അപ്പോള്‍ അവര്‍ കുറച്ച് ചിരിച്ചുകൊള്ളട്ടെ, അധികം കരഞ്ഞുകൊള്ളുകയും ചെയ്യട്ടെ -അവര്‍ സമ്പാദിച്ചുകൊണ്ടിരിക്കുന്നതിന് പ്രതിഫലമായി!
ലക്ഷ്യബോധമില്ലാത്ത കപടവിശ്വാസികളും പ്രജ്ഞയറ്റ അവരുടെ അനുയായികളും 2: 113; 6: 159 സൂക്തങ്ങളില്‍ വിവരിച്ച പ്രകാരം വിവിധ സംഘടനകളായി പിരിഞ്ഞ് ഓരോ സംഘടനയും അവരുടെ പക്കലുള്ളതില്‍ നിഗളിച്ചുല്ലസിച്ച് ജീവിക്കുന്നവരാണ്. 2: 186; 18: 100-101 സൂക്തങ്ങളില്‍ വിവരിച്ച പ്രകാരം സ്വീകരിക്കപ്പെടാത്ത അവരുടെ കര്‍മ്മങ്ങള്‍ വഴി നരകക്കുണ്ഠമാണ് അവര്‍ സമ്പാദിച്ചുകൊണ്ടിരിക്കുന്നത്. കപടവിശ്വാസികളും അവരെ അന്ധമായി പിന്‍പറ്റുന്ന അനുയായികളും ദിക്റാ എന്ന ഗ്രന്ഥത്തില്‍ നിന്ന് അകന്ന് ജീവിക്കുന്നതിനാല്‍ വമ്പിച്ച തീയില്‍ വേവിക്കപ്പെടാനുള്ള ഹതഭാഗ്യരാണെന്ന് 87: 9-12 സൂക്തങ്ങളില്‍ പറഞ്ഞിട്ടുണ്ട്. 98: 6 ല്‍ പറഞ്ഞ വേദത്തിന്‍റെ ആളുകള്‍ പ്രവാചകന്‍റെ കാലത്ത് ജൂതന്മാരും ക്രൈസ്തവരും, മുശ്രിക്കുകള്‍ മക്കാമുശ്രിക്കുകളുമായിരുന്നു. എന്നാല്‍ ഇന്ന് ഈ വിഭാഗക്കാരെല്ലാം അറബി ഖുര്‍ആന്‍ വായിക്കുന്ന ഫുജ്ജാറുകളില്‍ നിന്നുള്ളവര്‍ മാത്രമാണ്. നിഷ്പക്ഷവാനായ നാഥന്‍ ഒരാളെയും സ്വര്‍ഗത്തിലേക്കോ നരകത്തിലേക്കോ ആക്കുന്നില്ല. എന്നാല്‍ ഫുജ്ജാറുകള്‍ വായിച്ച, തൊട്ട, കേട്ട ഗ്രന്ഥം അവര്‍ക്കെതിരെ വാദിച്ച് സാക്ഷ്യം വഹിച്ച് അവരെ നരകക്കുണ്ഠത്തിലേക്ക് തള്ളിവിടുകയാണ് ചെയ്യുക. 98: 6 ല്‍, ഫുജ്ജാറുകളെ കരയിലെ ദുഷ്ടജീവികള്‍ എന്നാണ് വിശേഷിപ്പിച്ചിട്ടുള്ളതെങ്കില്‍, 8: 22; 25: 34 സൂക്തങ്ങളില്‍ ചിന്താശക്തി ഉപയോഗപ്പെടുത്താത്ത, ആത്മാവിനെ പരിഗണിക്കാത്ത, ശരീരപൂജകരായ അവരെ 1000 സമുദായങ്ങളില്‍ പെട്ട ജീവികളില്‍ വെച്ച് ഏറ്റവും ദുഷിച്ചവര്‍ എന്നാണ് വിശേഷിപ്പിച്ചിട്ടുള്ളത്. 2: 94-96 സൂക്തങ്ങളില്‍ വിവരിച്ച പ്രകാരം അവര്‍ ഇവിടെ സമ്പാദിച്ചിട്ടുള്ളത് നരകക്കുണ്ഠമായതിനാല്‍ അവര്‍ മരിക്കാന്‍ ഭയമുള്ളവരാണ്. 53: 59-62 സൂക്തങ്ങളിലൂടെ ഫുജ്ജാറുകളോട്: നാഥന്‍റെ സംസാരമായ അദ്ദിക്റിന്‍റെ കാര്യത്തിലാണോ നിങ്ങള്‍ അത്ഭുതപ്പെടുന്നത്? നിങ്ങള്‍ ചിരിച്ചുകൊണ്ടിരിക്കുന്നുവോ? കരയുന്നില്ലെയോ? നിങ്ങള്‍ പാട്ടും പാടി നടക്കുകയാണോ? അങ്ങനെയല്ല, നിങ്ങള്‍ സാഷ്ടാംഗം പ്രണമിക്കുകയും നാഥനെ സേവിക്കുകയും ചെയ്യുക എന്ന് പറഞ്ഞിട്ടുണ്ട്. എന്നാല്‍ 7: 205-206 സൂക്തങ്ങളില്‍ വിവരിച്ച പ്രകാരം അദ്ദിക്റിനെ സത്യപ്പെടുത്തി ജീവിക്കുന്ന ആയിരത്തില്‍ ഒന്നായ വിശ്വാസി മാത്രമേ നാഥനെ അനുസരിച്ചുകൊണ്ട്, എല്ലാ പ്രവാചകന്മാരും നബിമാരും മാര്‍ഗദര്‍ശനം ചെയ്യപ്പെട്ടവരും നിര്‍വ്വഹിച്ച് പോന്ന, 19: 58 ല്‍ പറഞ്ഞ കരഞ്ഞുകൊണ്ടുള്ള തിലാവത്തിന്‍റെ സാഷ്ടാംഗപ്രണാമം നിര്‍വ്വഹിക്കുകയുള്ളൂ. 3: 181-182; 4: 78-79; 9: 50 വിശദീകരണം നോക്കുക.