അബൂജാഹിലിന്‍റെ നേതൃത്വത്തില്‍ മക്കയില്‍ നിന്നും വരുന്ന ആയിരത്തോളം വരുന്ന ഖുറൈശി സൈന്യത്തോട് ഏറ്റുമുട്ടാന്‍ വേണ്ടി വിശ്വാസികള്‍ നേരത്തെ മദീനയില്‍ വെച്ചുതന്നെ തീരുമാനിച്ചിരുന്നുവെങ്കില്‍ അത് നടക്കുമായിരുന്നില്ല, കാരണം അത്രവലിയ സംഘത്തോട് ഏറ്റുമുട്ടാന്‍ അവര്‍ക്ക് ശക്തിയും സംഘബലവുമുണ്ടായിരുന്നില്ല. അതാണ് പരസ്പരം ഏറ്റുമുട്ടാന്‍ നിങ്ങള്‍ നേരത്തെ തീരുമാനിച്ചതായിരുന്നുവെങ്കില്‍ തീര്‍ച്ചയായും ഈ സന്ദര്‍ഭത്തില്‍ നിങ്ങള്‍ പിന്‍മാറിക്കളയുകതന്നെ ചെയ്യുമായിരുന്നു എന്ന് പറഞ്ഞത്. യുദ്ധനിപുണരും ആയുധധാരികളുമായ ഖുറൈശി സൈന്യത്തെ യുദ്ധനൈപുണ്യമില്ലാത്തവരും താരതമ്യേന ആയുധങ്ങള്‍ കുറഞ്ഞവരും ബലഹീനരുമായ ചെറിയ സംഘത്തെക്കൊണ്ട് ഏറ്റുമുട്ടിപ്പിച്ച് ചെറിയ സംഘത്തെക്കൊണ്ട് വലിയ സംഘത്തെ പരാജയപ്പെടുത്തുകയാണ് അല്ലാഹു ചെയ്തത്. അല്ലാഹുവിങ്കല്‍ നേരത്തെ തീരുമാനിച്ചുറപ്പിച്ചുവെച്ച ഒരു കാര്യമായതിനാല്‍ ബദ്റില്‍ നശിക്കേണ്ടവരെ വ്യക്തമായ തെളിവോടുകൂടി നശിപ്പിക്കുന്നതിനും ജീവിക്കേണ്ടവരെ വ്യക്തമായ തെളിവോടുകൂടി ജീവിപ്പിക്കുന്നതിനും വേണ്ടി, 'അല്ലാഹുവിന്‍റെ സംഘം എത്ര ചെറുതാണെങ്കിലും അവര്‍ തന്നെയാണ് വിജയിക്കുക' എന്ന് തെളിയിക്കുകയാണ് ചെയ്തത്. യുദ്ധം മാത്രല്ല, എല്ലാ സംഭവങ്ങളും നടപ്പിലാക്കുന്നത് വിശ്വാസികളെയും കപടവിശ്വാസികളെയും വേര്‍തിരിക്കുന്നതിന് വേണ്ടിയാണ്. അതാകട്ടെ ആകാശഭൂമികള്‍ സൃഷ്ടിക്കുന്നതിന് മുമ്പുതന്നെ തീരുമാനിച്ച് ഗ്രന്ഥത്തില്‍ രേഖപ്പെടുത്തിയതനുസരിച്ചുമാണ്. 2: 157; 3: 173; 6: 59; 8: 7-8 വിശദീകരണം നോക്കുക.