നിശ്ചയം നിര്‍ബന്ധദാനം ദരിദ്രര്‍ക്കും അഗതികള്‍ക്കും സകാത്ത് ജോലിക്കാര്‍ക്കും ഹൃദയങ്ങള്‍ ഇണക്കപ്പെടേണ്ടവര്‍ക്കും അടിമമോചനത്തിനും കടബാധിതരെ സഹായിക്കുന്നതിനും അല്ലാഹുവിന്‍റെ മാര്‍ഗ്ഗത്തിലും വഴിയാത്രക്കാര്‍ക്കും മാത്രമുള്ളതാകുന്നു, ഇത് അല്ലാഹുവില്‍ നിന്നുള്ള നിര്‍ബന്ധവിഹിതമാണ്, അല്ലാഹു എല്ലാമറിയുന്ന യുക്തിജ്ഞനുമാണ്.
'നിര്‍ബന്ധദാനമായ' സക്കാത്തിനെക്കുറിച്ചാണ് ഇവിടെ പരാമര്‍ശിക്കുന്നത്. വിശ്വാസികളുടെ ഒരു സംഘമുണ്ടെങ്കില്‍ സകാത്ത് സമ്പ്രദായം നടപ്പിലാക്കലും ഈ സൂക്തത്തില്‍ പറഞ്ഞ എട്ട് വിഭാഗങ്ങളില്‍ വിതരണം ചെയ്യലും അവരുടെ ബാധ്യതയാണ്. 'നിര്‍ബന്ധദാനമായ' സക്കാത്തിനെക്കുറിച്ച് ഗ്രന്ഥത്തില്‍ പലയിടത്തും സ്വദഖഃ എന്ന പദമാണ് പ്രയോഗിച്ചിട്ടുള്ളത്. സകാത്ത് നല്‍കപ്പെടേണ്ട ഈ എട്ട് വിഭാഗങ്ങളും മൊത്തം മനുഷ്യരില്‍ നിന്നുള്ളവരാണ്, അല്ലാതെ മുസ്ലിംജനതയില്‍ നിന്നുള്ളവര്‍ മാത്രമല്ല, ഗ്രന്ഥവും ഇസ്ലാമും പ്രവാചകനുമെല്ലാം മൊത്തം മനുഷ്യര്‍ക്കുള്ളതാണ്. എന്നാല്‍ മനുഷ്യരില്‍ അല്ലാഹു ശപിച്ച, കോപിച്ച, വധിച്ച, വധിക്കാന്‍ ആവശ്യപ്പെട്ട കപടവിശ്വാസികള്‍ക്ക് സകാത്തില്‍ നിന്ന് നല്‍കാന്‍ പാടില്ല. കപടവിശ്വാസികളില്‍ നിന്ന് സകാത്ത് സ്വീകരിക്കപ്പടുകയില്ലെന്ന് 9: 53-54 സൂക്തങ്ങളില്‍ പറഞ്ഞിട്ടുണ്ട്. കാരണം അവര്‍ അല്ലാഹുവിനെ മറന്നവരും അല്ലാഹുവിനെയും പ്രവാചകനെയും ഗ്രന്ഥത്തില്‍ മൂടിവെച്ചവരുമാണ്.
1) ഫഖീര്‍ (ദരിദ്രന്‍):- നിത്യജീവിതത്തിന് പരസഹായം ആവശ്യമുള്ള ആളാണ് ഫഖീര്‍. ശാരീരികവൈകല്യമോ വാര്‍ദ്ധക്യമോ കാരണമായി സ്ഥിരം സഹായം ആവശ്യമുള്ളവരും, യാദൃശ്ചിക കാരണങ്ങളാല്‍ താല്‍ക്കാലിക സഹായം അര്‍ഹിക്കുന്നവരും സഹായം ലഭിച്ചാല്‍ മേലില്‍ സ്വന്തം കാലില്‍ നില്‍ക്കാന്‍ കഴിയുന്നവരുമായ അവശരും അനാഥകള്‍, വിധവകള്‍, തൊഴില്‍രഹിതര്‍, അത്യാഹിതങ്ങള്‍ക്കിരയായവര്‍ തുടങ്ങിയവരും ഇതില്‍ പെടു ന്നു. 2: 271-272 വിശദീകരണം നോക്കുക.
