന്നാണ് കല്‍പ്പിക്കുന്നത്. 3: 143-148 സൂക്തങ്ങളില്‍, എക്കാലത്തുമുള്ള വിശ്വാസികള്‍ തീക്ഷ്ണമായ പരീക്ഷണങ്ങള്‍ക്ക് വിധേയമായിട്ടുണ്ടെന്നും അപ്പോള്‍ അവര്‍ ബലഹീനത പ്രകടിപ്പിക്കുകയോ അസത്യത്തിന് മുമ്പില്‍ തലകുനിക്കുകയോ ചെയ്യാതെ ജീവിതലക്ഷ്യം മനസ്സിലാക്കി രക്തസാക്ഷിത്വം വരിച്ച് സ്വര്‍ഗത്തില്‍ പ്രവേശിക്കാന്‍ വെമ്പല്‍ കൊള്ളുകയാണുണ്ടായത് എന്നും ഓര്‍മ്മിപ്പിച്ചുകൊണ്ട് വിശ്വാസികളെ യുദ്ധത്തിന് പ്രേരിപ്പിച്ചിട്ടുണ്ട്. 

 ഇന്ന് വിശ്വാസികളുടെ ഒരു സംഘം ലോകത്തെവിടെയും ഇല്ലാത്തതിനാല്‍ നാഥന്‍റെ മാര്‍ഗത്തിലുള്ള യുദ്ധമോ വധമോ ഒന്നും തന്നെയില്ല. 7: 205-206 സൂക്തങ്ങളില്‍ വിവരിച്ച പ്രകാരമുള്ള പ്രാര്‍ത്ഥനാരീതിയും ജീവിതരീതിയും പിന്‍പറ്റാനാണ് ഇന്ന് ഒറ്റപ്പെട്ട വിശ്വാസി കല്‍പ്പിക്കപ്പെട്ടിട്ടുള്ളത്. 69: 51 ല്‍ പറഞ്ഞ ഉറപ്പുനല്‍കുന്ന സത്യമായ അദ്ദിക്റിനെ മുറുകെപ്പിടിച്ച് ജീവിക്കുന്ന വിശ്വാസി അറബി ഖുര്‍ആന്‍ വായിക്കുന്ന ഫുജ്ജാറുകളാല്‍ ബലഹീനനാക്കപ്പെടരുത് എന്ന് 30: 60 ല്‍ പറഞ്ഞിട്ടുണ്ട്. 3: 103; 7: 10; 28: 57 വിശദീകരണം നോക്കുക.