മുന്‍കാലങ്ങളെപ്പോലെ ഇന്ന് കന്നുകാലികളെ വ്യാപകമായി വളര്‍ത്തുന്നില്ല. അവയെ വളര്‍ത്തുന്നവര്‍ക്ക് മേയാന്‍ വിടുമ്പോഴും വൈകുന്നേരം തൊഴുത്തിലേക്ക് കൊണ്ടുവരുമ്പോഴുമെല്ലാം കണ്‍കുളിര്‍മയും ആനന്ദവും അവയുടെ ഉടമസ്ഥതയില്‍ അഭിമാനവും തോന്നുന്നതാണ്. കാളവണ്ടി ഉപയോഗിച്ചിരുന്ന കാലത്ത് ചരക്കുകള്‍ ഉദ്ദേശിച്ച സ്ഥലത്ത് എത്തിക്കണമല്ലോ എന്ന ആവശ്യകത മാനിച്ച് കാളകള്‍ക്ക് നല്ല ഭക്ഷണവും പരിപാലനവും നല്‍കി വളര്‍ത്തിയിരുന്നു. എന്നാല്‍ ഇന്ന് അവയുടെ സ്ഥാനത്ത്  പ്രസ്തുത ആവശ്യത്തിന് മോട്ടോര്‍ വാഹനങ്ങള്‍ നല്‍കി അല്ലാഹു മനുഷ്യരെ അനുഗ്രഹിച്ചപ്പോള്‍ അവ ആധുനിക മനുഷ്യരെ ആകര്‍ഷിക്കുകയും കന്നുകാലികളെ വളര്‍ത്തുന്നതില്‍ നിന്നും പ്രകൃതിയുമായി താദാത്മ്യം പ്രാപിക്കുന്നതില്‍ നിന്നും അവര്‍ അകലുകയും ചെയ്തു. യാന്ത്രിക യുഗത്തിലുള്ള മനുഷ്യര്‍ ഇന്ന് പ്രകൃതിയില്‍ നിന്ന് അകലുകയും കൃത്രിമമായ ജീവിതശൈലികളിലേക്ക് ആകര്‍ഷിക്കപ്പെടുകയും അവരുടെ യഥാര്‍ത്ഥ ജീവിതലക്ഷ്യം മറന്നവരായി മാറുകയും ഭൂമിയെയും അതുവഴി പ്രപഞ്ചത്തെത്തന്നെയും നശിപ്പിച്ചുകൊണ്ടിരിക്കുകയുമാണ്. ഗ്രന്ഥത്തിന്‍റെ ആത്മാവിനെ മൂടിവെക്കുന്ന കപടവിശ്വാസികളാണ് അതില്‍ മുന്‍പന്തിയിലുള്ളത്. അതുവഴി അന്ത്യപ്രവാചകന്‍റെ ജനതയുടെ അധഃപതനം തന്നെയാണ് ലോകത്തിന്‍റെ അവസാനത്തിന് കാരണമാവുക എന്ന അല്ലാഹുവിന്‍റെ ചര്യ നടപ്പിലായിക്കൊണ്ടിരിക്കുകയാണ്. ഇന്ന് ഗ്രന്ഥം കിട്ടാത്ത, തൊടാത്ത ജനവിഭാഗങ്ങളാണ് കന്നുകാലികളെ വളര്‍ത്തുന്നതിലും പ്രകൃതിജീവിതം നയിക്കുന്നതിലും അറബി ഖുര്‍ആന്‍ വായിക്കുന്ന ഫുജ്ജാറുകളെക്കാള്‍ മുന്നിലുള്ളത്. 3: 196-197; 10: 57-58; 15: 87-88; 30: 41 വിശദീകരണം നോക്കുക.