2) മിസ്കീന്‍ (അഗതികള്‍):- നിത്യവൃത്തി കഴിഞ്ഞുപോകാനുള്ള തൊഴിലോ വരുമാനമോ ഉണ്ടെങ്കിലും സാധാരണയില്‍ കവിഞ്ഞുള്ള ഒരു ചെലവ് വന്നാല്‍ അത് പരസഹായം കൂടാതെ നിര്‍വ്വഹിക്കാന്‍ കഴിയാത്തവരാണ് അഗതികള്‍. അന്യരുടെ മുമ്പില്‍ കൈനീട്ടാന്‍ അവരുടെ ആത്മാഭിമാനം അവരെ അനുവദിക്കുകയില്ല. വിഷമാവസ്ഥ പുറമേക്ക് തോന്നിപ്പിക്കാതിരിക്കയാല്‍ അവരെ സഹായിക്കാന്‍ ആരും സ്വയം മുന്നോട്ടുവരികയുമില്ല. ഇത്തരക്കാരായ ദരിദ്രന്‍മാരെയും അഗതികളെയും വിശ്വാസികള്‍ ലക്ഷണങ്ങള്‍ കൊണ്ട് തിരിച്ചറിയുമെന്നും അവര്‍ക്കാണ് സകാത്ത് നല്‍കേണ്ടതെ ന്നും 2: 273 ല്‍ പറഞ്ഞിട്ടുണ്ട്.
3) സകാത്ത് ജോലിക്കാര്‍:- സകാത്ത് മുതല്‍ ശേഖരിക്കുക, സൂക്ഷിക്കുക, വിതരണം ചെയ്യുക, അത് എഴുതി സൂക്ഷിക്കുക എന്നീകാര്യങ്ങള്‍ക്ക് നിയമിക്കപ്പെടുന്നവരാണ് സകാത്ത് ജോലിക്കാര്‍. ഈ ഉദ്യോഗസ്ഥന്‍മാര്‍ ദരിദ്രരോ അഗതികളോ അല്ലെങ്കിലും സകാത്ത് മുതലില്‍ നിന്ന് തന്നെ അവര്‍ക്ക് വേതനം നല്‍കാവുന്നതാണ്. ഇവിടെ സകാത്ത് ജോലിക്കാര്‍ എന്ന പ്രയോഗവും 103-ാം സൂക്തത്തിലെ, 'നീ അവരുടെ സമ്പത്തില്‍ നിന്ന് നിര്‍ബന്ധദാനം സ്വീകരിക്കുകയും അവരെ ശുദ്ധീകരിക്കുകയും ചെയ്യുക' എന്ന വാക്യവും സകാത്ത് ശേഖരണവും വിതരണവും വിശ്വാസികളുടെ സംഘമുണ്ടെങ്കില്‍ അവരുടെ ബാധ്യതയാണെന്ന് വ്യക്തമാക്കുന്നു. 24: 55 കൂട്ടിവായിക്കുക.
