ബന്ധികളെ പിടിച്ചുകെട്ടുന്നതിനും പിഴ ഈടാക്കുന്നതിനും യുദ്ധമുതല്‍ വാരിക്കൂട്ടുന്നതിനും പ്രാധാന്യം കൊടുക്കരുതെന്ന് വിശ്വാസികളോട് ഉപദേശിച്ച ശേഷം ബന്ധികളോട് പറയാന്‍ വേണ്ടി അല്ലാഹു കല്‍പ്പിക്കുകയാണ്: നിങ്ങള്‍ ഈ സംഭവത്തില്‍ നിന്ന് പാഠമുള്‍ക്കൊള്ളുകയും അല്ലാഹുവിന്‍റെ സംഘത്തെ എതിര്‍ക്കുന്നത് നിര്‍ത്തുകയുമാണെങ്കില്‍ നിങ്ങളില്‍ നിന്ന് ഈടാക്കിയ പിഴക്കുപകരം അതിനേക്കാള്‍ ഉത്തമമായ നേട്ടം നിങ്ങള്‍ക്ക് ലഭിക്കുകയും നിങ്ങള്‍ ചെയ്ത കുറ്റങ്ങള്‍ക്ക് അത് പ്രായശ്ചിത്തമായി പരിഗണിക്കുകയും ചെയ്യുന്നതാണ്. 

അജയ്യനും യുക്തിജ്ഞാനിയുമായ അല്ലാഹുവിന്‍റെ അജയ്യവും യുക്തിനിര്‍ഭരവുമായ ഗ്രന്ഥത്തിന്‍റെ മൊത്തം ആശയം പിന്‍പറ്റുമ്പോള്‍ മാത്രമാണ് ഇഹലോകജീവിതം പരലോകത്തേക്കുള്ള കൃഷിയിടമായി മാറുകയും ജീവിതലക്ഷ്യം പൂവണിയുകയും ചെയ്യുക. അതുതന്നെയാണ് 'സന്‍മാര്‍ഗമായ അദ്ദിക്ര്‍ പിന്‍പറ്റിയാല്‍ നിങ്ങളുടെമേല്‍ ഭയപ്പെടാനും നിങ്ങള്‍ക്ക് ദുഃഖിക്കാനും ഇടവരികയില്ല' എന്ന് പറഞ്ഞതിന്‍റെ പൊരുളും. ഇന്ന് ഇത്തരം സൂക്തങ്ങളെല്ലാം വായിക്കുന്നത് തെമ്മാടികളായ കപടവിശ്വാസികളും അവരെ അന്ധമായി പിന്‍പറ്റുന്ന അനുയായികളുമടങ്ങിയ ഫുജ്ജാറുകളാണ്. എന്നാല്‍ അദ്ദിക്റിനെ തള്ളിപ്പറയുക എന്നത് ഭക്ഷണമാക്കിയിരിക്കുന്ന അവരുടെ പ്രവര്‍ത്തനങ്ങളൊന്നും തന്നെ 2: 186 ല്‍ വിവരിച്ച പ്രകാരം സ്വീകരിക്കപ്പെടുകയില്ല എന്ന് മാത്രമല്ല, 9: 67-68; 25: 65-66; 48: 6; 98: 6; 107: 4-5 തുടങ്ങിയ സൂക്തങ്ങളില്‍ വിവരിച്ച പ്രകാരം അവര്‍ക്ക് പിഴയായി നരകക്കുണ്ഠമാണ് ലഭിക്കുക. 2: 159-162; 4: 145-147 വിശദീകരണം നോക്കുക.