മനുഷ്യരെ വിളിച്ചാണ് ഈ സൂക്തം അഭിസംബോധനം ചെയ്തിരുന്നതെങ്കില്‍ ഈ സൂക്തം ഏത് മതവിഭാഗങ്ങളിലെ പണ്ഡിത പുരോഹിതന്മാര്‍ക്കും ബാധകമായിരുന്നു. എന്നാല്‍ വിശ്വാസികളെ വിളിച്ചാണ് ഇക്കാര്യം പറയുന്നത് എന്നതിനാല്‍ അറബി ഖുര്‍ആന്‍ വായിക്കുന്ന ഫുജ്ജാറുകളിലെ പണ്ഡിത പുരോഹിതന്മാര്‍ക്കാണ് ഇക്കാര്യം ബാധകമാവുക. സ്വന്തം സ്ഥാനമാനങ്ങള്‍ നിലനിര്‍ത്താന്‍ വേണ്ടി ജനങ്ങളെ ദുര്‍മാര്‍ഗ്ഗത്തില്‍ തളച്ചിടുന്ന അല്ലാഹുവിന്‍റെ ശത്രുക്കളായ മനുഷ്യപ്പിശാചുക്കളാണ് സൂക്തത്തില്‍ പറഞ്ഞ പണ്ഡിതപുരോഹിതന്മാര്‍. അല്ലാഹുവിന്‍റെ മാര്‍ഗ്ഗമായ അദ്ദിക്റിന് വിരുദ്ധമായി മതവിധി നല്‍കുക, അനിസ്ലാമിക ആചാരങ്ങള്‍ ജനങ്ങളുടെമേല്‍ കെട്ടിവെക്കുക, ജനങ്ങളുടെ ജനന-മരണ-വിവാഹ-ഗൃഹപ്രവേശനസന്ദര്‍ഭങ്ങളും ഇതരസുഖ-ദുഃഖ സന്ദര്‍ഭങ്ങളും തങ്ങളുടെ മേല്‍ക്കോയ്മ നിലനിര്‍ത്താനുള്ള വേദിയാക്കുക, വിവാഹത്തിന് കാര്‍മികത്വം വഹിച്ച് പ്രതിഫലം വാങ്ങുക, മറഞ്ഞ കാര്യങ്ങളും ഭാവി കാര്യങ്ങളും പ്രവചിക്കാനുള്ള കഴിവുണ്ടെന്ന് സാധാരണ ജനങ്ങളെ വിശ്വസിപ്പിക്കുന്ന തരത്തിലുള്ള ജാഡകളും ഭാവ-ഹാവാദികളും കാണിക്കുക, ജീവനുള്ളവരെ മുന്നറിയിപ്പ് നല്‍കുന്നതിന് പകരം അറബി ഖുര്‍ആന്‍ മരിച്ചവരെ ഓതിക്കേള്‍പ്പിക്കുക, ഖുര്‍ആന്‍ സൂക്തങ്ങള്‍ പാത്രങ്ങളിലും തകിടുകളിലും എഴുതിക്കൊടുക്കുക, നൂലുകളില്‍ കെട്ടുകളിട്ട് വില്‍ക്കുക, മഹാത്മാക്കളുടെ ജാറങ്ങളിലേക്ക് ആളുകളെ കൂട്ടാനുള്ള കള്ളപ്രചരണങ്ങള്‍ നടത്തുക, നബിദിനം പോലുള്ള കൃത്രിമമായ ആഘോഷങ്ങളും ആചാരങ്ങളും പ്രാര്‍ത്ഥനാചടങ്ങുകളും ഘോഷയാത്രകളും സംഘടിപ്പിക്കു ക തുടങ്ങിയ പൈശാചിക പ്രവര്‍ത്തനങ്ങളിലൂടെയാണ് അത്തരം കപടവിശ്വാസികളായ പണ്ഡിത-പുരോഹിതന്മാര്‍, ജനങ്ങളുടെ ധനം അവിഹിതമായി