മനുഷ്യരെ ഭൂമിയില്‍ നിയോഗിച്ചതിന്‍റെ ലക്ഷ്യം ഉണര്‍ത്താനുള്ളതാണ് യുക്തിനിര്‍ഭര ഗ്രന്ഥമായ അദ്ദിക്ര്‍. അതുകൊണ്ട് അതിനെ സത്യപ്പെടുത്തി ജീവിക്കുന്ന വിശ്വാസിയുടെ ബാധ്യതയാണ് അത് പഠിക്കലും പഠിപ്പിക്കലും പിന്‍പറ്റലും ലോകര്‍ക്ക് എത്തിച്ചുകൊടുക്കലും. 2: 121 ല്‍ വിവരിച്ച പ്രകാരം അദ്ദിക്റിനെ മൂടിവെച്ചവര്‍ തന്നെയാണ് ജീവിതം നഷ്ടപ്പെട്ടവര്‍. അറബി ഖുര്‍ആന്‍ വായിക്കുന്ന ഫുജ്ജാറുകള്‍ സര്‍വലോകര്‍ക്കുമുള്ള ഉണര്‍ത്തലായ അദ്ദിക്റിനെ മൂടിവെക്കുകയാണെങ്കില്‍ അതിനെ മൂടിവെക്കാത്ത മറ്റൊരു ജനതയെ അത് ഏല്‍പിക്കുമെന്ന് 6: 89-90 സൂക്തങ്ങളില്‍ പറഞ്ഞിട്ടുണ്ട്.

               ഇന്ന് ലോകത്തെവിടെയും വിശ്വാസികളുടെ ഒരു സംഘമില്ലാത്തതിനാല്‍ ആയുധം കൊണ്ടുള്ള ജിഹാദോ വധമോ ഇല്ല. 5: 48 ല്‍ വിവരിച്ച പ്രകാരം ഒറ്റപ്പെട്ട വിശ്വാസി ശക്തമായ ആയുധമായ അദ്ദിക്ര്‍ കൊണ്ട് അതിനെ മൂടിവെക്കുകയും തള്ളിപ്പറയുകയും ചെയ്യുന്ന കുഫ്ഫാറുകളോടും കപടവിശ്വാസികളോടും അധികരിച്ച ജിഹാദ് ചെയ്യാനാണ് കല്‍പിക്കപ്പെട്ടിട്ടുള്ളത്. നിശ്ചയം! കപടവിശ്വാസികള്‍ തന്നെയാണ് തെമ്മാടികള്‍ എന്ന് 9: 67 ലും; ആത്മാവിന്‍റെ ഭക്ഷണവും വസ്ത്രവും ദൃഷ്ടിയുമായ അദ്ദിക്ര്‍ തെമ്മാടികളല്ലാതെ മൂടിവെക്കുകയില്ല എന്ന് 2: 99 ലും പറഞ്ഞിട്ടുണ്ട്. പ്രവാചകനോ വിശ്വാസികളോ കപടവിശ്വാസികളുടെ മേല്‍ പൊറുക്കലിനെത്തേടിയാലും ഇല്ലെങ്കിലും അല്ലാഹു ഒരിക്കലും അവര്‍ക്ക് പൊറുത്തുകൊടുക്കുകയില്ല; നിശ്ചയം! അല്ലാഹു തെമ്മാടികളായ ഒരു ജനതയെ സന്മാര്‍ഗത്തിലേക്ക് നയിക്കുകയില്ല തന്നെ എന്ന് 63: 6 ലും പറഞ്ഞിട്ടുണ്ട്. 9: 80; 24: 55; 61: 5 തുടങ്ങിയ സൂക്തങ്ങള്‍ അവസാനിക്കുന്നത് അല്ലാഹു തെമ്മാടികളായ ഒരു ജനതയെ സന്മാര്‍ഗത്തിലേക്ക് നയിക്കുകയില്ല തന്നെ എന്ന ആശയത്തിലാണ്. 6: 133; 5: 47, 86, 108 വിശദീകരണം നോക്കുക.