മദീനയിലെ കപടവിശ്വാസികളും ഭൗതിക ജീവിതവിഭവങ്ങളില്‍ ആകൃഷ്ടരായി അല്ലാഹുവിനെ വിസ്മരിച്ചവരും ഹൃദയങ്ങളില്‍ സംശയമാകുന്ന രോഗം ബാധിച്ചവരും വിശ്വാസികളെ പരിഹസിച്ച് പറഞ്ഞതാണിത്. അതായത് സംഘബലവും പ്രതാപവുമില്ലാത്ത ഒരു കൊച്ചുസംഘം, പ്രതാപശാലികളും സംഘബലമുള്ളവരുമായ ഖുറൈശികളെപ്പോലുള്ള ഒരു മഹാശക്തിയെ നേരിടാന്‍ ഇറങ്ങുകവഴി അവര്‍ നാശത്തിലേക്ക് എടുത്തുചാടുകയാണെന്നും ഈ പോരാട്ടത്തില്‍ വിശ്വാസികളുടെ കഥ കഴിഞ്ഞതുതന്നെ! എന്നും അവര്‍ അനുമാനിച്ചു. മുഹമ്മദിന്‍റെ മായാജാലത്തിലും ഗ്രന്ഥത്തിന്‍റെ മാസ്മരശക്തിയിലും വഞ്ചിതരായി വിശ്വാസികള്‍ അവരെത്തന്നെ സ്വയം നശിപ്പിക്കുകയാണ് ചെയ്യുന്നതെന്ന് അവര്‍ ഉറപ്പിച്ചു. 

എല്ലാ പ്രവാചകന്മാരുടെയും കാലത്തുള്ള കപടവിശ്വാസികളും അവരുടെ അനുയായികളായ ഹൃദയത്തില്‍ രോഗമുള്ളവരും അവരുടെ സംഘബലത്തില്‍ അഹങ്കരിക്കുന്നവരും അദ്ദിക്റിനെ സത്യപ്പെടുത്തി ജീവിക്കുന്ന ആയിരത്തില്‍ ഒന്നായ വിശ്വാസിയെ കളവ് പറയുന്ന ഒറ്റയാന്‍ എന്ന് പരിഹസിക്കുന്നവരുമാണെന്ന് 19: 73-74; 54: 25; 72: 24; 83: 29 സൂക്തങ്ങളില്‍ പറഞ്ഞിട്ടുണ്ട്. ഇഹലോകത്തെന്നപോലെ പരലോകത്തും അവര്‍ തന്നെയായിരിക്കും ഉന്നതന്മാരും സ്വര്‍ഗാവകാശികളും എന്നാണവര്‍ കരുതുന്നത്. 15: 44 പ്രകാരം നരകക്കുണ്ഠത്തിന്‍റെ 7 വാതിലുകളില്‍ ഒന്നിലേക്ക് നിജപ്പെടുത്തിവെക്കപ്പെട്ട ഇത്തരം തെമ്മാടികള്‍ അദ്ദിക്ര്‍ ഉപയോഗപ്പെടുത്തുന്നില്ല എന്ന് മാത്രമല്ല, പ്രവാചകന്‍റെ സമുദായത്തില്‍ പെട്ട ഇതര ജനവിഭാഗങ്ങള്‍ക്ക് ഉപയോഗപ്പെടുത്താന്‍ അത് നല്‍കുന്നതിന് തടസ്സം നില്‍ക്കുന്നവരുമാണ്. അതുവഴി അവര്‍ അവരെത്തന്നെയല്ലാതെ നശിപ്പിക്കുന്നില്ല, എന്നാല്‍ അത് അവര്‍ തിരിച്ചറിയുന്നില്ല എന്ന് 6: 25-26 സൂക്തങ്ങളില്‍ വിവരിച്ചിട്ടുണ്ട്. 

48: 6 ല്‍, പ്രവാചകന്‍റെ കാലത്ത് വിശ്വാസികള്‍ക്ക് മക്കാവിജയം നല്‍കിയതും ഇനി ഈസാ രണ്ടാമത് വന്നശേഷം ലോകവിജയം നല്‍കുന്നതുമെല്ലാം കപടവിശ്വാസികളായ പുരുഷന്‍മാരെയും സ്ത്രീകളെയും അല്ലാഹുവിന്‍റെ അധികാരാവകാശങ്ങളില്‍ പങ്കുചേര്‍ക്കുന്ന പുരുഷന്‍മാരെയും സ്ത്രീകളെയും ശിക്ഷിക്കുന്നതിന് വേണ്ടിയാണ് -അവര്‍ അല്ലാഹുവിനെക്കുറിച്ച് ഏറ്റവും ദുഷിച്ച ചിന്ത വെച്ചുപുലര്‍ത്തുന്നവരാണ്, അവരുടെമേല്‍ ത ന്നെയാണ് ഏറ്റവും ദുഷിച്ച പരിണിതിയുള്ളത്- അല്ലാഹുവിന്‍റെ കോപം അവരുടെ മേല്‍ വര്‍ഷിക്കുകയും അവന്‍ അവരെ ശപിക്കുകയും അവര്‍ക്ക് നരകക്കുണ്ഠം ഒരുക്കിവെക്കുകയും ചെയ്തിരിക്കുന്നു, എത്ര മോശപ്പെട്ട മടക്കസ്ഥലം എന്ന് പറഞ്ഞിട്ടുണ്ട്. സൂക്തത്തില്‍ പറഞ്ഞ തങ്ങളുടെ ഹൃദയങ്ങളില്‍ സംശയമാകുന്ന രോഗമുള്ളവര്‍ 9: 68, 73; 66: 9 സൂക്തങ്ങളില്‍ പറഞ്ഞ കുഫ്ഫാറുകളും 33: 73; 48: 6; 98: 6 സൂക്തങ്ങളില്‍ പറഞ്ഞ അല്ലാഹുവിന്‍റെ അധികാരാവകാശങ്ങളില്‍ പങ്കുചേര്‍ക്കുന്ന മുശ്രിക്കുകളുമാണ്. 1: 7 ല്‍ പറഞ്ഞ വഴിപിഴച്ചവരും 4: 140; 33: 1, 48; 41: 29 സൂക്തങ്ങളില്‍ പറഞ്ഞ കാഫിറുകളുമാണ് അവര്‍. അറബി ഖുര്‍ആന്‍ വായിക്കുന്ന ഫുജ്ജാറുകളിലെ വിവിധ സംഘടനാനേതാക്കളും അവരെ അന്ധമായി പിന്‍പറ്റുന്ന അനുയായികളുമാണ് ഇന്ന് ഈ രണ്ടുകൂട്ടര്‍. അപ്പോള്‍ വിശ്വാസികള്‍ 1: 7 വായിക്കുമ്പോള്‍ ഈ രണ്ടുകൂട്ടരിലും ഉള്‍പ്പെടുത്തരുതേ എന്നാണ് ആത്മാവുകൊണ്ട് പ്രാര്‍ത്ഥിക്കേണ്ടത്. അദ്ദിക്റിനെ മൂടിവെച്ചുകൊണ്ട് മസീഹുദ്ദജ്ജാലിനെ ആനയിച്ചുകൊണ്ടിരിക്കുന്ന ഈ രണ്ടൂകൂട്ടരും ഈസാ രണ്ടാമത് വന്നാല്‍ വധിക്കപ്പെടുകയും 33: 60-61 സൂ ക്തങ്ങളുടെ കല്‍പന നടപ്പിലാക്കപ്പെടുകയും ചെയ്യും. 2: 165-167; 3: 154-156; 7: 176 വിശദീകരണം നോക്കുക.