തിന്നുന്നത്. യഥാര്‍ത്ഥത്തില്‍ അബൂജാഹിലിന്‍റെ പിന്‍ഗാമികളായി ജീവിക്കുകയും നബിയുടെ പിന്‍ഗാമികളായ തങ്ങള്‍മാരാണെന്ന് ദുരഭിമാനിക്കുകയും ചെയ്യുന്നവരും ഈ ഗണത്തില്‍ പെട്ടവര്‍ തന്നെയാണ്. ആരെങ്കിലും അദ്ദിക്ര്‍ മുറുകെപ്പിടിച്ച് ജീവിക്കണമെന്ന് പറഞ്ഞ് രംഗത്തുവന്നാല്‍ പാണ്ഡിത്യത്തിന്‍റെ ഹുങ്ക് പ്രകടിപ്പിച്ച് സത്യമാര്‍ഗത്തെത്തൊട്ട് ജനങ്ങളെ വല്ലവിധേനയും തടയാന്‍ വേണ്ടി കച്ചകെട്ടി ഇറങ്ങിത്തിരിക്കുന്ന ഇത്തരം പണ്ഡിത-പുരോഹിതന്മാര്‍ തങ്ങളുടെ സ്ഥാനമാനങ്ങള്‍ സംരക്ഷിക്കാന്‍ സത്യത്തിനെതിരായി എത്ര നീചമായ കുതന്ത്രങ്ങള്‍ നടത്താനും മടിക്കുകയില്ല. 28: 57 വിശദീകരണം നോക്കുക. 

നാഥന്‍റെ ഗ്രന്ഥമായ അദ്ദിക്റിനെ മൂടിവെക്കുകയും സൂക്തങ്ങളെ വളച്ചൊടിക്കുകയും ചെയ്യുന്ന, 9: 67 ല്‍ പറഞ്ഞ കപടവിശ്വാസികളാണ് അവര്‍. നാഥന്‍റെ ഗ്രന്ഥം പഠിക്കുകയും പഠിപ്പിക്കുകയും ചെയ്യുന്നതിന് പകരം അവര്‍ സംഘടനാ താല്‍പര്യങ്ങള്‍ ലക്ഷ്യം വെച്ചുകൊണ്ടുള്ള ഖുര്‍ആന്‍ വ്യാഖ്യാന ഗ്രന്ഥങ്ങളും കര്‍മ്മശാസ്ത്ര ഗ്രന്ഥങ്ങളും പഠിക്കുകയും പഠിപ്പിക്കുകയും പ്രചരിപ്പിക്കുകയും ചെയ്തുകൊണ്ട് 2: 79, 174-176 സൂക്തങ്ങളില്‍ വിവരിച്ച പ്രകാരം തങ്ങളുടെയും കുടുംബാംഗങ്ങളുടെയും വയറുകളില്‍ തീ നിറക്കുന്നവരും നേരെച്ചൊവ്വെയുള്ള പാതയില്‍ നിന്ന് വിഘടിച്ച് ദൂരെപ്പോയവരുമാണ്. അപ്പോള്‍ അവരെ വേദനാജനകമായ ശിക്ഷ കൊണ്ട് സന്തോഷവാര്‍ത്ത അറിയിക്കുക എന്ന ആശയത്തോടുകൂടിയാണ് 4: 138; 31: 7; 45: 8; 84: 24 തുടങ്ങിയ സൂക്തങ്ങളും അവസാനിക്കുന്നത്. അല്ലാഹുവിന്‍റെ മാര്‍ഗത്തില്‍ ചെലവഴിക്കുന്ന രീതി മനസ്സിലാക്കാന്‍ 9: 58-60 സൂക്തങ്ങളുടെ വിശദീകരണം വായിക്കുക. 4: 59; 5: 63; 7: 146-147 വിശദീകരണം നോക്കുക.