32: 4; 65: 12 സൂക്തങ്ങളില്‍ ഏഴ് ആകാശങ്ങളെയും ഏഴ് ഭൂമികളെയും അവക്കിടയിലുള്ളവയെയും ആറ് നാളുകളിലായി സൃഷ്ടിച്ചവനാണ് അല്ലാഹു, പിന്നെ അവന്‍ സിംഹാസനസ്ഥനായി, അവനെക്കൂടാതെ നിങ്ങള്‍ക്ക് ഒരു സംരക്ഷകനോ ശുപാര്‍ശക്കാരനോ ഇല്ല, അപ്പോള്‍ നിങ്ങള്‍ ഹൃദയത്തിന്‍റെ ഭാഷയില്‍ അവനെക്കുറിച്ച് മറ്റുള്ളവരെ ഓര്‍മ്മിപ്പിക്കുന്നില്ലെയോ എന്നും; 32: 5 ല്‍, അവനാണ് ആകാശത്തുനിന്ന് തീരുമാനം എടുത്ത് ഭൂമിയിലേക്ക് അയക്കുന്നത്, പിന്നെ നിങ്ങള്‍ കണക്കാക്കുന്ന ആയിരം വര്‍ഷങ്ങള്‍ക്ക് സമാനമായ ഒരുനാളില്‍ ഭൂമിയില്‍ നിന്നുള്ള അതിന്‍റെ റിപ്പോര്‍ട്ട് അവനിലേക്ക് ഉയര്‍ത്തപ്പെടുന്നു എന്നും പറഞ്ഞിട്ടുണ്ട്. 25: 58-59 സൂക്തങ്ങളില്‍, ആകാശങ്ങളെയും ഭൂമിയെയും അവരണ്ടിനും ഇടയിലുള്ളവയെയും ആറുനാളുകളില്‍ സൃഷ്ടിച്ച് അതിന്‍റെ ഭരണം ഏറ്റെടുത്ത ത്രികാലജ്ഞാനിയും നിഷ്പക്ഷവാനുമായ അല്ലാഹുതന്നെ മതി അവന്‍റെ അടിമകളുടെ പാപങ്ങള്‍ നോക്കിക്കാണുവാന്‍, ഒരിക്കലും മരിക്കാത്ത -എന്നെന്നും ജീവിച്ചിരിക്കുന്ന അവന്‍റെമേല്‍ നീ എല്ലാകാര്യവും ഭരമേല്‍പിക്കുകയും അവനെ സ്തുതിക്കുന്നതോടൊപ്പം വാഴ്ത്തിക്കൊണ്ടിരിക്കുകയും ചെയ്യുക എന്നും, അപ്പോള്‍ നിഷ്പക്ഷവാനായ അവനെക്കുറിച്ച് നീ ത്രികാലജ്ഞാനിയോട് ചോദിക്കുക എന്നും പറഞ്ഞിട്ടുണ്ട്. 22: 77-78 സൂക്തങ്ങളിലൂടെ വിശ്വാസികളോട് നാഥനെ മുറുകെപ്പിടിച്ച് നിലകൊള്ളാന്‍ കല്‍പിച്ച ശേഷം അവനാണ് നിങ്ങളുടെ യജമാനന്‍, എത്ര നല്ല യജമാനന്‍! എത്ര നല്ല സഹായി! എന്ന് പറഞ്ഞിട്ടുണ്ട്. 3: 101; 5: 48 സൂക്തങ്ങളില്‍ വിവരിച്ച പ്രകാരം അദ്ദിക്റിനെ മുറുകെപ്പിടിക്കുക വഴി ഏതൊരാള്‍ക്കും നാഥനെ മുറുകെപ്പിടിക്കാന്‍ സാധിക്കുന്നതാണ്. 10: 100 ല്‍ വിവരിച്ച വിശ്വാസിയാകാനുള്ള നാഥന്‍റെ സമ്മതപത്രമാണ് അദ്ദിക്ര്‍. അതുകൊണ്ട് 2: 255 ല്‍ വിവരിച്ച പ്രകാരം അദ്ദിക്ര്‍ കൊണ്ടല്ലാതെ മറ്റൊരാള്‍ക്കുവേണ്ടി ശുപാര്‍ശ ചെയ്യാന്‍ ഒരാള്‍ക്കും സാധ്യമല്ല. 2: 29; 9: 116; 39: 6 വിശദീകരണം നോക്കുക.