അവന്‍ പറഞ്ഞു: ഇത് എന്‍റെ നാഥനില്‍ നിന്നുള്ള ഒരു കാരുണ്യം തന്നെയാകുന്നു, അങ്ങനെ എന്‍റെ നാഥന്‍റെ വാഗ്ദത്തസമയം വന്നുകഴിഞ്ഞാല്‍ അതിനെ പൊടിപടലമാക്കി നിരപ്പാക്കുന്നതാകുന്നു, എന്‍റെ നാഥന്‍റെ വാഗ്ദത്തം സത്യമായി പുലരാനുള്ളത് തന്നെയുമാകുന്നു.
ദുല്‍ഖര്‍നൈനി വിശ്വാസിയായതിനാല്‍ മലക്കായ 'ഖിള്റി'നെപ്പോലെത്തന്നെ എല്ലാ കാര്യങ്ങളും അല്ലാഹുവിലേക്ക് ചേര്‍ത്തിപ്പറയുന്നതായി കാണാം. എത്ര ബലമുള്ള മതില്‍ക്കെട്ടാണെങ്കിലും അന്ത്യമണിക്കൂര്‍ നടപ്പിലാകുമ്പോള്‍ അതെല്ലാം പൊടിപടലമായി തരിപ്പണമാകുന്നതാണ്. അന്ത്യമണി ക്കൂറാവട്ടെ, സത്യമായി പുലരുന്ന വാഗ്ദത്തം തന്നെയാണ്. ഇത്തരം മതില്‍ക്കെട്ടുകൊണ്ടുള്ള തടസ്സങ്ങളെല്ലാം വിമാനത്തിന്‍റെ കണ്ടുപിടുത്തത്തോടുകൂടി നീങ്ങിയിരിക്കുന്നു. യഅ്ജൂജ്-മഅ്ജൂജിന് മാത്രമല്ല, ഏത് നാട്ടുകാര്‍ക്കും ഇന്ന് എവിടെയും വിമാനത്തില്‍ യഥേഷ്ടം സഞ്ചരിക്കാവുന്നതും എവിടെയും മിസൈലുകള്‍, ഡ്രോണുകള്‍ എന്നിവകൊണ്ട് അക്രമിക്കാവുന്നതുമാണ്.