എന്നാല്‍ അവര്‍ അതിനെ വെട്ടിക്കൊന്നു; അപ്പോള്‍ അവന്‍ പറഞ്ഞു: നിങ്ങള്‍ നിങ്ങളുടെ വീടുകളില്‍ മൂന്ന് നാളുകള്‍ കൂടി സുഖിച്ചുകൊള്ളുക, അത് ഒട്ടും കളവാക്കപ്പെടാത്ത ഒരു വാഗ്ദത്തം തന്നെയാകുന്നു.
അല്ലാഹുവിന്‍റെ ഒട്ടകത്തെ ഭൂമിയില്‍ മേയുന്നതില്‍ നിന്ന് നിങ്ങള്‍ തടയരുത്, അങ്ങനെ ചെയ്താല്‍ നിങ്ങളെ കഠിനമായ ശിക്ഷ പിടികൂടുമെന്ന സാലിഹ് നബിയുടെ താക്കീത് അവര്‍ പരിഗണിച്ചതേയില്ല. ഒട്ടകത്തെ അവര്‍ ധിക്കാരപൂര്‍വം വെട്ടിക്കൊന്നപ്പോള്‍ 'നിങ്ങളുടെ വീടുകളില്‍ മൂന്ന് നാളുകള്‍ കൂടി സുഖിച്ചുകൊള്ളുക, അതിനുശേഷം നിങ്ങളെ ശിക്ഷ പിടികൂടുമെന്ന്' പറഞ്ഞപ്പോള്‍ അവരുടെ പരിഹാസം ഇരട്ടിക്കുകയാണുണ്ടായത്. സമൂദ് ജനത അവരിലേക്ക് അയക്കപ്പെട്ട പ്രവാചകനെ ധാര്‍ഷ്ട്യപൂര്‍വം കളവാക്കി തള്ളിപ്പറയുകയുണ്ടായി, അവരിലെ ഏറ്റവും വലിയ ദുഷ്ടനെ അവര്‍ നിയോഗിച്ച സന്ദര്‍ഭം; അപ്പോള്‍ അല്ലാഹുവിന്‍റെ പ്രവാചകന്‍ അവരോട് പറഞ്ഞു: അല്ലാഹുവിന്‍റെ ഒട്ടകത്തെയും അതിന്‍റെ കുടിവെള്ളത്തെയും നിങ്ങള്‍ സൂക്ഷി ക്കുക; എന്നാല്‍ അവര്‍ അവനെ കളവാക്കി തള്ളിപ്പറയുകയും അതിനെ അറുക്കുകയും ചെയ്തു, അപ്പോള്‍ അവരുടെ നാഥന്‍ അവരുടെ കുറ്റങ്ങള്‍ കാരണം ഘോരമായ ശിക്ഷയിറക്കി. അങ്ങനെ ആ പ്രദേശത്തെ ഒന്നടങ്കം നിരപ്പാക്കി, അവന്‍ അതിന്‍റെ പരിണിതി ഭയപ്പെട്ടതുമില്ല എന്ന് 91: 11-15 സൂക്തങ്ങളില്‍ പറഞ്ഞിട്ടുണ്ട്.