16: 20-21 സൂക്തങ്ങളില്‍ പരാമര്‍ശിച്ച വിധത്തിലുള്ള ഖബര്‍ സന്ദര്‍ശനം നിലവിലുണ്ടായിരുന്ന ആദ്യകാലത്ത് ഖബര്‍ സന്ദര്‍ശനം നിഷിദ്ധമാക്കിയിരുന്നു. തന്‍റെ ആറാമത്തെ വയസ്സില്‍ മരിച്ചുപോയ മാതാവിന്‍റെ ഖബറിങ്കല്‍ പോയി പൊറുക്കലിനെത്തേടുന്നതിനുവേണ്ടി പ്രവാചകന്‍ അല്ലാഹുവിനോട് സമ്മതം ചോദിച്ചപ്പോള്‍ അത് വിലക്കിക്കൊണ്ട് അവതരിച്ച സൂക്തമാണിത്. മൂസവീശരീഅത്തനുസരിച്ച് ജീവിക്കാന്‍ കടമപ്പെട്ടവളായിരുന്ന മാതാവ് അപ്രകാരം ജീവിക്കാത്തതിനാല്‍ അവര്‍ക്കുവേണ്ടി പൊറുക്കലിനെത്തേടാന്‍ പ്രവാചകന് അനുമതി നല്‍കുകയുണ്ടായില്ല. 'കുടുംബത്തില്‍ നിന്ന് എത്ര അടുത്തവരാണെങ്കിലും ശരി -അത് മുഹമ്മദ് നബിയുടെ മാതാവാകട്ടെ, ഇബ്റാഹീം നബിയുടെ പിതാവാകട്ടെ, നൂഹ് നബിയുടെ മകനാവട്ടെ, നൂഹ്, ലൂത്ത് നബിമാരുടെ ഭാര്യമാരാവട്ടെ, ആരാണെങ്കിലും- അവര്‍ അല്ലാഹുവിന്‍റെ അധികാരാവകാശങ്ങളില്‍ പങ്കുചേര്‍ത്തവരും നരകത്തിന്‍റെ അവകാശികളാണെന്ന് വ്യക്തമായിക്കഴിഞ്ഞവരുമാണെങ്കില്‍ പിന്നെ അവര്‍ക്കുവേണ്ടി പൊറുക്കലിനെത്തേടല്‍ നബിമാര്‍ക്കോ വിശ്വാസികള്‍ക്കോ യോജിച്ചതല്ലതന്നെ' എന്ന സൂക്തം അവതരിപ്പിക്കുകയും, എന്നാല്‍ ഖബര്‍ സന്ദര്‍ശനം നിനക്ക് മരണഭയം ഉണ്ടാക്കിയേക്കുമെന്നതിനാല്‍ അതിന് അനുവാദം നല്‍കുകയും ചെയ്തിരിക്കുന്നു എന്ന് അറിയിക്കുകയും ചെയ്തു. അതോടുകൂടി ആദ്യഘട്ടത്തില്‍ വിരോധിക്കപ്പെട്ടിരുന്ന ഖബര്‍ സന്ദര്‍ശനം വിശ്വാസികള്‍ക്ക് അനുവദനീയമാക്കുകയുണ്ടായി. 

 ഇന്ന് അദ്ദിക്റിനെ മൂടിവെക്കുകയും തള്ളിപ്പറയുകയും ചെയ്തുകൊണ്ട് 58: 22 ല്‍ പറഞ്ഞ അല്ലാഹുവിന്‍റെ ഏകസംഘത്തില്‍ പെടാതെ 58: 19 ല്‍ പറഞ്ഞ കാഫിറായ പിശാചിന്‍റെ സംഘമായ വിവിധ സംഘടനകളില്‍ പെട്ട് അല്ലാഹുവിന്‍റെ അധികാരാവകാശങ്ങളില്‍ പങ്കുചേര്‍ക്കുന്നവരായി മാറിയിട്ടുള്ള ഫുജ്ജാറുകള്‍ക്കുവേണ്ടി പൊറുക്കലിനെത്തേടാനോ അവരുടെ ഖബ്റിന്‍റെ അടുത്ത് നില്‍ക്കാനോ അദ്ദിക്ര്‍ പിന്‍പറ്റുന്ന ആയിരത്തില്‍ ഒന്നായ വിശ്വാസികള്‍ക്ക് പാടില്ല. ഗ്രന്ഥത്തിന്‍റെ വെളിച്ചത്തിലല്ലാത്ത ഒരു ബന്ധവും ഇസ്ലാമില്‍ അനുവദനീയമല്ല. കാരണം 43: 67 ല്‍ പരലോകത്ത് അത്തരം ബ ന്ധങ്ങളെല്ലാം പരസ്പരം ശത്രുതയിലായിരിക്കുമെന്ന് പറഞ്ഞിട്ടുണ്ട്. വിശ്വാസികള്‍ക്കുവേണ്ടി പൊറുക്കലിനെത്തേടല്‍ മാത്രമേ വിശ്വാസികള്‍ക്ക് അനുവദനീയമാവുകയുള്ളൂ. 47: 19 ല്‍ അപ്പോള്‍ നീ അറിഞ്ഞിരിക്കുക, നിശ്ചയം അല്ലാഹുവല്ലാതെ മറ്റൊരു ഇലാഹുമില്ല തന്നെ, നിന്‍റെ പാപത്തിനും വിശ്വാസികളായ പുരുഷന്‍മാരുടെയും സ്ത്രീകളുടെയും പാപത്തിനും നീ പൊറുക്കലിനെത്തേടുക, നിങ്ങളുടെ ഇഹത്തിലുള്ള പാര്‍പ്പിടവും അന്തിമസങ്കേതവും അറിയുന്നവന്‍ തന്നെയാണ് അല്ലാഹു എന്നുപറഞ്ഞിട്ടുണ്ട്. 71: 28 ല്‍ നൂഹ് പ്രാര്‍ത്ഥിക്കുന്നത്: എന്‍റെ നാഥാ, എനിക്കും എന്‍റെ മാതാപിതാക്കള്‍ക്കും എന്‍റെ വീട്ടിലുള്ള വിശ്വാസികളില്‍ നിന്നുള്ളവര്‍ക്കും വിശ്വാസികളായ എല്ലാപുരുഷന്‍മാര്‍ക്കും സ്ത്രീകള്‍ക്കും നീ പൊറുത്തുതരിക, അക്രമികള്‍ക്ക് നഷ്ടമല്ലാതെ വര്‍ദ്ധിപ്പിക്കുകയുമരുത് എന്നാണ്. 'വീട്ടിലുള്ള വിശ്വാസികളില്‍ നിന്നുള്ളവര്‍ക്ക്' എന്ന് പറഞ്ഞതില്‍ നിന്നും വിശ്വാസികളല്ലാത്ത ഒരു മകനും ഭാര്യയും ഇതില്‍ നിന്ന് ഒഴിവാണ് എന്നര്‍ത്ഥം. 

