തബൂക്ക് യുദ്ധകാലത്ത് കപടവിശ്വാസികള്‍ മദീനയില്‍ നിര്‍മിച്ച ഉപദ്രവകരമായ പള്ളിയെക്കുറിച്ചാണ് സൂക്തത്തില്‍ പരാമര്‍ശിക്കുന്നത്. വിശ്വാസികള്‍ക്കിടയില്‍ കാപട്യവും നിഷേധവും ഭിന്നിപ്പും സൃഷ്ടിക്കുന്നതിനും ഖസ്റജ് ഗോത്രത്തില്‍ പെട്ട ക്രൈസ്തവ പുരോഹിതനായ അബുആമിറിന് താവളമൊരുക്കുന്നതിനും വേണ്ടിയായിരുന്നു അവര്‍ ആ പള്ളി നിര്‍മിച്ചത്. പ്രവാചകന്‍ മദീനയില്‍ വന്ന സമയത്ത് അവിടെയുണ്ടായിരുന്ന വേദപണ്ഡിതന്‍മാരില്‍ പ്രധാനിയായിരുന്ന ഇയാള്‍ക്ക് മദീനയിലും പരിസരത്തും നല്ല സ്വാധീനമുണ്ടായിരുന്നു. അവനായിരുന്നു പ്രവാചകനും വിശ്വാസികള്‍ക്കുമെതിരായി യുദ്ധം ചെയ്യുന്നതിന് മക്കാമുശ്രിക്കുകളെ ഇളക്കിവിട്ടിരുന്നത്. അഹ്സാബ് യുദ്ധത്തിനുശേഷം ഇനി പ്രവാചകനെയും വിശ്വാസികളെയും അറബികളില്‍ ആര്‍ക്കും തന്നെ പരാജയപ്പെടുത്താന്‍ സാധ്യമല്ലെന്ന വസ്തുത മനസ്സിലാക്കിയ അബുആമിര്‍ റോമില്‍ പോയി റോമന്‍ ചക്രവര്‍ത്തിയെ മദീനക്കെതിരെ തിരിച്ചുവിടാന്‍ ശ്രമിക്കുകയും, തല്‍ഫലമായി മൂന്ന് ലക്ഷം വരുന്ന റോമന്‍ സൈന്യം മദീനയെ ആക്രമിക്കാനായി പുറപ്പെടുകയുമുണ്ടായി. ഈ വാര്‍ത്ത കേട്ടപ്പോള്‍ പ്രവാചകനും 30,000 വരുന്ന അനുയായികളും അവരെ പ്രതിരോധിക്കാന്‍ വേണ്ടി തബൂക്കിലേക്ക് പോവുകയുണ്ടായി. ആ സമയത്താണ് മദീനയിലെ കപടവിശ്വാസികള്‍ ഉപദ്രവകരമായ പള്ളി (മസ്ജിദുള്ളിറാര്‍) നിര്‍മിച്ചത്. പ്രവാചകന്‍റെ പടപ്പുറപ്പാടില്‍ ഉള്‍ഭയമുണ്ടായ റോമന്‍ സൈന്യം തബൂക്കിലേക്ക് വരാതെ പിന്‍തിരിഞ്ഞുപോവുകയും പ്രവാചകനും അനുയായികളും ഒരു മാസത്തോളം തബൂക്കില്‍ തമ്പടിച്ചതിന് ശേഷം മദീനയിലേക്ക് തിരിച്ചുപോരുകയുമാണുണ്ടായത്. മദീനയിലെത്തുന്നതിനുമുമ്പെ പ്രസ്തുതപള്ളി പൊളിച്ചുകളയാന്‍ നാഥന്‍റെ നിര്‍ദ്ദേശപ്രകാരം പ്രവാചകന്‍ കല്‍പിക്കുകയുണ്ടായി. 

 3: 7 ല്‍ വിവരിച്ച പ്രകാരം പ്രവാചകന്‍റെ വിയോഗത്തിന് 30 വര്‍ഷങ്ങള്‍ക്കുശേഷം ലോകത്തെവിടെയും വിശ്വാസികളുടെ ഒരു സംഘം ഉണ്ടായിട്ടില്ല. അറബി ഖുര്‍ആന്‍ വായിക്കുന്ന ഫുജ്ജാറുകള്‍ 30: 31-32 സൂക്തങ്ങളുടെ കല്‍പനക്ക് വിരുദ്ധമായി വിവിധ വിഭാഗങ്ങളായി പിരിയുകയും ഓരോ വിഭാഗവും പ്രത്യേകം പ്രത്യേകം പള്ളികള്‍ നിര്‍മിക്കുന്നതില്‍ വ്യാപൃതരാവുകയുമാണുണ്ടായത്. അങ്ങനെ നാഥന്‍ അവന്‍റെ പ്രവാചകനിലൂടെ 2: 114-115 സൂക്തങ്ങളുടെ വിശദീകരണമായി പഠിപ്പിച്ച 'അവരുടെ പള്ളികള്‍ വലിയ കോണ്‍ക്രീറ്റ് സൗധങ്ങളായിരിക്കും, എന്നാല്‍ അവ സന്മാര്‍ഗമായ അദ്ദിക്റില്‍ നിന്ന് വ്യതിചലിച്ചതായിരിക്കും' എന്ന സത്യം ഇക്കാലത്തുള്ള ഫുജ്ജാറുകളുടെ പള്ളികളുടെ കാര്യത്തില്‍ പുലര്‍ന്നിരിക്കുകയാണ്. അതുകൊണ്ട് ഇന്ന് അദ്ദിക്റിനെ സത്യപ്പെടുത്തി ജീവിക്കുന്ന ഒറ്റപ്പെട്ട വിശ്വാസിക്ക് 48: 6 ല്‍ വിവരിച്ച കപടവിശ്വാസികളുടെയും അവരുടെ അനുയായികളായ മുശ്രിക്കുകളുടെയും നേതൃത്വത്തിലുള്ള പള്ളികളില്‍ പ്രവേശിക്കല്‍ അനുവദനീയമല്ല. നാഥനെ നിഷ്പക്ഷവാനായി അംഗീകരിക്കുന്ന വിശ്വാസി 'ഞങ്ങളുടെ നാഥാ, ഞങ്ങളെ നീ സത്യമായ അദ്ദിക്റിനെ പിന്‍പറ്റുകയും സത്യപ്പെടുത്തുകയും ചെയ്യുന്ന സൂക്ഷ്മാലുക്കള്‍ക്ക് നേതാക്കളാക്കേണമേ' എന്ന് 25: 74 പ്രകാരം പ്രാര്‍ത്ഥിക്കുന്നവനായതിനാല്‍ കാഫിറായ ഒരാളെയും തന്‍റെ പ്രാര്‍ത്ഥനയില്‍ ഉള്‍പ്പെടുത്താനോ അവര്‍ക്ക് നേതൃത്വം നല്‍കാനോ പാടില്ലതന്നെ. അവന്‍ തന്‍റെ കുടുംബാംഗങ്ങളോടൊപ്പം പ്രഭാതങ്ങളിലും പ്രദോഷങ്ങളിലും അദ്ദിക്ര്‍ വായിക്കുകയും 7: 205-206 സൂക്തങ്ങളില്‍ വിവരിച്ച പ്രകാരം തിലാവത്തിന്‍റെ സുദീര്‍ഘമായ ഒറ്റ സാഷ്ടാംഗപ്രണാമം നിര്‍വഹിക്കുകയുമാണ് ചെയ്യുക. 2: 62, 140; 9: 17-19 വിശദീകരണം നോക്കുക.