കപടവിശ്വാസികളില്‍ ചിലര്‍ പലതരം പ്രതിബന്ധങ്ങള്‍ ഉന്നയിച്ചുകൊണ്ട് യുദ്ധത്തില്‍ നിന്ന് ഒഴിവ് നല്‍കാന്‍ പ്രവാചകനോട് ആവശ്യപ്പെടുകയും അതിന്‍റെ യാഥാര്‍ത്ഥ്യം അന്വേഷിക്കാതെ പ്രവാചകന്‍ അവര്‍ക്ക് വിടുതി നല്‍കുകയും ചെയ്തിരുന്നു. അത് ശരിയായില്ലെന്നാണ് ഈ സൂക്തത്തിലൂടെ അല്ലാഹു പറയുന്നത്. യുദ്ധത്തില്‍ പങ്കെടുക്കുന്നതില്‍ നിന്ന് ഒഴിവ് നല്‍കുക വഴി തങ്ങളുടെ കാപട്യത്തിന് മറയിടാന്‍ അവര്‍ക്ക് അവസരം ലഭിക്കുകയാണുണ്ടായത്. ഒഴിഞ്ഞ് നില്‍ക്കാന്‍ അനുമതി നല്‍കിയില്ലെങ്കിലും അവര്‍ യുദ്ധത്തിന് പുറപ്പെടാതെ വീട്ടില്‍ ചടഞ്ഞിരിക്കുകയും അങ്ങനെ തങ്ങള്‍ വിശ്വാസികളാണെന്ന അവരുടെ കപടനാട്യം വെളിവാകുകയും ചെയ്യുമായിരുന്നു.

3: 166-167 സൂക്തങ്ങളില്‍ വിവരിച്ച പ്രകാരം ഉഹ്ദ് യുദ്ധം സംഭവിച്ചത് പ്രവാചകനോടൊപ്പമുള്ളവരില്‍ നിന്നുള്ള കപടവിശ്വാസികളെയും വിശ്വാസികളെയും വേര്‍തിരിക്കുന്നതിന് വേണ്ടിയാണ്. 3: 154 ല്‍ വിവരിച്ച പ്രകാരം ഉഹ്ദ് യുദ്ധാനന്തരം രാത്രി വിശ്വാസികള്‍ക്ക് ശാന്തിനിര്‍ഭരമായ നിദ്ര പ്രദാനം ചെയ്തപ്പോള്‍ കപടവിശ്വാസികള്‍ ഉറക്കമില്ലാതെ 'എന്തുകൊണ്ട് പ്രവാചകനോടൊപ്പം യുദ്ധത്തിലേര്‍പ്പെട്ട നാം പരാജയപ്പെട്ടു' എന്ന ചിന്തയിലായിരുന്നു. 32: 18 ല്‍, 'വിശ്വാസിയായ ഒരാള്‍ തെമ്മാടിയായ ഒരാളെപ്പോലെയാകുമോ? അവര്‍ സമമാവുകയില്ല' എന്ന് പറഞ്ഞിട്ടുണ്ട്. 29: 2-3 സൂക്തങ്ങളില്‍, മനുഷ്യര്‍ കണക്കുകൂട്ടുന്നുവോ, നിശ്ചയം ഞങ്ങള്‍ വിശ്വസിച്ചിരിക്കുന്നു എന്ന് പറഞ്ഞാല്‍ അവര്‍ പരീക്ഷിക്കപ്പെടാതെ വിട്ടയക്കപ്പെടുമെന്ന്? നിശ്ചയം അവര്‍ക്ക് മുമ്പുള്ളവരെ നാം പരീക്ഷിച്ചിട്ടുണ്ട്, അവരില്‍ ആരാണ് സത്യസന്ധന്‍മാരെന്നും ആരാണ് കളവ് പറയുന്നവരെന്നും അല്ലാഹുവിന് അറിയുകതന്നെ ചെയ്യുമെന്ന് പറഞ്ഞിട്ടുണ്ട്. 2: 99; 5: 94; 8: 2-4, 55 വിശദീകരണം നോക്കുക.