ആരോഗ്യവും സമ്പത്തുമെല്ലാം ഉണ്ടായിട്ടും പ്രവാചകനോടൊപ്പം യുദ്ധത്തില്‍ പങ്കെടുക്കാതെ വീട്ടിലിരിക്കുന്ന അബലകളോടും കുട്ടികളോടുമൊപ്പം ഇരിക്കാന്‍ അനുവാദം ചോദിക്കുകയാണ് അന്നത്തെ കപടവിശ്വാസികള്‍ ചെയ്തത്. നാഥനില്‍ നിന്നുള്ള ഏറ്റവും നല്ല വിശദീകരണമായ അദ്ദിക്ര്‍ ഇന്ന് ഒരു ഗ്രന്ഥമായി രൂപപ്പെട്ടിരിക്കെ കപടവിശ്വാസികള്‍ അതിനെ അറിഞ്ഞുകൊണ്ട് മൂടിവെക്കുന്നവരാണ്. 6: 25-26 സൂക്തങ്ങളില്‍ വിവരിച്ച പ്രകാരം അദ്ദിക്ര്‍ മനസ്സിലാകാതിരിക്കാന്‍ അവരുടെ ഹൃദയങ്ങളുടെ മേലും ചെവികളുടെ മേലും ഒരു അടപ്പിട്ടിരിക്കുകയാണ്. 7: 175-176 സൂക്തങ്ങളില്‍ കപടവിശ്വാസികളെയും അവരുടെ അനുയായികളെയും ഉപദ്രവിച്ചാലുമില്ലെങ്കിലും മാറ്റം വരാത്ത നായയോട് ഉപമിച്ചിട്ടുണ്ട്. തന്‍റെ നാഥന്‍റെ സൂക്തങ്ങള്‍ കൊണ്ട് ഉണര്‍ത്തപ്പെടുകയും എന്നിട്ട് അവയെ അവഗണിക്കുകയും തന്‍റെ കൈകള്‍ ഒരുക്കിവെച്ചത് മറന്നുകളയുകയും ചെയ്തവനെക്കാള്‍ ഏറ്റവും വലിയ അക്രമി ആരാണുള്ളത്? നിശ്ചയം! നാം അത്തരക്കാരുടെ ഹൃദയങ്ങളില്‍ അത് മനസ്സിലാകാതിരിക്കാന്‍ ഒരു മൂടിയിട്ടിരിക്കുന്നു, അവരുടെ ചെവികളിലും ഒരു അടപ്പുണ്ട്. നീ അവരെ സന്മാര്‍ഗത്തിലേക്ക് വിളിച്ചാല്‍ അവര്‍ ഒരിക്കലും സന്മാര്‍ഗം പ്രാപിക്കുകയില്ലതന്നെ എന്ന് 18: 57 ല്‍ പറഞ്ഞിട്ടുണ്ട്. 2: 18, 99; 6: 65; 7: 179; 8: 22, 55 വിശദീകരണം നോക്കുക.