 3: 7 ല്‍ വിവരിച്ച പ്രകാരം അറബി ഖുര്‍ആന്‍ വായിക്കുന്ന ഫുജ്ജാറുകളായ കുഫ്ഫാറുകളുടെ പട്ടിക നരകക്കുണ്ഠത്തിലേക്കുള്ള സിജ്ജീനിലാണെന്ന് 83: 7 ല്‍ പറഞ്ഞിട്ടുണ്ട്. 4: 150-151 സൂക്തങ്ങളില്‍ വിവരിച്ച പ്രകാരം അവര്‍ തന്നെയാണ് യഥാര്‍ത്ഥ കാഫിറുകളും മുശ്രിക്കുകളും. നിശ്ചയം! ഫുജ്ജാറുകള്‍ ജ്വലിക്കുന്ന നരകത്തിലാണെന്ന് 82: 14 ല്‍ പറഞ്ഞിട്ടുണ്ട്. അദ്ദിക്റിനെ മൂടിവെക്കുകയും തള്ളിപ്പറയുകയും ചെയ്യുന്ന ഫുജ്ജാറുകള്‍ തന്നെയാണ് ജ്വലിക്കുന്ന നരകത്തിലേക്കുള്ളവര്‍ എന്ന് 5: 10, 86 സൂക്തങ്ങളിലും, ഫുജ്ജാറുകളോട്, 'നിങ്ങള്‍ ഇവിടെ കുറച്ചുകാലം തിന്ന് കുടിച്ച് സുഖിക്കുക; നിശ്ചയം, നിങ്ങള്‍ ഭ്രാന്തന്മാര്‍ തന്നെയാകുന്നു' എന്ന് പറയാന്‍ 77: 46 ലും പറഞ്ഞിട്ടുണ്ട്. നാഥന്‍റെ അനുഗ്രഹമായ അദ്ദിക്റിനെ നിഷേധമായി മാറ്റിമറിച്ച് തങ്ങളുടെ അനുയായികള്‍ക്ക് ബോറന്മാരുടെ വീടായ നരകക്കുണ്ഠം അനുവദനീയമാക്കിക്കൊടുത്ത കപടവിശ്വാസികളോട്, 'നിങ്ങള്‍ ഇവിടെ കുറച്ചുകാലം സുഖിച്ചുകൊള്ളുക, അപ്പോള്‍ നിശ്ചയം നിങ്ങളുടെ മടക്കം നരകക്കുണ്ഠത്തിലേക്കാണ്' എന്ന് പറയാന്‍ 14: 28-30 സൂക്തങ്ങളിലൂടെ ഒറ്റപ്പെട്ട വിശ്വാസിയോട് കല്‍പിച്ചിട്ടുണ്ട്. 77-ാം സൂറത്തില്‍ 10 പ്രാവശ്യം 'അദ്ദിക്റിനെ തള്ളിപ്പറയുന്നവര്‍ക്കാണ് നരകത്തിലെ വൈല്‍ എന്ന ചെരിവ്' എന്ന് പറഞ്ഞിട്ടുണ്ട്. കപടവിശ്വാസികളും അവരുടെ അനുയായികളായ മുശ്രിക്കുകളും മാലിന്യമാണെന്നും അവര്‍ക്ക് ആത്മാവിനെ ശുദ്ധീകരിക്കാനുള്ള അദ്ദിക്ര്‍ മാലിന്യമല്ലാതെ വര്‍ദ്ധിപ്പിക്കുകയില്ല എന്നും 9: 28, 95, 125 സൂക്തങ്ങളില്‍ പറഞ്ഞിട്ടുണ്ട്. 5: 44, 45, 47 സൂക്തങ്ങളില്‍ വിവരിച്ച പ്രകാരം അദ്ദിക്റിനെ സത്യപ്പെടുത്തി ജീവിക്കുകയും വ്യക്തിജീവിതത്തിലും കുടുംബജീവിതത്തിലും സമൂഹജീവിതത്തിലും അതുകൊണ്ട് വിധികല്‍പിക്കുകയും ചെയ്യുന്ന വിശ്വാസികളായ പുരുഷന്മാര്‍ക്കും സ്ത്രീകള്‍ക്കും വേണ്ടി മാത്രമേ പൊറുക്കലിനെത്തേടാന്‍ പാടുള്ളൂ. 2: 39, 159-162; 9: 31, 78 വിശദീകരണം നോക്കുക.