അദ്ദിക്ർ

എക്കാലത്തും ഉറപ്പുനല്‍കുന്ന ഗ്രന്ഥമായ അദ്ദിക്ര്‍ ഉപയോഗപ്പെടുത്താത്ത ആയിരത്തില്‍ തൊള്ളായിരത്തിതൊണ്ണൂറ്റി ഒമ്പതും ഊഹങ്ങള്‍ പിന്‍പറ്റുന്നവരും നിഗമനങ്ങള്‍ വെച്ച് പുലര്‍ത്തുന്നവരും നരകത്തിലേക്കുള്ളവരുമാണ്. അവരെക്കുറിച്ച് 16: 35 ല്‍, അല്ലാഹുവിന്‍റെ അധികാരാവകാശങ്ങളില്‍ പങ്കുചേര്‍ക്കുന്നവര്‍ പറയുകയും ചെയ്യുന്നു: അല്ലാഹു ഉദ്ദേശിച്ചിരുന്നുവെങ്കില്‍ ഞങ്ങളോ ഞങ്ങളുടെ പൂര്‍വ്വപിതാക്കളോ അവനെക്കൂടാതെ മറ്റൊന്നിനേയും സേവിക്കുമായിരുന്നില്ല, അവനെക്കൂടാതെ ഞങ്ങള്‍ യാതൊന്നും നിഷിദ്ധമാക്കുകയും ചെയ്യുമായിരുന്നില്ല, അപ്രകാരം തന്നെയാണ് അവര്‍ക്ക് മുമ്പുള്ളവരും പ്രവര്‍ത്തിച്ചിട്ടുള്ളത്, അപ്പോള്‍ പ്രവാചകന്മാരുടെ മേല്‍ സന്ദേശം വ്യക്തമായി എത്തിച്ചുകൊടുക്കലല്ലാതെ മറ്റെന്ത് ഉത്തരവാദിത്തമാണ് ഉള്ളത് എന്ന് പറഞ്ഞിട്ടുണ്ട്. 10: 18 ല്‍, അവര്‍ അല്ലാഹുവിനെക്കൂടാതെ അവര്‍ക്ക് ഉപദ്രവമോ ഉപകാരമോ ചെയ്യാന്‍ കഴിയാത്തവരെ സേവിക്കുന്നവരും ഇക്കൂട്ടര്‍ അല്ലാഹുവിന്‍റെ പക്കല്‍ ഞങ്ങള്‍ക്കുവേണ്ടി ശുപാര്‍ശ ചെയ്യുന്നവരാണ് എന്ന് പറയുന്നവരുമാണ്. നീ അവരോട് ചോദിക്കുക: നിങ്ങള്‍ ആകാശഭൂമികളില്‍ അല്ലാഹുവിന് അറിയാത്തത് പറഞ്ഞുകൊടുക്കുകയാണോ? അല്ലാഹുവാകട്ടെ, അവര്‍ ജല്‍പിക്കുന്ന പങ്കാളിത്തങ്ങളില്‍ നിന്നെല്ലാം അത്യുന്നതനും അതീവ പരിശുദ്ധനുമാകുന്നു എന്ന് പറഞ്ഞിട്ടുണ്ട്. 49: 16 ല്‍, ആകാശഭൂമികളിലുള്ളതെല്ലാം ത്രികാലജ്ഞാനിയായ അവന് അറിവുള്ളതായിരിക്കെ നിങ്ങള്‍ അല്ലാഹുവിനെ നിങ്ങളുടെ ദീന്‍ പഠിപ്പിക്കുകയാണോ എന്ന് ചോദിക്കാന്‍ അന്ന് പ്രവാചകനും ഇന്ന് അദ്ദിക്റിനെ സത്യപ്പെടുത്തി ജീവിക്കുന്ന വിശ്വാസിയും കല്‍പിക്കപ്പെട്ടിരിക്കുന്നു. 

45: 22 ല്‍, ആകാശഭൂമികളെ അല്ലാഹു ലക്ഷ്യത്തോടുകൂടിയാണ് സൃഷ്ടിച്ചിട്ടുള്ളത് -എല്ലാ ഓരോ ആത്മാവിനും അത് സമ്പാദിച്ചതിന് പ്രതിഫലം കൊടുക്കുന്നതിന് വേണ്ടി, അവര്‍ അല്‍പം പോലും അനീതി കാണിക്കപ്പെടുകയില്ല എന്നും; 45: 23 ല്‍, അപ്പോള്‍ തന്‍റെ ഇച്ഛയെ ഇലാഹായി വെച്ചവനെ നീ കണ്ടുവോ, അല്ലാഹു അറിഞ്ഞുകൊണ്ടുതന്നെ അവനെ വഴിപിഴപ്പിച്ചിരിക്കുകയാണ്, അവന്‍റെ കേള്‍വിക്കും ഹൃദയത്തിനും അവന്‍ മുദ്ര വെച്ചിരിക്കുന്നു, അവന്‍റെ കാഴ്ചയുടെ മുകളില്‍ ഒരു ആവരണവുമുണ്ട്, അപ്പോള്‍ അല്ലാഹുവിന് ശേഷം ആരാണ് അവനെ സന്മാര്‍ഗത്തിലാക്കാനുള്ളത് -നിങ്ങള്‍ ഹൃദയം കൊണ്ട് സ്മരിക്കുന്നില്ലെയോ എന്നും; 45: 24 ല്‍, അത്തരം അക്രമികള്‍ പറയുകയും ചെയ്യുന്നു: ജീവിതമെന്നാല്‍ ഈ ഐഹികലോകത്തുള്ളത് മാത്രമാണ്, ഇവിടെ നാം ജനിക്കുന്നു, മരിക്കുന്നു, കാലമല്ലാതെ നമ്മെ നശിപ്പിക്കുന്നില്ല, അവരുടെ പക്കല്‍ യാതൊരു അറിവുമില്ല, നിശ്ചയം അവര്‍ ഊഹങ്ങളെയല്ലാതെ പിന്‍പറ്റുന്നില്ല എന്നും; 45: 25 ല്‍, അത്തരക്കാരുടെമേല്‍ നമ്മുടെ സൂക്തങ്ങള്‍ വ്യക്തമായി വിശദീകരിച്ച് കൊടുക്കപ്പെട്ടാല്‍ നിങ്ങള്‍ സത്യസന്ധന്മാര്‍ തന്നെയാണെങ്കില്‍ ഞങ്ങളുടെ മണ്‍മറഞ്ഞുപോയ പിതാക്കന്മാരെ ഇങ്ങോട്ട് കൊണ്ടുവരിക എന്നല്ലാതെ മറ്റൊരു വാദവും അവര്‍ക്ക് ഉണ്ടാവുകയില്ല എന്നും പറഞ്ഞിട്ടുണ്ട്. 2: 6-7, 286; 4: 150-151; 9: 28-30 വിശദീകരണം നോക്കുക.