സുശക്തമായ റോമാസാമ്രാജ്യത്തോടാണ് ഏറ്റുമുട്ടാന്‍ പോകുന്നത് എന്നതും അതികഠിനമായ ഉഷ്ണകാലത്ത് വിദൂര പ്രദേശമായ തബൂക്കിലേക്കുള്ള മരുഭൂയാത്ര വളരെ ദുഷ്കരമാണെന്നതും സര്‍വോപരി മദീനയില്‍ വിളവെടുപ്പ് സമയം ആസന്നമായിരിക്കുന്നു എന്നതും മദീനയിലെ കപടവിശ്വാസികളില്‍ യുദ്ധത്തിന് പുറപ്പെടാന്‍ വൈമനസ്യം സൃഷ്ടിച്ചു. വിശ്വാസികള്‍ പരലോക ജീവിതത്തിനാണ് പ്രാധാന്യം കൊടുക്കുകയെങ്കില്‍ കപടവിശ്വാസികള്‍ ഐഹിക ജീവിതത്തിനാണ് പ്രാധാന്യം കൊടുക്കുക. 'അവര്‍ അവരെത്തന്നെയാണ് നശിപ്പിച്ചിരിക്കുന്നത്' എന്ന് പറഞ്ഞതിന്‍റെ വിവക്ഷ, സ്വര്‍ഗം അല്ലെങ്കില്‍ നരകം അവരവര്‍ ഇഹലോകത്ത് വെച്ചുതന്നെ സമ്പാദിക്കേണ്ടതാണെന്ന ജീവിതലക്ഷ്യം മറന്നുകൊണ്ട് ഭൗതിക ജീവിതത്തിന് പ്രാധാന്യം കൊടുക്കുകവഴി അവര്‍ സ്വന്തത്തെ നശിപ്പിച്ചിരിക്കുന്നു എന്നാണ്. 9: 107 ഉം 63: 1 ഉം അവസാനിക്കുന്നത് 'നിശ്ചയം കപടവിശ്വാസികള്‍ കളവ് പറയുന്നവര്‍ തന്നെയാണ് എന്ന് അല്ലാഹു സാക്ഷ്യം വഹിക്കുന്നു' എന്ന് പറഞ്ഞുകൊണ്ടാണ്. 

 പ്രപഞ്ചം അതിന്‍റെ സന്തുലനത്തില്‍ നിലനിര്‍ത്താനുള്ള ത്രാസ്സും അമാനത്തുമായ അദ്ദിക്ര്‍ ലോകരിലേക്ക് എത്തിക്കുന്നതിന് വേണ്ടിയുള്ള എല്ലാ ശ്രമങ്ങളും നടത്തലാണ് ഇന്ന് ഏറ്റവും വലിയ ജിഹാദ്. അങ്ങനെ ചെയ്യാത്ത അറബി ഖുര്‍ആന്‍ വായിക്കുന്ന എല്ലാ ഫുജ്ജാറുകളും പ്രപഞ്ചം നശിപ്പിച്ചതിനുള്ള പാപഭാരം വഹിച്ചുകൊണ്ട് നരകക്കുണ്ഠത്തില്‍ പോകേണ്ടിവരുമെന്ന് 6: 26; 20: 99-101 എന്നീ സൂക്തങ്ങളില്‍ പറഞ്ഞിട്ടുണ്ട്. അല്ലാഹു കൊന്നുകളഞ്ഞ ഇന്നത്തെ കപടവിശ്വാസികള്‍ 9: 32 ല്‍ വിവരിച്ച പ്രകാരം അല്ലാഹുവിന്‍റെ സന്ദേശമായ അദ്ദിക്ര്‍ ഊതിക്കെടുത്താന്‍ ശ്രമിക്കുകയും ഒറ്റപ്പെട്ട വിശ്വാസികള്‍ അതിനെ വ്യാപിപ്പിക്കാന്‍ ശ്രമിക്കുമ്പോള്‍ അതിനെ തടസ്സപ്പെടുത്തുകയും ചെയ്യുകവഴി ലോകം നശിച്ചുകാണാന്‍ ധൃതിപ്പെടുന്ന കെട്ടജനതയായി മാറിയിരിക്കുന്നു. 3: 186-187; 4: 91; 9: 23-24 വിശദീകരണം നോക്കുക.