അദ്ദിക്ര്‍ വന്നുകിട്ടിയിട്ട് അതിന് വിരുദ്ധമായ ജീവിതം നയിച്ചവരില്‍ നിന്നുള്ള ഏതൊരാളുടെയും മരണസമയത്ത് നാഥന്‍ അവനോട്, 'നിശ്ചയം നിനക്ക് എന്‍റെ സൂക്തങ്ങള്‍ വന്നുകിട്ടി, നീ അവയെ തള്ളിപ്പറഞ്ഞു, നീ എല്ലാം തികഞ്ഞവനാണെന്ന് അഹങ്കരിച്ചു, നീ കാഫിറുകളില്‍ പെട്ടവന്‍ തന്നെയായിരുന്നു' എന്ന് പറയുമെന്ന് 39: 59 ലും, നാഥനെക്കുറിച്ച് കളവ് പറഞ്ഞിരുന്നവരുടെ മുഖം വിധിദിവസം രാത്രിയുടെ മൂടുപടം പോലെ ഇരുണ്ട് കരുവാളിച്ചതായി നിനക്ക് കാണാം, അഹംഭാവികളായവര്‍ക്ക് നരകക്കുണ്ഠം പാര്‍പ്പിടമായി പോരെയോ എന്ന് 39: 60 ലും പറഞ്ഞിട്ടുണ്ട്. 9: 67-68 സൂക്തങ്ങളില്‍ വിവരിച്ച പ്രകാരം തിന്മ കല്‍പിക്കുകയും നന്മ വിരോധിക്കുകയും ചെയ്യുന്ന മനുഷ്യപ്പിശാചുക്കളായ കപടവിശ്വാസികള്‍ക്കും കുഫ്ഫാറുകള്‍ക്കും നരകക്കുണ്ഠാഗ്നിയാണ് വാഗ്ദത്തം ചെയ്യപ്പെട്ടിരിക്കുന്നത്. അവര്‍ ഇവിടെ സമ്പാദിച്ചുകൊണ്ടിരിക്കുന്നത് നരകക്കുണ്ഠമാണ് എന്നതിനാല്‍ 'കുറച്ച് ചിരിച്ചുകൊള്ളാനും അധികം കരഞ്ഞുകൊണ്ടിരിക്കാനുമാണ്' അവരോട് 9: 80-82 സൂക്തങ്ങളില്‍ പറഞ്ഞിരിക്കുന്നത്. അദ്ദിക്ര്‍ കൊണ്ട് വിശ്വാസിയാകാത്തതിനാല്‍ അവരുടെ പ്രവര്‍ത്തനങ്ങളെല്ലാം നിഷ്ഫലമാണ്. ലക്ഷ്യബോധമില്ലാതെയും പ്രജ്ഞയറ്റവരായും അവര്‍ ഇവിടെ ജീവിച്ചതിന് പിഴയായി നരകക്കുണ്ഠമാണ് അവര്‍ക്ക് ലഭിക്കുക എന്ന് 18: 100-101; 25: 34, 65-66; 48: 6; 98: 6 സൂക്തങ്ങളിലെല്ലാം അവര്‍ വായിച്ചിട്ടുണ്ട്. 6: 160; 8: 22; 13: 18 വിശദീകരണം നോക്കുക.