അല്ലാഹുവിനെ മറന്നുകൊണ്ട് ജീവിച്ച കപടവിശ്വാസികള്‍ക്ക് വേണ്ടി പൊറുക്കലിനെത്തേടാനോ അവരുടെമേല്‍ മയ്യിത്ത് നമസ്കരിക്കരിക്കാനോ പാടില്ലെന്ന് 9: 84 ല്‍ പ്രവാചകനോടും വിശ്വാസികളോടും കല്‍പിച്ചിട്ടുണ്ട്. 9: 73 ല്‍, സര്‍വകഴിവുകളും ഉപയോഗിച്ച് അവരോട് ജിഹാദ് ചെയ്യണമെന്നും അവരോട് കോപം പുലര്‍ത്തണമെന്നും അവരുടെ മടക്കം നരകത്തിലേക്കാണെന്നും പറഞ്ഞിട്ടുണ്ട്. എഴുപതില്‍ കൂടുതല്‍ പ്രാവശ്യം പൊറുക്കലിനെത്തേടിയാല്‍ അല്ലാഹു അവര്‍ക്ക് പൊറുത്തുകൊടുക്കുമായിരുന്നുവെങ്കില്‍ ഞാന്‍ പൊറുക്കലിനെത്തേടുമായിരുന്നു എന്ന് പ്രവാചകന്‍ പറഞ്ഞപ്പോഴാണ്: കപടവിശ്വാസികളുടെ കാര്യത്തില്‍ നീ പൊറുക്കലിനെത്തേടുന്നതും അല്ലെങ്കില്‍ നീ പൊറുക്കലിനെത്തേടാതിരിക്കുന്നതും സമമാണ്, അല്ലാഹു അവര്‍ക്ക് പൊറുത്തുകൊടുക്കുകയില്ല, നിശ്ചയം തെമ്മാടികളായ ഒരു ജനതയെ അല്ലാഹു സന്‍മാര്‍ഗത്തിലേക്ക് നയിക്കുകയില്ല തന്നെ എന്ന 63: 6 അവതരിച്ചത്. 10: 33 ല്‍, തെമ്മാടികളായ ഇത്തരം കപടവിശ്വാസികളുടെമേല്‍, നിശ്ചയം ഇനി അവര്‍ വിശ്വാസികളാവുകയില്ല എന്ന നിന്‍റെ നാഥന്‍റെ വചനം ബാധകമായിക്കഴിഞ്ഞു എന്ന് പറഞ്ഞിട്ടുണ്ട്. പ്രപഞ്ചം അതിന്‍റെ സന്തുലനത്തില്‍ നിലനിര്‍ത്താനുള്ള ത്രാസും അമാനത്തുമായ അദ്ദിക്റിനെ വിസ്മരിക്കുകയും അതേ സമയം ജാഢയായി ജനമധ്യത്തില്‍ ഇസ്ലാമിന്‍റെയും ഗ്രന്ഥത്തിന്‍റെയും വക്താക്കളായി ചമയുകയും എന്നാല്‍ അതിനെ ജനങ്ങളില്‍ എത്തിക്കുന്നതിന് തടസ്സം നില്‍ക്കുകയും ചെയ്യുന്നതുകൊണ്ടാണ് അവര്‍ക്കുവേണ്ടി പൊറുക്കലിനെത്തേടാന്‍ പാടില്ല എന്ന് പറഞ്ഞത്. 47: 19; 71: 28 സൂക്തങ്ങളില്‍ പറഞ്ഞ പ്രകാരം വിശ്വാസികളായ പുരുഷന്മാര്‍ക്കും സ്ത്രീകള്‍ക്കും വേണ്ടി മാത്രം പൊറുക്കലിനെത്തേടാനാണ് പ്രവാചകനും പ്രവാചകനെ പിന്‍പറ്റുന്ന വിശ്വാസിക്കും അനുവാദമുള്ളത്. ആത്മാവുകൊണ്ട് നാഥനെ വാഴ്ത്തുകയും കീര്‍ത്തനം ചെയ്യുകയും ചെയ്യുന്നതിന് ജീവജാലങ്ങള്‍ക്ക് അവസരം നഷ്ടപ്പെടുത്തിയതിനുള്ള പാപഭാരം വഹിച്ചുകൊണ്ട് കപടവിശ്വാസികള്‍ 4: 145; 6: 26; 20: 99-101; 33: 72-73 സൂക്തങ്ങളില്‍ പറഞ്ഞ പ്രകാരം വിചാരണയില്ലാതെ നരകത്തിന്‍റെ അടിത്തട്ടിലേക്ക് പോകേണ്ടവരാണ്. 2: 6-7; 7: 175-176; 9: 23-24 വിശദീകരണം നോക്കുക.