പ്രവാചകന്‍റെ കൂടെയുള്ള വിശ്വാസികള്‍ പ്രവാചകനില്‍ നിന്ന് പിന്തിരിഞ്ഞ് പോകുന്നതുവരെ നിങ്ങള്‍ അവര്‍ക്ക് ഒരു സാമ്പത്തികസഹായവും ചെയ്യരുതെന്ന് ഇത്തരം കപടവിശ്വാസികള്‍ പരസ്പരം പറഞ്ഞിരുന്നതായി 63: 7 ല്‍ പറഞ്ഞിട്ടുണ്ട്. കപടവിശ്വാസികളും അവരുടെ അനുയായികളും നാഥനെക്കൊണ്ടും അന്ത്യദിനത്തെക്കൊണ്ടും വിശ്വസിച്ചിരുന്നില്ല. അതിനാല്‍ 9: 48 ല്‍ വിവരിച്ച പ്രകാരം അവര്‍ പ്രവാചകനെ അനുസരിച്ചു എന്ന് വായകൊണ്ട് പറയുന്നവരും ഹൃദയം കൊണ്ട് നിഷേധിക്കുന്നവരുമായിരുന്നു. 16: 89 ല്‍, സര്‍വസ്വം നാഥന് സമര്‍പ്പിച്ച് ജീവിക്കുന്ന മുസ്ലിംകള്‍ക്ക് സന്മാര്‍ഗവും കാരുണ്യവും ശുഭവാര്‍ത്താദായകവുമാണ് എന്ന് വിശേഷിപ്പിക്കപ്പെട്ട അദ്ദിക്ര്‍ ഇന്ന് ഒരു ഗ്രന്ഥമായി രൂപപ്പെട്ടിട്ടുണ്ട്. ജീവിതലക്ഷ്യം തിരിച്ചറിയാതെ അദ്ദിക്ര്‍ മൂടിവെച്ചുകൊണ്ട് ശരീരം കൊണ്ട് ജാഢയായി പ്രവര്‍ത്തിക്കുന്ന കപടവിശ്വാസികള്‍ ഐഹികജീവിതം കൊണ്ട് തൃപ്തിയടയുന്നവരും മരണത്തോടുകൂടി വിചാരണയില്ലാതെ നരകത്തില്‍ പ്രവേശിക്കപ്പെടുന്നവരുമാണ്. 2: 26 ല്‍ വിവരിച്ച പ്രകാരം അദ്ദിക്റിനെ തള്ളിപ്പറയുക എന്നത് തങ്ങളുടെ ഭക്ഷണമാക്കിയ അവര്‍ തിന്മ കല്‍പിക്കുന്നവരും നന്മ വിരോധിക്കുന്നവരും നാഥനെ വിസ്മരിച്ചവരുമാണ്; അതുകൊണ്ട് നാഥന്‍ അവരെയും വിസ്മരിച്ചിരിക്കുന്നു, അവര്‍ തന്നെയാണ് തെമ്മാടികള്‍ എന്ന് 9: 67-68 സൂക്തങ്ങളില്‍ പറഞ്ഞിട്ടുണ്ട്. 8: 22; 9: 42-47; 25: 33-34 വിശദീകരണം നോക്കുക.