വിശ്വാസികളുടെ കാഴ്ചയില്‍ ശത്രുക്കളെ കുറച്ചുകാണിച്ചത് അവര്‍ക്ക് സ്ഥൈര്യവും ആത്മവിശ്വാസവും ലഭിക്കുന്നതിന് കാരണമായി. കാഫിറുകളുടെ കാഴ്ചയില്‍ വിശ്വാസികളെ കുറച്ച് കാണിക്കുകവഴി വിശ്വാസികളെ കാര്യമായെടുക്കാതെ ആലസ്യത്തോടുകൂടി നേരിടാന്‍ അവരെ പ്രേരിപ്പിച്ചു. ഫുജ്ജാറുകളുടെ പല പടപ്പാട്ടുകളിലും വര്‍ണ്ണിക്കുന്നതുപോലെ വിശ്വാസികളുടെ യുദ്ധനിപുണ്യവും ആയുധാഭ്യാസങ്ങളുമല്ല, അവരുടെ വിശ്വാസവും സ്ഥൈര്യവും അല്ലാഹുവിലുള്ള ഭരമേല്‍പിക്കലും അതുവഴിയുള്ള അല്ലാഹുവിന്‍റെ സഹായവുമെല്ലാമാണ് ബദ്റിലെ വിജയത്തിന് കാരണമെന്ന് മനസ്സിലാക്കാം. സര്‍വ്വോപരി അല്ലാഹു സംഭവിപ്പിക്കാന്‍ നിശ്ചയിച്ച കാര്യം നടപ്പില്‍ വരുത്താന്‍ വേണ്ടി വിശ്വാസികളെ അതിലേക്ക് നയിച്ച് കൊണ്ടുവരികയായിരുന്നു. അങ്ങനെ യുദ്ധത്തിന്‍റെ പര്യവസാനം വിശ്വാസികള്‍ക്ക് അനുകൂലമായി അല്ലാഹു മാറ്റുകയാണുണ്ടായത്. 3: 130, 200; 5: 35, 90, 100; 7: 69; 22: 77; 24: 31; 62: 10 തുടങ്ങിയ സൂക്തങ്ങളെല്ലാം അവസാനിക്കുന്നത്, നിങ്ങള്‍ വിജയം വരിക്കുകതന്നെ വേണമെന്നതിനുവേണ്ടി എന്ന് പറഞ്ഞുകൊണ്ടാണ്. 2: 5, 250; 3: 190-191; 7: 157 വിശദീകരണം നോക്കുക.