പ്രവാചകനും കുടുംബത്തിനും സകാത്തില്‍ നിന്നുള്ള വിഹിതം സ്വയം നിഷിദ്ധമാക്കിയ പ്രവാചകന്‍ സകാത്ത് സംഭരണവിതരണ ജോലികള്‍ യാതൊരു പ്രതിഫലവും കൂടാതെയാണ് നിര്‍വ്വഹിച്ചുപോന്നത്. പ്രവാചകന്‍റെ കുടുംബത്തില്‍ സകാത്തിന് ബാധകമായ ധനം കൈവശമുള്ളവര്‍ സകാത്ത് നല്‍കാന്‍ ബാധ്യസ്ഥരാണ്. എന്നാല്‍ അവരിലെ ദരിദ്രന്‍മാര്‍, കടക്കാര്‍, യാത്രക്കാര്‍, അഗതികള്‍ മുതലായവര്‍ക്ക് സകാത്ത് വാങ്ങാന്‍ പാടുള്ളതല്ല. മുതലിന്‍റെ ശുദ്ധീകരണ പ്രക്രിയയുടെ ഭാഗമാണ് സകാത്ത് എന്നതിനാല്‍ അത് കഴിയുന്നതും വാങ്ങാതിരിക്കാനാണ് യഥാര്‍ത്ഥ വിശ്വാസികള്‍ ആഗ്രഹിക്കേണ്ടത്. എന്നാല്‍ കപടവിശ്വാസികള്‍ അത് എന്നല്ല, മ്ലേച്ഛമായ ഏത് ധനവും ഭക്ഷണവും സ്വീകരിക്കുന്നവരും അതിനുവേണ്ടി ആര്‍ത്തിപൂണ്ട് ഓടിനടക്കുന്നവരുമാണ്. അതിനാലാണ് അവരെ ഉപദവിച്ചാലും ഇല്ലെങ്കിലും മാറ്റം വരാത്ത നായയോട് 7: 176 ല്‍ ഉപമിച്ചിട്ടുള്ളത്.
4) ഹൃദയങ്ങള്‍ ഇണക്കപ്പെടേണ്ടവര്‍:- വിശ്വാസികളുടെ സംഘമില്ലാത്ത ഇക്കാലത്ത് ഹൃദയങ്ങള്‍ ഇസ്ലാമിലേക്ക് ഇണക്കപ്പെടേണ്ടവര്‍ക്ക് വേണ്ടി സകാത്തിന്‍റെ വിഹിതം നീക്കിവെക്കാവുന്നതല്ല. എന്നാല്‍ ഇസ്ലാമിന്‍റെ യഥാര്‍ത്ഥ വിരോധികളായ കപടവിശ്വാസികളും കാഫിറുകളുമടങ്ങിയ ഇന്നത്തെ ഫുജ്ജാറുകളുടെ ജീവിതരീതി കണ്ടിട്ട് ഗ്രന്ഥത്തിലേക്കും ഇസ്ലാമിലേക്കും തിരിഞ്ഞുനോക്കാന്‍ വിമുഖത കാണിക്കുന്ന പ്രവാചകന്‍റെ തന്നെ സമുദായത്തില്‍ പെട്ട ഇതരജനവിഭാഗങ്ങള്‍ക്ക് സകാത്തിന്‍റെ വിഹിതത്തില്‍ നിന്ന് സഹായങ്ങളും പാരിതോഷികങ്ങളും നല്‍കി അവര്‍ക്ക് അതിനെ പരിചയപ്പെടുന്നതിന് അവസരമുണ്ടാക്കാവുന്നതാണ്. ഭൂമിയിലുള്ള സമ്പത്ത് മുഴുവന്‍ ചെലവഴിച്ചാലും ഒരാള്‍ക്കും ഒരാളെയും വിശ്വാസിയാക്കുക സാധ്യമല്ല. എന്നാല്‍ ഏതൊരാള്‍ക്കും അല്ലാഹുവിന്‍റെ സമ്മതപത്രമായ അദ്ദിക്ര്‍ ഉപയോഗപ്പെടുത്തി സ്വയം വിശ്വാസിയാകാവുന്നതാണ്, അതിന് ജാതിയോ മതമോ ഭാഷയോ വേഷമോ മാറ്റേണ്ടതില്ലെന്ന് 2: 62 ല്‍ പറഞ്ഞിട്ടുണ്ട്.
