പലവിധ ഒഴികഴിവുകള്‍ പറഞ്ഞ് യുദ്ധത്തില്‍ നിന്ന് പിന്‍തിരിഞ്ഞ് നില്‍ക്കാന്‍ ശ്രമിച്ചിരുന്ന കപടവിശ്വാസികളില്‍ ചിലര്‍ അവരുടെ ബലഹീനത തുറന്നുപറയാനും മടിച്ചിരുന്നില്ല. 'സുന്ദരികളായ റോമക്കാരികളെ കാണുമ്പോള്‍ എനിക്ക് എന്നെത്തന്നെ നിയന്ത്രിക്കാന്‍ സാധിക്കാതെ വന്നേക്കാം, അതുകൊണ്ട് എന്നെ കുഴപ്പത്തില്‍ അകപ്പെടുത്താതെ മാറിനില്‍ക്കാന്‍ അനുവദിക്കണം' എന്ന് ആവശ്യപ്പെട്ടവര്‍ വരെ അവരിലുണ്ട്.

 ഇന്ന് ഇത്തരം സൂക്തങ്ങളെല്ലാം അറബി ഖുര്‍ആനില്‍ വായിക്കുന്ന, നരകക്കുണ്ഠത്തിന്‍റെ 7 വാതിലുകളിലേക്ക് നിജപ്പെടുത്തി വെക്കപ്പെട്ട, ഫുജ്ജാറുകള്‍ അല്ലാഹുവിന്‍റെ മാര്‍ഗത്തില്‍ ഇറങ്ങിപ്പുറപ്പെടുന്നതില്‍ നിന്നും സമ്പത്ത്, സമയം, ആരോഗ്യം മുതലായവ അവന്‍റെ മാര്‍ഗത്തില്‍ ചെലവഴിക്കുന്നതില്‍ നിന്നും ഒഴികഴിവ് തേടുന്നവരും, എന്നാല്‍ ജനങ്ങള്‍ക്ക് ജീവിതഭാരം ഉണ്ടാക്കുന്ന വിധത്തില്‍ ഏത് അവിഹിത മാര്‍ഗത്തിലൂടെയും പണം സമ്പാദിക്കാന്‍ ശ്രമിക്കുന്നവരും ഭൗതികജീവിതാലങ്കാരങ്ങളിലും അനാചാരങ്ങളി ലും പരസ്പരം പെരുമ നടിക്കുന്നതിലും ചെലവഴിക്കാന്‍ യാതൊരു മടിയുമില്ലാത്തവരുമാണ്. ചര്യാപരമായ പ്രാര്‍ത്ഥനകളിലും ഉരുവിടലുകളിലും ആത്മാവില്ലാത്ത വ്യര്‍ത്ഥമായ ആരാധനാകര്‍മങ്ങളിലും മുഴുകുന്ന അവര്‍ പലിശ, ചൂതാട്ടം മുതലായവ പേര് മാറ്റി അനുവദനീയമാക്കുന്നതിനും നിര്‍ബന്ധദാനമായ സക്കാത്ത് കൊടുക്കുന്നതില്‍ നിന്ന് പോലും രക്ഷപ്പെടാന്‍ പഴുതുകളുണ്ടാക്കുന്നതിനും വേണ്ടി മുഫ്തിമാരെ തേടുന്നവരുമായിരിക്കും. മാത്രമല്ല, 4: 159; 38: 24 സൂക്തങ്ങളില്‍ വിവരിച്ച പ്രകാരം അവര്‍ പരസ്ത്രീ-പരപുരുഷ ബന്ധത്തിനുവേണ്ടി അതിയായി കൊതിക്കുന്നവരുമാണ്. എന്നാല്‍ അദ്ദിക്റിനെ സത്യപ്പെടുത്തുന്നവരും 'ഞാനില്ല, എന്‍റേതൊന്നുമില്ല, എന്‍റെ ആത്മാവ് ഉടമയായ അല്ലാഹുവിന്‍റേതാണ്, എന്‍റെ ശരീരാവയവങ്ങളെല്ലാം മാതാവിന്‍റേയും പിതാവിന്‍റേയും ഇന്ദ്രിയത്തുള്ളികള്‍ കൂട്ടിച്ചേര്‍ത്ത് അവന്‍ വികസിപ്പിച്ചുണ്ടാക്കിയതാണ്' എന്ന് മനസ്സാ-വാചാ-കര്‍മ്മണാ അംഗീകരിക്കുന്നവരുമായ വിശ്വാസികളായ പുരുഷന്മാരും സ്ത്രീകളും ഇത്തരം കാപട്യങ്ങളില്‍ നിന്ന് അവരെ സ്വയം ശുദ്ധീകരിച്ചവരും തനിക്കുള്ളതെല്ലാം അല്ലാഹുവിന്‍റെ മാര്‍ഗത്തില്‍ വിനിയോഗിച്ച് ജീവിതലക്ഷ്യം നേടാന്‍ അവസരം പാര്‍ത്തിരിക്കുന്നവരുമാണ്. 2: 44, 110, 148, 267; 6: 28, 165; 8: 22 വിശദീകരണം നോക്കുക.