യുദ്ധം നിഷിദ്ധമായ മാസങ്ങള്‍ മാറ്റിമറിച്ചുകൊണ്ട് യുദ്ധം നിഷിദ്ധമായ മാസങ്ങളില്‍ പെട്ട ചിലതില്‍ യുദ്ധം അനുവദനീയമാക്കുകയും പകരം അനുവദനീയമായ മാസങ്ങളില്‍ യുദ്ധം നിഷിദ്ധവുമാക്കി എണ്ണം തികച്ചിരുന്നതിനെയാണ് നസീഅ് എന്ന് പറഞ്ഞിരുന്നത്. അതുപോലെ ചന്ദ്രവര്‍ഷപ്രകാരം ഹജ്ജ് വ്യത്യസ്ത കാലാവസ്ഥകളില്‍ മാറിമാറി വരുന്നത് ഒഴിവാക്കുന്നതിനുവേണ്ടിയും എല്ലാ വര്‍ഷവും ഹജ്ജ് സുഖപ്രദമായ കാലാവസ്ഥയില്‍ തന്നെയാകുന്നതിനുവേണ്ടിയും മുശ്രിക്കുകള്‍ ചന്ദ്രവര്‍ഷക്കലണ്ടറിനുപകരം ചിലപ്പോള്‍ സൂര്യവര്‍ഷക്കലണ്ടറിനെ ആശ്രയിച്ചിരുന്നു. 2: 65-66 സൂക്തങ്ങളില്‍ വിവരിച്ച പ്രകാരം ജൂതന്മാര്‍ സാബത്ത് നാളില്‍ മത്സ്യം പിടിക്കുന്നതിനെ വിരോധിച്ചത് മറികടക്കുന്നതിനുവേണ്ടി തന്ത്രങ്ങള്‍ മെനഞ്ഞ് ധിക്കാരപൂര്‍വം മത്സ്യം പിടിച്ചപ്പോള്‍ അവരെ നിന്ദ്യന്മാരായ കുരങ്ങുകളായി മാറ്റുകയുണ്ടായി. എന്നാല്‍ ക്രോഡീകരിക്കപ്പെട്ട ഗ്രന്ഥം ഇല്ലാത്തതിനാലാണ് മക്കാമുശ്രിക്കുകളെ 8: 19 ല്‍ വിവരിച്ച പ്രകാരം മാസങ്ങള്‍ മാറ്റിമറിച്ചതിന്‍റെ പേരില്‍ ശിക്ഷിക്കാതിരുന്നത്. ഭൂമിയുടെ കേന്ദ്രമായ മക്കയില്‍ ഖിബ്ല സ്ഥാപിച്ചത് മനുഷ്യര്‍ക്കിടയില്‍ ഏകദൈവത്തിന്‍റെ കാര്യത്തിലും മനുഷ്യരുടെ ഐക്യത്തിന്‍റെ കാര്യത്തിലും ഭിന്നിപ്പ് ഉണ്ടാകാതിരിക്കാന്‍ വേണ്ടിയാണ് എന്ന് 2: 150 ല്‍ വിവരിച്ചിട്ടുണ്ട്. 4: 150 ല്‍ വിവരിച്ച പ്രകാരം വിവിധ സംഘടനകളായി പിരിഞ്ഞ് മുശ്രിക്കുകളായിത്തീര്‍ന്ന, അറബി ഖുര്‍ആന്‍ വായിക്കുന്ന ഫുജ്ജാറുകള്‍ അവരുടെ ജീവിതമേഖലകളിലൊന്നും തന്നെ ഖിബ്ലയെ അംഗീകരിക്കുന്നവരല്ല. അങ്ങനെ അവര്‍ ലോകത്തിന്‍റെ വിവിധ ഭാഗങ്ങളില്‍ നോമ്പും പെരുന്നാളുമെല്ലാം കൊണ്ടുനടക്കുന്നത് അതാതു പ്രദേശങ്ങളില്‍ ചന്ദ്രോദയം ദര്‍ശിക്കുന്നതിനെ അടിസ്ഥാനമാക്കി വ്യത്യസ്ത ദിനങ്ങളിലായിട്ടാണ്. അതുവഴി അവര്‍ 41: 37 ന്‍റെ കല്‍പന തള്ളിപ്പറഞ്ഞുകൊണ്ട് ചന്ദ്രന് സാഷ്ടാംഗം പ്രണമിക്കുന്ന ഏക ജനതയായി അധഃപതിച്ചിരിക്കുകയാണ്. 83: 7 ല്‍ പറഞ്ഞ പ്രകാരം നരകക്കുണ്ഠത്തിലേക്കുള്ള 'സിജ്ജീന്‍' പട്ടികയിലുള്ള ഇക്കൂട്ടര്‍ എല്ലാ പ്രവാചകന്മാരും നബിമാരും വിശ്വാസികളും നിര്‍വ്വഹിച്ച, 19: 58 ല്‍ വിവരിച്ച പ്രകാരം 'നിഷ്പക്ഷവാനായ നാഥന്‍റെ സൂക്തങ്ങള്‍ വിവരിച്ച് കേള്‍പ്പിക്കപ്പെടുമ്പോള്‍' നിര്‍വ്വഹിക്കേണ്ട ഒറ്റ സാഷ്ടാംഗപ്രണാമം നിര്‍വഹിക്കാത്തവരും, 22: 18 ല്‍ പറഞ്ഞ ശിക്ഷ ബാധകമായവര്‍ നിര്‍വ്വഹിക്കുന്ന, ആത്മാവ് പങ്കെടുക്കാതെ ശരീരം കൊണ്ടുള്ള നമസ്കാരങ്ങളില്‍ കോഴികൊത്തുന്ന വേഗത്തില്‍ സാഷ്ടാംഗപ്രണാമം നിര്‍വഹിക്കുന്നവരുമാണ്. യഥാര്‍ത്ഥ കാഫിറുകളായ ഇക്കൂട്ടര്‍ക്ക് ഹീനമായ ശിക്ഷയാണ് ഒരുക്കിവെച്ചിട്ടുള്ളതെന്ന് 4: 151 ല്‍ പറഞ്ഞിട്ടുണ്ട്. 

ഒരു ജനത അവരുടെ ജീവിതരീതി സ്വയം മാറ്റുന്നതുവരെ അല്ലാഹു അവരുടെ സ്ഥിതി മാറ്റുകയില്ല എന്ന് 8: 53 ല്‍ ഇക്കൂട്ടര്‍ മാത്രമാണ് വായിച്ചിട്ടുള്ളത്. അദ്ദിക്റിനെ വിസ്മരിച്ച് ജീവിക്കുന്ന ഫുജ്ജാറുകളായ ഈ കെട്ടജനത 43: 36-39 സൂക്തങ്ങളില്‍ വിവരിച്ച പ്രകാരം അവരുടെ ആത്മാവിന്‍റെ ജിന്നുകൂട്ടുകാരനെ അദ്ദിക്ര്‍ കൊണ്ട് വിശ്വാസിയാക്കി മാറ്റാത്തതുകാരണം പിശാചായി മാറിയിട്ടുള്ള ജിന്നുകൂട്ടുകാരനാണ് ഹീനമായ ഇത്തരം പ്രവര്‍ത്തനങ്ങളെല്ലാം അവര്‍ക്ക് അലങ്കാരമായി തോന്നിപ്പിക്കുന്നത്. 2: 234; 6: 73, 133; 8: 48-51 വിശദീകരണം നോക്കുക.