അല്ലാഹു ഒരു സന്താനത്തെ തെരഞ്ഞെടുത്തിരിക്കുന്നു എന്ന് പറഞ്ഞിരുന്ന പ്രവാചകന്‍റെ കാലത്തെ ജൂത-ക്രൈസ്തവരെയും മക്കാമുശ്രിക്കുകളെയും മുന്നറിയിപ്പ് നല്‍കുന്നതിന് വേണ്ടിയും കൂടിയാണ് അന്ത്യപ്രവാചകന്‍റെമേല്‍ വേദഗ്രന്ഥത്തിന്‍റെ പരിസമാപ്തി രൂപമായ അദ്ദിക്ര്‍ ഇറക്കിയിട്ടുള്ളത്. മുമ്പുവന്ന പ്രവാചകനായ ഈസായെ അല്ലാഹു രണ്ടാം ആകാശത്തേക്ക് ഉയര്‍ത്തി രക്ഷപ്പെടുത്തിയതോടെ നിന്നുപോയ ദിവ്യസന്ദേശം വീണ്ടും തുടരുന്നത് അന്ത്യപ്രവാചകനായ മുഹമ്മദിലൂടെയാണ്. ഈസാക്ക് ശേഷം അദ്ദേഹത്തിന്‍റെ ജനത പില്‍ക്കാലത്ത് ഈസായെ ദൈവപുത്രനായി തെരഞ്ഞെടുത്ത് വ്യതിചലിച്ചുപോവുകയുണ്ടായി. ഈസാ ഒരിക്കലും ഞാന്‍ ദൈവത്തിന്‍റെ പുത്രനാണെന്നോ, അല്ലാഹുവിന്‍റെ മുമ്പില്‍ ഞാന്‍ ജനങ്ങളുടെ പാപങ്ങള്‍ ഏറ്റെടുക്കുമെന്നോ പഠിപ്പിച്ചിട്ടില്ല. അതെല്ലാം പില്‍ക്കാലത്ത് അദ്ദേഹത്തിന്‍റെ മേല്‍ കെട്ടിച്ചമക്കപ്പെട്ടുണ്ടാക്കിയതാണ്. യഥാര്‍ത്ഥത്തില്‍ അന്ത്യപ്രവാചകനായ മുഹമ്മദിന്‍റെ കാലത്തെ ക്രൈസ്തവര്‍ക്കും അവരുടെ പിതാക്കള്‍ക്കും അക്കാര്യത്തെക്കുറിച്ച് യാതൊരു അറിവുമില്ല. അവര്‍ ഊഹത്തെ പിന്‍പറ്റുക മാത്രമാണ് ചെയ്തുപോന്നത്. അപ്പോള്‍ സത്യം അല്ലാഹുവില്‍ നിന്നുള്ള അവന്‍റെ വചനമായ അദ്ദിക്റാണ്. യാതൊരു പങ്കുകാരും ഇടയാളന്‍മാരും ശുപാര്‍ശക്കാരും ഇല്ലാത്ത ഏകനായ അല്ലാഹുവിനെ പരിചയപ്പെടുത്തുന്നതിന് വേണ്ടിയാണ് അത് അവതരിപ്പിച്ചിട്ടുള്ളത്. ഇന്ന് ഇത്തരം സൂക്തങ്ങളെല്ലാം അറബി ഖുര്‍ആനില്‍ വായിക്കുകയും എന്നാല്‍ ഇത്തരം സൂക്തങ്ങളുടെ ആശയത്തിന് വിരുദ്ധമായ പലതരത്തിലുള്ള വിശ്വാസങ്ങളും അനാചാരങ്ങളും അനുയായികളെക്കൊണ്ട് ചെയ്യിപ്പിക്കുകയും ചെയ്യുന്ന അല്ലാഹുവിന്‍റെയും പ്രവാ ചകന്‍റെയും വിശ്വാസികളുടെയും ശത്രുക്കളുമായ കപടവിശ്വാസികള്‍ 63: 1- 4 സൂക്തങ്ങളില്‍ പറഞ്ഞ പ്രകാരം നുണ പറയുന്നവര്‍ തന്നെയാണ്. 56: 82 ല്‍ പറഞ്ഞ പ്രകാരം അവര്‍ സത്യമായ അദ്ദിക്റിനെ തള്ളിപ്പറയുക എന്നത് ഭക്ഷണമാക്കിയവരാണ്. 6: 100; 9: 30-31; 16: 2, 36 വിശദീകരണം നോക്കുക.