5) അടിമ മോചനം:- പ്രത്യക്ഷത്തില്‍ ഇന്ന് അടിമവ്യവസ്ഥയില്ലെങ്കിലും അടിമകളോടുണ്ടായിരുന്നതിനെക്കാള്‍ നീതിരഹിതമായി തൊഴില്‍ ചെയ്തതിനു ശമ്പളം നല്‍കാതെ പണിയെടുപ്പിക്കുന്ന സമ്പ്രദായം ഇന്ന് ലോകത്തെല്ലായിടത്തും നടപ്പിലുണ്ട്, പ്രത്യേകിച്ച് ഗള്‍ഫുനാടുകളില്‍. 2: 226-227 സൂക്തങ്ങളുടെ കല്‍പനക്ക് വിരുദ്ധമായി ഭാര്യ-സന്താനങ്ങളുമായുള്ള സഹവാസം പിരിഞ്ഞുകൊണ്ടും ജീവിതമാര്‍ഗം തേടിക്കൊണ്ടും മറുനാടുകളില്‍ ജോലി അന്വേഷിച്ച് പോകുന്നവരില്‍ പണിയെടുത്തതിനുള്ള ശമ്പളം പോലും ലഭിക്കാതെ അടിമകളെക്കാളും അനീതിക്കിരയാകുന്നവര്‍ക്ക് സകാത്തി ന്‍റെ പണത്തില്‍ നിന്ന് നല്‍കാവുന്നതാണ്. അഥവാ അവര്‍ക്ക് നാട്ടില്‍ എന്തെങ്കിലും ഉപജീവനമാര്‍ഗം കണ്ടെത്താനുള്ള സഹായം നല്‍കലാണ് ഇന്ന് അടിമമോചനത്തിന് സകാത്ത് പണം ചെലവഴിക്കുന്ന രീതി.
6) കടബാധിതര്‍:- കടം കൊണ്ട് വലഞ്ഞവര്‍ക്കും കടം മുഴുവന്‍ വീട്ടിക്കഴിഞ്ഞാല്‍ ജീവിച്ചു പോകാന്‍ ഞെരുങ്ങുന്ന കടബാധിതര്‍ക്കും സകാത്തില്‍ നിന്ന് നല്‍കാവുന്നതാണ്. അവര്‍ വരുമാനമുള്ളവരോ തൊഴിലുള്ളവരോ ആവട്ടെ, അഥവാ സാധാരണ ഭാഷയില്‍ ധനികരോ ദരിദ്രരോ ആവട്ടെ, ഏത് നിലക്കും സകാത്ത് ധനത്തില്‍ നിന്ന് അവര്‍ക്ക് സഹായം നല്‍കാവുന്നതാണ്. എന്നാല്‍ സ്ത്രീധനം പോലുള്ള ആചാര-മാമൂലുകളിലും അവിഹിതമാര്‍ഗങ്ങളിലും ആഡംബരങ്ങളിലും ദുര്‍വ്യയം ചെയ്തതുമൂലം സ്വയം കടം വരുത്തി വെച്ചവരാണെങ്കില്‍ അത്തരം കുറ്റങ്ങളില്‍ നിന്ന് പ ശ്ചാത്തപിക്കുന്നതുവരെ അവര്‍ക്ക് സകാത്ത് നല്‍കാന്‍ പാടില്ല, കാരണം അവര്‍ പിശാചുക്കളുടെ സഹോദരന്‍മാരാണെന്ന് 17: 27 ല്‍ പറഞ്ഞിട്ടുണ്ട്.
7) അല്ലാഹുവിന്‍റെ മാര്‍ഗ്ഗം:- എല്ലാ നല്ല പ്രവര്‍ത്തനങ്ങളും അല്ലാഹുവിന്‍റെ മാര്‍ഗ്ഗത്തില്‍ പെടുന്നു. മുന്‍കാലത്ത് യുദ്ധത്തിനുവേണ്ട ആയുധങ്ങള്‍, ഭക്ഷണപാനീയങ്ങള്‍ തുടങ്ങിയവ ഒരുക്കുന്നതിന് വേണ്ടി സകാത്തിന്‍റെ പണം ചെലവഴിക്കാമായിരുന്നു. എന്നാല്‍ ഇന്ന് യുദ്ധമോ വധമോ ഇല്ല, മറിച്ച് അദ്ദിക്ര്‍ മൂടിവെക്കുന്ന കപടവിശ്വാസികളോട് അതുകൊണ്ടുള്ള ജിഹാദ് മാത്രമാണുള്ളത്. മുന്‍കാലങ്ങളില്‍ അല്ലാഹുവിനെ ധാരാളമായി സ്മരിക്കുന്ന പള്ളികള്‍ നിര്‍മ്മിക്കുന്നതിനും അദ്ദിക്ര്‍ പഠിപ്പിക്കുന്നതും ഭൗതികവിദ്യാഭ്യാസം നല്‍കുന്നതുമായ സ്ഥാപനങ്ങളുണ്ടാക്കുന്നതിനും നടത്തികൊണ്ടുപോകുന്നതിനും സകാത്തിന്‍റെ പണം ഉപയോഗിക്കാമായിരുന്നു. എന്നാല്‍ ഇന്ന് പള്ളികള്‍ 9: 107 ല്‍ വിവരിച്ച പ്രകാരം സന്‍മാര്‍ഗത്തില്‍നിന്ന് വ്യതിചലിച്ച് മദീനയിലെ കപടവിശ്വാസികള്‍ നിര്‍മ്മിച്ച മസ്ജിദുള്ളിറാര്‍ പോലെ ജനങ്ങള്‍ക്ക് ഉപദ്രവമുണ്ടാക്കുന്ന, ജനങ്ങളില്‍ ഭിന്നിപ്പ് സൃഷ്ടിക്കുന്ന ഗൂഢാലോചനാകേന്ദ്രങ്ങളായി മാറിയിരിക്കുന്നതിനാല്‍ അത്തരം പള്ളികള്‍ക്ക് സകാത്തില്‍ നിന്നോ അല്ലാതെയോ പണം ചെലവഴിക്കാന്‍ പാടില്ല. മതവിദ്യാഭ്യാസം എന്നുപറഞ്ഞ് ഫുജ്ജാര്‍ കിതാബുകളായ കര്‍മ്മശാസ്ത്രഗ്രന്ഥങ്ങളും 'നഹ്വ്-സര്‍ഫ്' ഗ്രന്ഥങ്ങളും അറബി ഭാഷാഗ്രന്ഥങ്ങളും ഖുര്‍ആന്‍ പരിഭാഷകളുമെല്ലാം പഠിപ്പിക്കുകയും അദ്ദിക്ര്‍ പഠിപ്പിക്കേണ്ട വിധത്തില്‍ പഠിപ്പിക്കാതിരിക്കുകയും ചെയ്യുകയാല്‍ ഇന്ന് ഇത്തരം വിദ്യാഭ്യാസസ്ഥാപനങ്ങള്‍ക്കും സകാത്തില്‍ നിന്ന് പണം നല്‍കാവുന്നതല്ല. അതൊന്നും അല്ലാഹുവിന്‍റെ മാര്‍ഗ്ഗത്തിലായിരിക്കുകയോ സ്വീകരിക്കപ്പെടുകയോ ഇല്ല.
പ്രപഞ്ചം അതിന്‍റെ സന്തുലനത്തില്‍ നിലനിര്‍ത്താനുള്ള ത്രാസ്സായ അദ്ദിക്ര്‍ പഠിപ്പിക്കേണ്ടവിധം പഠിപ്പിക്കപ്പെടാത്തതിനാല്‍ ഇന്ന് 'അല്ലാഹ്' എന്ന ബോധം തന്നെ ഇല്ലാതായിരിക്കുകയാണ്. മാത്രമല്ല ദരിദ്രര്‍, അനാഥകള്‍, അഗതികള്‍, വഴിയാത്രക്കാര്‍, ബന്ധികള്‍, അയല്‍വാസികള്‍, ബന്ധുജനങ്ങള്‍ തുടങ്ങിയവരോടൊന്നും നീതിയിലും ന്യായത്തിലും വര്‍ത്തിക്കുന്നുമില്ല. മനുഷ്യര്‍ അവരവരെ സ്വയം തിരിച്ചറിയാത്തതും ജീവിതലക്ഷ്യം തിരിച്ചറിയാത്തതുമാണ് ഇതിനെല്ലാം കാരണം. നാട്ടില്‍ വര്‍ഗീയതയും സ്വാര്‍ത്ഥതയും സ്വജനപക്ഷപാതവുമെല്ലാം