3: 160 ല്‍ വിവരിച്ച  പ്രകാരം അല്ലാഹു ഒരാളോടൊപ്പമുണ്ടെങ്കില്‍ ലോകരെല്ലാവരും കൂടി ഒരുമിച്ച് കൂടിയാലും അവനെ ഒന്നും ചെയ്യാന്‍ അവര്‍ക്ക് സാധിക്കുകയില്ല. അല്ലാഹു ഒരാളെ കൈവിട്ടാല്‍ ലോകരെല്ലാവരും ചേര്‍ന്നാലും അവനെ ഒരു ദുരിതത്തില്‍ നിന്നും രക്ഷിക്കാനും സാധ്യമല്ല. ഇക്കാര്യം മനസ്സിലാക്കി അല്ലാഹുവില്‍ ഭരമേല്‍പ്പിച്ച് അവന്‍റെ തൃപ്തിമാത്രം ഉദ്ദേശിച്ച് ഉറച്ച് നിലകൊള്ളുകയാണ് വിശ്വാസികള്‍ ചെയ്യുക. അല്ലാഹുവിനെ സഹായിക്കുന്നവരെ അല്ലാഹു തിരിച്ച് സഹായിക്കുകതന്നെ ചെയ്യും, നിശ്ചയം അല്ലാഹു ശക്തവാനും അജയ്യനും തന്നെയാകുന്നു എന്ന് 22: 40 ലും; നിങ്ങള്‍ അല്ലാഹുവിനെ സഹായിക്കുകയാണെങ്കില്‍ അവന്‍ നിങ്ങളെയും സഹായിക്കുന്നതും നിങ്ങളുടെ പാദങ്ങളും ഹൃദയങ്ങളും നേരെച്ചൊവ്വെയുള്ള പാതയായ അദ്ദിക്റില്‍ ഉറപ്പിച്ചുനിര്‍ത്തുന്നതുമാണ് എന്ന് 47: 7 ലും പറഞ്ഞിട്ടുണ്ട്. ഇന്ന് അല്ലാഹുവിനെ സഹായിക്കല്‍ പ്രപഞ്ചനാഥനായ അല്ലാഹുവിനെ പരിചയപ്പെടുത്തുന്നതിനുവേണ്ടി അവന്‍റെ സംസാരമായ അദ്ദിക്ര്‍ ലോകര്‍ക്ക് എത്തിച്ചുകൊടുക്കലാണ്. 2: 9-10; 3: 26-27; 4: 144 വിശദീകരണം നോക്കുക.