തബൂക്ക് യുദ്ധസന്നാഹത്തിനുവേണ്ടി പണം ചെലവഴിക്കാന്‍ ആവശ്യപ്പെട്ടപ്പോള്‍ പണക്കാരായ കപടവിശ്വാസികള്‍ ജീവിതലക്ഷ്യം നഷ്ടപ്പെട്ടവരായതുകാരണം അതില്‍ നിന്ന് ഒഴിഞ്ഞുമാറുകയും മറ്റുള്ളവരെക്കൂടി പിന്തിരിപ്പിക്കുകയുമാണ് ചെയ്തിരുന്നത്. എന്നാല്‍ വിശ്വാസികള്‍ നിര്‍ബന്ധമോ പരപ്രേരണയോ കൂടാതെ പണം ചെലവഴിക്കാന്‍ മുന്നോട്ട് വന്നതോടെ ഇവര്‍ ഓരോ കുത്തുവാക്കുകള്‍ പറയാന്‍ തുടങ്ങി. കഴിവുള്ളവര്‍ തങ്ങളുടെ കഴിവിനൊത്തോ അല്ലെങ്കില്‍ അതില്‍ കൂടുതലോ നല്‍കിയാല്‍ അത് പേരെടുക്കാനാണെന്നും, സാമ്പത്തികമായി കഴിവ് കുറഞ്ഞവര്‍ അധ്വാനിച്ചുണ്ടാക്കിയ ചെറിയ ചെറിയ സംഖ്യകള്‍ നല്‍കുന്നത് കാണുമ്പോള്‍ 'ഇതും കൊണ്ടാണ് മുഹമ്മദ് റോമക്കാരെ കീഴടക്കാന്‍ പോകുന്നത്' എന്നുമാണവര്‍ പരിഹസിച്ചിരുന്നത്. 

ഗ്രന്ഥത്തിന്‍റെ ആശയം ഉയര്‍ത്തപ്പെട്ടുകൊണ്ടിരിക്കുന്ന ഇക്കാലത്ത് അദ്ദിക്ര്‍ മനസ്സിലാക്കുകയും പ്രചരിപ്പിക്കുകയും ചെയ്യുന്നതിനുള്ള സംരംഭങ്ങളില്‍ പണം ചിലവഴിക്കല്‍ മാത്രമാണുള്ളത്. എന്നാല്‍ ജീവിതലക്ഷ്യം നഷ്ടപ്പെട്ട പിശുക്കന്മാരായ ഇന്നത്തെ കപടവിശ്വാസികള്‍ പ്രസ്തുത ആവശ്യത്തിന് യാതൊന്നും ചെലവഴിക്കുകയില്ല. ഇനി അഥവാ വല്ലതും നല്‍കിയാല്‍ തന്നെ, അത് അവരുടെ മറ്റുള്ള കാര്യങ്ങള്‍ക്ക് ചെലവഴിക്കുന്നത്ര പ്രാധാന്യം നല്‍കാതെ എന്തെങ്കിലും നക്കാപിച്ച മാത്രമായിരിക്കും. ദരിദ്രരായ ആളുകള്‍ സംഭാവന ചെയ്ത പണം കൈകാര്യം ചെയ്യുന്നതിനുവേണ്ടി അതിനിടയില്‍ നുഴഞ്ഞു കയറി സ്ഥാനമാനങ്ങള്‍ പിടിച്ചടക്കാന്‍ അവര്‍ മിടുക്ക് കാണിക്കുന്നതാണ്. വിശ്വാസികള്‍ ക്ലേശിച്ച് പണം നല്‍കിയത് അദ്ദിക്ര്‍ ലോകരില്‍ പ്രചരിപ്പിക്കാനാണെങ്കില്‍ അല്ലാഹുവിന്‍റെ ശത്രുക്കളായ കപടവിശ്വാസികള്‍ ആ സംരംഭത്തെ ലക്ഷ്യം തെറ്റിച്ച് നശിപ്പിക്കുന്നതും അവര്‍ക്ക് പേരെടുക്കുന്നതിനും അവരുടെ സ്ഥാനമാനങ്ങള്‍ നിലനിര്‍ത്തുന്നതിനും വേണ്ടിയുള്ള പ്രവര്‍ത്തനങ്ങള്‍ക്ക് പണം വിനിയോഗിക്കുകയുമാണ് ചെയ്യുക. ഇത്തരം കപടന്‍മാരെ അവരുടെ സമ്പത്ത് കൊണ്ടും സന്താനങ്ങള്‍ കൊണ്ടും ഇഹത്തില്‍ തന്നെ ശിക്ഷിക്കണമെന്നും അവര്‍ കാഫിറായിക്കൊണ്ട് ജീവന്‍ വെടിയണമെന്നുമാണ് അല്ലാഹു ഉദ്ദേശിക്കുന്നത് എന്ന് 9: 55, 85 സൂക്തങ്ങളില്‍ പറഞ്ഞിട്ടുണ്ട്. 9: 32-33, 67-68 വിശദീകരണം നോക്കുക.