ഒഴിവാക്കി മനുഷ്യരുടെ ഐക്യം സ്ഥാപിക്കാനും മനുഷ്യര്‍ തമ്മിലുള്ള രക്തച്ചൊരിച്ചില്‍ ഇല്ലാതാക്കാനും കവര്‍ച്ച, കൊള്ള, ബലാല്‍ക്കാരം, വ്യഭിചാരം, കൊലപാതകം, ചൂഷണം, ഒരു വിഭാഗം മറ്റൊരുവിഭാഗത്തിന്‍റെ മേല്‍ മേല്‍ക്കോയ്മ പുലര്‍ത്തല്‍ തുടങ്ങി ഭൂമിയെ നശിപ്പിക്കുന്ന തരത്തിലുള്ള പൈശാചികവൃത്തികള്‍ ഇല്ലായ്മ ചെയ്യാനുമുള്ള സ്രഷ്ടാവിന്‍റെ വിധിവിലക്കുകളായ അദ്ദിക്ര്‍ പഠിക്കാനും പഠിപ്പിക്കാനും പ്രചരിപ്പിക്കാനും ചെലവഴിക്കല്‍ മാത്രമാണ് ഇന്ന് അല്ലാഹുവിന്‍റെ മാര്‍ഗ്ഗത്തില്‍ ചെലവഴിക്കുന്ന ഏകമാര്‍ഗ്ഗം. സ്വര്‍ഗ്ഗത്തില്‍ സൃഷ്ടിക്കപ്പെട്ട മനുഷ്യന് സ്വര്‍ഗ്ഗത്തിലേക്കുതന്നെ തിരിച്ചുപോകാനുള്ള ടിക്കറ്റായ അദ്ദിക്ര്‍ കൊണ്ട് മാത്രമേ മനുഷ്യനെ തന്‍റെ ഉത്തരവാദിത്തങ്ങളെല്ലാം സ്വയം നിറവേറ്റുന്നവനാക്കി മാറ്റാന്‍ സാധിക്കുകയുള്ളൂ. അപ്പോള്‍ അതിനുവേണ്ടി അദ്ദിക്ര്‍ പഠിക്കുന്നതിനും ലോകരിലേക്ക് എത്തിക്കുന്നതിനും ചെലവഴിക്കുന്നതിനാണ് ഇന്ന് സകാത്തിന്‍റെ ഈ എട്ടു വകുപ്പുകളില്‍ മറ്റേത് വകുപ്പിനെക്കാളും മുന്‍ഗണന കൊടുക്കേണ്ടത്.
8) വഴിയാത്രക്കാര്‍:- യാത്രാവേളയില്‍ സഹായം ആവശ്യമായിവരുന്നവന് സകാത്തില്‍ നിന്ന് സഹായം നല്‍കേണ്ടതാണ്, അവന്‍ സ്വന്തം നാട്ടില്‍ സകാത്ത് കൊടുക്കുന്നവനാണെങ്കിലും ശരി. കാരണം യാത്രയില്‍ പണം കവര്‍ച്ച ചെയ്യപ്പെടുക, പോക്കറ്റടിക്കപ്പെടുക, നഷ്ടപ്പെടുക തുടങ്ങിയ അവസ്ഥയില്‍ കടം വാങ്ങാന്‍ ഈടുനല്‍കാന്‍ സാധിക്കാതിരിക്കുകയോ സാക്ഷികളില്ലാതിരിക്കുകയോ അല്ലെങ്കില്‍ പണം തിരിച്ചുനല്‍കാനുള്ള സാഹചര്യമില്ലാതിരിക്കുകയോ ചെയ്യുന്ന അവസ്ഥയില്‍ സകാത്തില്‍ നിന്ന് ആവശ്യപ്പെടുമ്പോള്‍ വഴിയാത്രക്കാരന് കൊടുക്കല്‍ വിശ്വാസികളുടെ ബാധ്യതയാണ്. എന്നാല്‍ ഇന്ന് സകാത്ത് സമ്പ്രദായം തന്നെ ലോകത്തെവിടെയും നിലവിലില്ലാത്തതിനാല്‍ ഈ വിഭാഗത്തിനെന്നല്ല, ഒരുവിഭാഗത്തിനും അര്‍ഹമായ സകാത്ത് നല്‍കപ്പെടുന്നില്ല എന്ന് കാണാം.
