വിശ്വാസികള്‍ യുദ്ധത്തില്‍ വിജയിച്ചത് അവരുടെ സംഘബലം കൊണ്ടോ ആയുധബലം കൊണ്ടോ അല്ലെന്നും അല്ലാഹു അവരോടൊപ്പമുള്ളതിനാലാണെന്നും അതിനാല്‍ ജീവിതലക്ഷ്യം മനസ്സിലാക്കി ക്ഷമയോടെ നിലകൊള്ളുകയാണ് വേണ്ടതെന്നാണ് സൂക്തം പറയുന്നത്. ജീവിതലക്ഷ്യം ഗ്രഹിക്കാത്ത ജനത നരകക്കുണ്ഠത്തില്‍ കുത്തിനിറക്കപ്പെടാന്‍ വിധിക്കപ്പെട്ടവരാണെന്ന് 7: 179 ല്‍ പറഞ്ഞിട്ടുണ്ട്. ഗ്രന്ഥത്തിന്‍റെ ആശയം അറിഞ്ഞിട്ട് മൂടിവെക്കുന്ന കപടവിശ്വാസികളും അദ്ദിക്ര്‍ എന്ത്, എന്തിന്, എന്തുകൊണ്ട് എന്നൊന്നും മനസ്സിലാക്കാന്‍ അല്ലാഹു നല്‍കിയ ബുദ്ധിശക്തിയും കാഴ്ചയും കേള്‍വിയും ഉപയോഗപ്പെടുത്താത്ത പ്രജ്ഞയറ്റവരുമാണ് അവര്‍. കപടവിശ്വാസികളെക്കുറിച്ച് അവര്‍ യാഥാര്‍ത്ഥ്യം ഗ്രഹിക്കാത്തവരാണെന്ന് 63: 3 ലും; കപടവിശ്വാസികള്‍ അല്ലാഹുവിനേക്കാള്‍ ഭയപ്പെടുന്നത് വിശ്വാസികളെയാണെന്ന് 59: 13 ലും പറഞ്ഞിട്ടുണ്ട്. 2: 62; 3: 79-80; 6: 65 വിശദീകരണം നോക്കുക.