അദ്ദിക്ർ

ഫലസ്തീന്‍ ഭാഗത്തുള്ള തകര്‍ന്നടിഞ്ഞ ഒരു പ്രദേശത്തിലൂടെ തന്‍റെ കഴുതപ്പുറത്ത് സഞ്ചരിക്കാനിടയായ 'ഉസൈര്‍' ഇത്തരം നശിച്ച നാടിനെ എങ്ങനെയാണ് അല്ലാഹു പുനര്‍ജീവിപ്പിക്കുകയെന്ന് മനസ്സില്‍ സംശയം പ്രകടിപ്പിക്കുകയാണ്. അപ്പോള്‍ അല്ലാഹു അദ്ദേഹത്തെ നൂറുവര്‍ഷം മരിപ്പിച്ചുകിടത്തിയ ശേഷം പുനര്‍ജ്ജീവിപ്പിച്ച് ചോദിച്ചു: നീ എത്ര കൊല്ലം മരിച്ചുകിടന്നു? അദ്ദേഹം പറഞ്ഞു: ഒരു ദിവസമോ ഒരു ദിവസത്തിന്‍റെ ഭാഗമോ മാത്രം. അപ്പോള്‍ അദ്ദേഹം യാത്രയില്‍ ഉപയോഗിച്ചിരുന്ന മുന്തിരി, അത്തിപ്പഴം തുടങ്ങിയ ഭക്ഷണപാനീയത്തിലേക്ക് നോക്കാന്‍ പറഞ്ഞു. അതിന് യാതൊരു മാറ്റവും വന്നിട്ടില്ല, പിന്നെ അദ്ദേഹം സഞ്ചരിച്ചിരുന്ന കഴുതയിലേക്ക് നോക്കാന്‍ പറഞ്ഞു, നൂറ് വര്‍ഷം മുമ്പ് നശിച്ചതിനാല്‍ അതിന്‍റെ എല്ലുകളൊക്കെ നുരുമ്പിയതായി കണ്ടു. അല്ലാഹു ആ എല്ലുകളെ പുനഃസംഘടിപ്പിച്ച് മാംസം പൊതിഞ്ഞ് കഴുതയെ പുനര്‍സൃഷ്ടിച്ചു. ഇത് കണ്ടപ്പോള്‍ ഉസൈറിന് ബോധ്യമായി -നിശ്ചയം എത്ര കൊല്ലം മുമ്പ് മരിച്ചവരെയും ജീവിപ്പിക്കാനും വേഗത്തില്‍ കേടുവരുന്ന ഭക്ഷണപാനീയങ്ങള്‍ എത്ര കാലത്തേക്കും കേടുവരാതെ സൂക്ഷിക്കാനും മാത്രമല്ല, എല്ലാ കാര്യത്തിനും കഴിവുള്ള സര്‍വ്വശക്തനാണ് അല്ലാഹു എന്ന്. ഈ സംഭവം കാരണമാണ് 9: 30 ല്‍ പറഞ്ഞ പ്രകാരം ജൂതന്മാര്‍ ഉസൈറിനെ ദൈവപുത്രനായി ചിത്രീകരിച്ചത്. ഈ സംഭവത്തിലൂടെ അല്ലാഹു എല്ലാ കാര്യത്തിനും എല്ലാ വസ്തുക്കളുടെമേലും കഴിവുള്ള സര്‍വ്വശക്തനാണ് എന്ന് പ്രവാചകനെയും വിശ്വാസികളെയും പഠിപ്പിക്കുകയാണ്. 2: 20, 106, 109, 148; 3: 165; 16: 77; 24: 45; 29: 20; 35: 1 തുടങ്ങിയ സൂക്തങ്ങളും, 'നിശ്ചയം അല്ലാഹു എല്ലാ കാര്യത്തിനും കഴിവുള്ള സര്‍വ്വശക്തന്‍ തന്നെയാകുന്നു' എന്ന ആശയത്തോടുകൂടിയാണ് അവസാനിക്കുന്നത്. 2: 164; 9: 30; 18: 19 വിശദീകരണം നോക്കുക.