ഇന്ന് ലോകത്തെവിടെയും വിശ്വാസികളുടെ ഒരു സംഘമില്ലാത്തതിനാല്‍ അദ്ദിക്റിനെ സത്യപ്പെടുത്തി ജീവിക്കുന്ന വിശ്വാസി തന്‍റെ ധനം സ്വന്തം ആവശ്യങ്ങള്‍ക്ക് മിതമായി ചെലവഴിക്കുകയും, ആത്മാവിന്‍റെ ഭക്ഷണവും വസ്ത്രവും ദൃഷ്ടിയുമായ അദ്ദിക്ര്‍ ലോകരില്‍ പ്രചരിപ്പിച്ചുകൊണ്ട് മനുഷ്യരുടെ ഐക്യം നിലനിര്‍ത്താനും 1000 സമുദായങ്ങളില്‍ പെട്ട ജീവികള്‍ക്ക് നാഥനെ ആത്മാവുകൊണ്ട് പ്രാര്‍ത്ഥിക്കാനും കീര്‍ത്തനം ചെയ്യാനും അവസരം ഒരുക്കിക്കൊടുക്കുക എന്ന ലക്ഷ്യം വെച്ചുകൊണ്ട് ജൈവകൃഷി ചെയ്യുകയും മരങ്ങള്‍ വെച്ചുപിടിപ്പിക്കുകയും അതിനുവേണ്ടി മറ്റുള്ളവരെ പ്രേരിപ്പിക്കുകയും ചെയ്യുന്ന പ്രവര്‍ത്തനങ്ങള്‍ക്ക് കൂടുതല്‍ പ്രാമുഖ്യം നല്‍കുകയുമാണ് ചെയ്യുക. മാത്രമല്ല, 76: 8-9 സൂക്തങ്ങളില്‍ വിവരിച്ച പ്രകാരം ഭക്ഷണത്തിന് സ്വയം ആവശ്യമുണ്ടായിരിക്കെത്തന്നെ അത് ദരിദ്രര്‍ക്കും അഗതികള്‍ക്കും അനാഥകള്‍ക്കും ബന്ദികള്‍ക്കും ഭക്ഷിപ്പിക്കുകയും അതിനുവേണ്ടി മറ്റുള്ളവരെ പ്രേരിപ്പിക്കുകയും ചെയ്യുന്നതാണ്. അത്തരം പ്രവൃത്തികള്‍ ചെയ്യുന്നതിന് പ്രപഞ്ചനാഥന്‍റെ തൃപ്തിയല്ലാതെ മറ്റാരുടെയും അംഗീകാരമോ പ്രശംസയോ ഒന്നും അവര്‍ മോഹിക്കുകയുമില്ല.
വിശ്വാസികള്‍ ഏറ്റവും നല്ല ഗ്രന്ഥമായ അദ്ദിക്റില്‍ 2: 152; 3: 190-191 സൂക്തങ്ങളില്‍ വിവരിച്ചതുപോലെ ഇവിടെ നാഥനെ കണ്ടുകൊണ്ട് ചരിക്കുന്നവരാണ്. വന്നപ്പോള്‍ കൊണ്ടുവരാത്തതും പോകുമ്പോള്‍ കൊണ്ടുപോകാത്തതുമായ എല്ലാ അനുഗ്രഹങ്ങളും പ്രകാശമായ അദ്ദിക്റിന്‍റെ വെളിച്ചത്തില്‍ ചെലവഴിച്ച് 3: 136 ല്‍ വിവരിച്ച പ്രകാരം സ്വര്‍ഗം ഇവിടെ പണിയുകയും നാഥനെ ആത്മാവുകൊണ്ട് കണ്ട് നാഥന്‍ അവനെയും അവന്‍ നാഥനെയും പരസ്പരം തൃപ്തിപ്പെട്ട് മരണപ്പെടുകയും നാലാം ഘട്ടത്തില്‍ സമ്പാദിച്ച സ്വര്‍ഗം ഏഴാം ഘട്ടത്തില്‍ അനന്തരമെടുക്കുന്നതുമാണ്. 2: 2-5; 6: 151-153; 7: 205-206 വിശദീകരണം നോക്കുക.