കരാര്‍ പാലിക്കുകയും വിശ്വാസികള്‍ക്കെതിരായി അവരുടെ ശത്രുക്കളെ സഹായിക്കാതിരിക്കുകയും ഇങ്ങോട്ട് ഉപദ്രവത്തിന് വരാതിരിക്കുകയും ചെയ്യുന്നവരോട് പ്രതികാരത്തിനും വിദ്വേഷത്തിനും യാതൊരു നീതിയുമില്ല എന്നാണ് ഈ സൂക്തത്തിലൂടെ അല്ലാഹു വിശ്വാസികളെ പഠിപ്പിക്കുന്നത്. ദീനിന്‍റെ കാര്യത്തില്‍ നിങ്ങളോട് യുദ്ധം ചെയ്യാത്തവരോടും നിങ്ങളുടെ വീടുകളില്‍ നിന്ന് നിങ്ങളെ പുറത്താക്കാത്തവരോടും നന്മയിലും നീതിയിലും വര്‍ത്തിക്കുന്നത് അല്ലാഹു നിങ്ങളോട് വിരോധിക്കുന്നില്ല, നിശ്ചയം അല്ലാഹു നീതി പാലിക്കുന്നവരെ ഇഷ്ടപ്പെടുന്നു എന്ന് 60: 8 ലും; നിശ്ചയം അല്ലാഹു നിങ്ങളോട് സഹവസിക്കല്‍ വിരോധിച്ചിട്ടുള്ളത് ദീനില്‍ നിങ്ങളോട് യുദ്ധം ചെയ്യുന്ന കപടവിശ്വാസികളോടും നിങ്ങളെ നിങ്ങളുടെ വീടുകളില്‍ നിന്ന് പുറത്താക്കുന്നവരോടും നിങ്ങളെ പുറത്താക്കാന്‍ വേണ്ടി മറ്റുള്ളവരെ സഹായിച്ചവരോടും മാത്രമാണ്. നിങ്ങളില്‍ ആരെങ്കിലും അത്തരക്കാരെ മിത്രങ്ങളായി തെരഞ്ഞെടുത്താല്‍ അപ്പോള്‍ അക്കൂട്ടര്‍ തന്നെയാണ് അക്രമികള്‍ എന്ന് 60: 9 ലും പറഞ്ഞിട്ടുണ്ട്. 2: 138; 4: 135; 6: 89-90; 7: 40-41 വിശദീകരണം നോക്കുക.