അവര്‍ക്കെതിരില്‍ നിങ്ങള്‍ കഴിയുന്നത്ര ശക്തി സംഭരിക്കുകയും സുസജ്ജമായ കുതിരപ്പടയെ ഒരുക്കിനിര്‍ത്തുകയും ചെയ്യുവിന്‍, അതുവഴി അല്ലാഹുവിന്‍റെയും നിങ്ങളുടെയും ശത്രുക്കളെ ഭയപ്പെടുത്താം, അവരെക്കൂടാതെ ഇപ്പോള്‍ നിങ്ങള്‍ക്ക് അറിഞ്ഞുകൂടാത്തതും അല്ലാഹുവിന് അറിയുന്നതുമായ മറ്റു ശത്രുക്കളെയും; അല്ലാഹുവിന്‍റെ മാര്‍ഗത്തില്‍ നിങ്ങള്‍ ചെലവഴിക്കുന്നതെന്തും നിങ്ങളിലേക്ക് പൂര്‍ണ്ണമായി തിരിച്ചു നല്‍കപ്പെടുന്നതാകുന്നു, നിങ്ങള്‍ ഒരിക്കലും അനീതി കാണിക്കപ്പെടുന്നവരാവുകയില്ല.
17: 64 ല്‍, തന്‍റെ ശബ്ദം കൊണ്ടും കാലാള്‍പ്പട, കുതിരപ്പട എന്നിവ മനുഷ്യര്‍ക്കെതിരെ നയിച്ചുകൊണ്ടും അവരുടെ സമ്പത്തിലും സന്താനങ്ങളിലും പങ്കുചേര്‍ന്നുകൊണ്ടും അവരോട് മോഹനവാഗ്ദാനങ്ങള്‍ നല്‍കിക്കൊണ്ടും പിശാചിന് സാധിക്കുമെങ്കില്‍ മനുഷ്യരെ വഴിപിഴപ്പിക്കാമെന്ന് അല്ലാഹു പിശാചിന് വരം കൊടുത്തതായി പറഞ്ഞിട്ടുണ്ട്. എന്നാല്‍ അദ്ദിക്റിനെ മുറുകെപ്പിടിച്ച് നിലകൊള്ളുകയും നാഥനില്‍ ഭരമേല്‍പിക്കുകയും ചെയ്യുന്ന വിശ്വാസിയില്‍ പിശാചിന് യാതൊരു സ്വാധീനവുമില്ല എന്ന് 16: 98-99 സൂക്തങ്ങളില്‍ പറഞ്ഞിട്ടുണ്ട്. 2: 62; 3: 133-136; 8: 46 വിശദീകരണം നോക്കുക.