അവര്‍ പുറപ്പെടാന്‍ ഉദ്ദേശിച്ചിരുന്നെങ്കില്‍ അവര്‍ അതിനുവേണ്ടി ഒരുക്കങ്ങള്‍ ചെയ്യുമായിരുന്നു, എന്നാല്‍ അവരുടെ പുറപ്പാട് അല്ലാഹു വെറുത്തു, അതിനാല്‍ അവന്‍ അവരെ ആലസ്യത്തില്‍ തടഞ്ഞുവെച്ചു, ഇരിക്കുന്നവരോടൊപ്പം നിങ്ങളും ഇരുന്നുകൊള്ളുക എന്ന് അവരോട് പറയപ്പെടുകയും ചെയ്തു.
ആത്മാര്‍ത്ഥതയില്ലാതെ മറ്റാരെയെങ്കിലും ബോധിപ്പിക്കാന്‍ വേണ്ടി ഏന്തെങ്കിലും പ്രവര്‍ത്തനങ്ങളില്‍ മുഴുകുന്നത് ഗുണത്തിലേറെ ദോഷമാണ് വരുത്തുക. അത്തരക്കാരുടെ സാമീപ്യം ആത്മാര്‍ത്ഥതയുള്ള വിശ്വാസികളെപ്പോലും നിരുല്‍സാഹപ്പെടുത്താന്‍ ഇടയാക്കും. ജീവിതലക്ഷ്യമില്ലാതെ 'ആര്‍ക്കാനും വേണ്ടി ഓക്കാനിക്കുന്നവര്‍' യുദ്ധത്തിന് പുറപ്പെടാതിരിക്കുന്നത് തന്നെയാണ് വിശ്വാസികള്‍ക്ക് ഗുണകരം. കപടവിശ്വാസികളും അവരുടെ അനുയായികളും ത്രികാലജ്ഞാനമായ അദ്ദിക്റിനെ തള്ളിപ്പറയുകവഴി നാഥനെ വിസ്മരിച്ച് ജീവിക്കുന്നവരായതിനാല്‍ അവരുടെ പ്രവര്‍ത്തനങ്ങളൊന്നും തന്നെ സ്വീകരിക്കപ്പെടുകയില്ല എന്ന് 2: 43, 186 സൂക്തങ്ങളില്‍ വിവരിച്ചിട്ടുണ്ട്. 8: 64 ല്‍ വിവരിച്ച പ്രകാരം സൂക്ഷ്മാലുക്കളായ വിശ്വാസികള്‍ കെട്ടജനതയായ ഇത്തരം കപടവിശ്വാസികളെ അനുസരിക്കാവുന്നതല്ല. 4: 120-121; 8: 24; 9: 31 വിശദീകരണം നോക്കുക.