മദീനയില്‍ അന്ന് രണ്ട് പള്ളികളാണുണ്ടായിരുന്നത്. മസ്ജിദുന്നബവിയും മസ്ജിദുല്‍ ഖുബായും. മസ്ജിദുല്‍ ഖുബായുടെ ഏറെക്കുറെ അടുത്താണ് കപടവിശ്വാസികള്‍ നിര്‍മ്മിച്ചിരുന്ന മസ്ജിദു-ളളിറാര്‍. യഥാര്‍ത്ഥത്തില്‍ മദീനയില്‍ മൂന്നാമതൊരു പള്ളിയുടെ ആവശ്യമുണ്ടായിരുന്നില്ല. നിലവിലുള്ള പള്ളികളില്‍ മഴക്കാലത്തും ശൈത്യകാലത്തും പ്രത്യേകിച്ച് രാത്രികാലങ്ങളില്‍ അഞ്ചുനേരത്തെ നമസ്കാരത്തിന് വന്നെത്താന്‍ പ്രയാസങ്ങളുള്ള അകലെ താമസിക്കുന്നവരെയും രോഗികളെയും യുദ്ധങ്ങളില്‍ കൈകാലുകള്‍ നഷ്ടപ്പെട്ടവരെയുമെല്ലാം ചൂണ്ടിക്കാണിച്ചാണ് അവര്‍ പള്ളി നിര്‍മ്മാണത്തിന് മുതിര്‍ന്നത്. അങ്ങിനെ അതിന്‍റെ പണി കഴിഞ്ഞപ്പോള്‍ പ്രവാചകന്‍ തന്നെ നമസ്കാരം നിര്‍വ്വഹിച്ചു കൊണ്ട് അതിന്‍റെ 'ഉദ്ഘാടനം' നിര്‍വഹിക്കണമെന്ന് ആവശ്യപ്പെടുകയുണ്ടായി. പ്രവാചകന്‍ അതില്‍ നിന്നും ഒഴിഞ്ഞുമാറുകയും തബൂക്ക് യുദ്ധത്തിനുവേണ്ടി പുറപ്പെടുകയുമാണുണ്ടായത്. റോമക്കാരുടെ മുമ്പില്‍ പ്രവാചകനും അനുയായികളും പരാജയപ്പെടുമെന്ന് ഉറച്ചുവിശ്വസിച്ചിരുന്ന അവര്‍ കപടവിശ്വാസികളുടെ നേതാവായ അബ്ദുല്ലാഹിബ്നു ഉബയ്യിനെ മദീനയിലെ രാജാവാക്കാനുള്ള ഗൂഢതന്ത്രം മെനയാന്‍ ആ പള്ളി ഉപയോഗപ്പെടുത്തുകയുണ്ടായി. എന്നാല്‍ വിശ്വാസികളോട് ഏറ്റുമുട്ടാന്‍ ധൈര്യപ്പെടാതെ തബൂക്കില്‍നിന്നും റോമക്കാര്‍ പിന്‍വാങ്ങിയതോടെ അവരുടെ എല്ലാ പ്രതീക്ഷകളും തകിടം മറിയുകയാണുണ്ടായത്. 

24: 35-37 സൂക്തങ്ങളില്‍, പടുത്തുയര്‍ത്തപ്പെടാന്‍ അല്ലാഹു സമ്മതം കൊടുത്ത, അവന്‍റെ നാമം സ്മരിക്കപ്പെടുന്ന, പ്രഭാത-പ്രദോഷ ഭേദമന്യേ അവനെ പരിശുദ്ധപ്പെടുത്തുന്ന അവന്‍റെ വീടുകളിലാണ് ആകാശഭൂമികളുടെ പ്രകാശമായ അല്ലാഹു ഉള്ളത്, അല്ലാഹുവിന്‍റെ സ്മരണയുണ്ടാക്കുന്ന അദ്ദിക്റില്‍ നിന്നും പ്രാര്‍ത്ഥന നിലനിര്‍ത്തുന്നതില്‍ നിന്നും സംസ്കരണ പ്രവര്‍ത്തനങ്ങള്‍ നടപ്പിലാക്കുന്നതില്‍ നിന്നും തങ്ങളുടെ കച്ചവടങ്ങളോ ക്രയവിക്രയങ്ങളോ തടയപ്പെടാത്ത ചില ആളുകള്‍ ആ ഭവനങ്ങളിലുണ്ട്, അവരാകട്ടെ ഹൃദയങ്ങളും കണ്ണുകളും സ്തംഭിച്ചുപോകുന്ന ഒരു ദിവസത്തെ അതിയായി ഭയപ്പെടുന്നവരുമാണ് എന്ന് പറഞ്ഞിട്ടുണ്ട്. ഇത്തരം വിശ്വാസികളെക്കുറിച്ചാണ് ഈ സൂക്തത്തില്‍ വിശുദ്ധന്‍മാരായിട്ടുള്ളവര്‍ എന്ന് പറഞ്ഞിട്ടുള്ളത്. ആദ്യദിനം തൊട്ട് അല്ലാഹുവിനോടുള്ള ഭക്തിയുടെ അടിസ്ഥാനത്തില്‍ സ്ഥാപിക്കപ്പെട്ട പള്ളിയാണ് നിനക്ക് നില്‍ക്കാന്‍ ഏറ്റവും അനുയോജ്യമായിട്ടുള്ളത് എന്ന് പറഞ്ഞത് ഇത്തരം പള്ളിയെക്കുറിച്ചാണ്.

 പ്രപഞ്ചനാഥന്‍റെ പക്കല്‍ ഭദ്രമായി സൂക്ഷിച്ചുവെച്ചിട്ടുള്ള മാന്യമായ ഒരു വായനയാണ് അദ്ദിക്ര്‍ എന്നും എന്നാല്‍ വിശുദ്ധന്മാരല്ലാതെ അത് ഉള്‍ക്കൊള്ളുകയില്ല എന്നും 56: 77-80 സൂക്തങ്ങളില്‍ പറഞ്ഞിട്ടുണ്ട്. 98: 2-3 സൂക്തങ്ങളില്‍ പറഞ്ഞ പ്രകാരം മുമ്പ് അവതരിപ്പിക്കപ്പെട്ടിട്ടുള്ള 312 ഗ്രന്ഥങ്ങളും അവയുടെ നേരെച്ചൊവ്വെയുള്ള വിശദീകരണങ്ങളുമടങ്ങിയ, ആത്മാവിനെ ശുദ്ധീകരിക്കാനുള്ള ഗ്രന്ഥമായ അദ്ദിക്ര്‍ ക്രോഡീകരിക്കപ്പെട്ടിരിക്കെ ഇന്ന് അത് ഉപയോഗപ്പെടുത്താതെ ആണായിരിക്കട്ടെ പെണ്ണായിരിക്കട്ടെ ഒരാളും വിശുദ്ധനാവുകയില്ല. എന്നാല്‍ അറബി ഖുര്‍ആന്‍ വായിക്കുന്ന ഫുജ്ജാറുകള്‍ അതിനെ തള്ളിപ്പറയുക എന്നത് ഭക്ഷണമാക്കിയിരിക്കുന്നതിനാലാണ് അവരെ ആയിരം സമുദായങ്ങളില്‍ പെട്ട ജീവികളില്‍ വെച്ച് ചിന്താശക്തി ഉപയോഗപ്പെടുത്താത്ത ദുഷ്ടര്‍ എന്ന് 8: 22 ല്‍ വിശേഷിപ്പിച്ചിട്ടുള്ളത്. 2: 152; 5: 6; 9: 88 വിശദീകരണം നോക്കുക.