കപടവിശ്വാസികള്‍ തന്നെയാണ് തെമ്മാടികള്‍ എന്ന് 9: 67 ലും; തെമ്മാടികളുടെമേല്‍ ഇനി അവര്‍ വിശ്വസിക്കുകയില്ല എന്ന നിന്‍റെ നാഥന്‍റെ വചനം ബാധകമായി എന്ന് 10: 33 ലും; കാഫിറുകളായവരുടെ മേല്‍ നിന്‍റെ നാഥന്‍റെ ശിക്ഷാവചനം സത്യമായി പുലര്‍ന്നിരിക്കുന്നു, അവര്‍ വിശ്വസിക്കുകയില്ല, അക്കൂട്ടര്‍ തന്നെയാണ് നരകത്തിന്‍റെ സഹവാസികള്‍ എന്ന് 40: 6 ലും പറഞ്ഞിട്ടുണ്ട്. നാഥന്‍റെ സൂക്തങ്ങള്‍ തെമ്മാടികളല്ലാതെ മൂടിവെക്കുകയില്ല എന്ന് 2: 99 ലും; തെമ്മാടികളെ അല്ലാഹു കൊന്നുകളഞ്ഞിട്ടുണ്ടെന്ന് 63: 4 ലും പറഞ്ഞിട്ടുണ്ട്. അതിനാല്‍ അവര്‍ ഇനി എന്തെങ്കിലും ചെലവഴിച്ചാല്‍ തന്നെ അവരില്‍ നിന്ന് അത് സ്വീകരിക്കപ്പെടുകയില്ല എന്നാണ് പറയുന്നത്. അദ്ദിക്ര്‍ കൊണ്ട് വ്യക്തിജീവിതത്തിലും കുടുംബജീവിതത്തിലും സമൂഹജീവിതത്തിലും വിധികല്‍പിക്കാത്തവര്‍ ആരോ, അക്കൂട്ടര്‍ തന്നെയാണ് കാഫിറുകളും അക്രമികളും തെമ്മാടികളുമെന്ന് 5: 44, 45, 47 സൂക്തങ്ങളിലും, അറബി ഖുര്‍ആന്‍ വായിക്കുന്ന ഫുജ്ജാറുകള്‍ അദ്ദിക്റിനെത്തൊട്ട് ബധിരരും ഊമരും അന്ധരുമായി കാക്കകാരണവന്മാരെ അന്ധമായി പിന്‍പറ്റിക്കൊണ്ടിരിക്കുന്നവരായതിനാല്‍ അവരെ അദ്ദിക്ര്‍ കൊണ്ട് ഉണര്‍ത്താന്‍ സാധ്യമല്ല എന്ന് 2: 18, 170-171 സൂക്തങ്ങളിലും പറഞ്ഞിട്ടുണ്ട്. അവര്‍ അവരെത്തന്നെ മറക്കുകവഴി അല്ലാഹുവിനെ മറന്നവരാണെന്ന് 59: 19 ലും; അപ്പോള്‍ അവര്‍ ലക്ഷ്യബോധം നഷ്ടപ്പെട്ട പിശാച് പിന്തുടരപ്പെട്ടവരാണെന്ന് 7: 175 ലും പറഞ്ഞിട്ടുണ്ട്. അവരെ ദുനിയാവിന്‍റെ പട്ടിയോട് 7: 176 ല്‍ ഉപമിച്ചിട്ടുണ്ട്. പ്രാര്‍ത്ഥനക്ക് ഉത്തരം ലഭിക്കുന്നതിനും കര്‍മങ്ങള്‍ സ്വീകരിക്കപ്പെടുന്നതിനും രണ്ട് ഉപാധികള്‍ 2: 186 ല്‍ വിവരിച്ചിട്ടുണ്ട്. 2: 26-27; 9: 24, 28 വിശദീകരണം നോക്കുക.