ആകാശങ്ങളെയും ഭൂമിയെയും ഇല്ലായ്മയില്‍ നിന്ന് ഉണ്ടാക്കി അവയിലുള്ള സര്‍വ്വവസ്തുക്കളെയും സൃഷ്ടിച്ചത് ആദ്യവും അന്ത്യവുമില്ലാത്ത ഏകനായ അല്ലാഹുവാണ്. അല്ലാഹുവിനെ കണ്ടെത്തുന്നതിനും അവനെ ഹൃദയത്തില്‍ സൂക്ഷിച്ചുകൊണ്ട് എല്ലായ്പ്പോഴും നിലകൊള്ളുന്നതിനും അവന്‍റെ പ്രാതിനിധ്യം വഹിക്കുന്നതിനും വേണ്ടിയാണ് മനുഷ്യനെ ഭൂമിയില്‍ നിയോഗിച്ചിട്ടുള്ളത്. പക്ഷേ വിശ്വാസികള്‍ മാത്രമേ ആ പ്രാതിനിധ്യം വഹിക്കുകയുള്ളൂ. വിശ്വാസികള്‍ സൂക്തം 1: 4 നെ സത്യപ്പെടുത്തിക്കൊണ്ട് സ്വന്തത്തിന് വേണ്ടിയല്ല, മറിച്ച് ഉടമയായ അല്ലാഹുവിനുവേണ്ടി മാത്രം ജീവിക്കുന്നവരും അവനെ മാത്രം സേവിക്കുന്നവരുമാണ്. 39: 3 ല്‍, അറിഞ്ഞിരിക്കുക, ജീവിതം മുഴുവന്‍ അല്ലാഹുവിന് മാത്രമുള്ളതാക്കുക എന്നും; 40: 14 ല്‍, അപ്പോള്‍ നിങ്ങള്‍ ജീവിതം മുഴുവന്‍ അല്ലാഹുവിന് മാത്രമാക്കിക്കൊണ്ട് അവനെ വിളിച്ച് പ്രാര്‍ത്ഥിക്കുക, അത് കാഫിറുകള്‍ക്ക് എത്ര അരോചകമായിരുന്നാലും ശരി എന്നും പറഞ്ഞിട്ടുണ്ട്. 3: 19, 101-102; 6: 101; 12: 24; 15: 86 വിശദീകരണം നോക്കുക.